Ester 6
6
Mardoqueo yaklauwi minit bayakna
1Kidika puknita, king sip kamasdai, kat witing king kawa sauni yakat di balna kalahwak uhulwa wauhnitaya kidika yulwak witing yakat dukiuna dai bahang yulwi talwi kalana atnin. 2Kidika wauhnitaya yakat yayakna amput kalbauyang muihni balna bu Bigtán dawi Teres karak malnikau king Asuero#Est 2:21-22. inin yayamwak, Mardoqueo yaklauwi lāih yakna dai kidika uhulna kat. 3King yaklauwi yulwi dakana:
—¿Ais dunayah, dawak risnipik bik Mardoqueo adika yamna kidika yulni?
—Di as bik duwaski —muih nunuhni balna kaput nangnitlalana.
4Kidika minitni yakat Amán watak yakat kawi yaklana, king payahwa panikau yakat, king yakat kalyulna atnin, Mardoqueo kidika sitwi murilwi inin, pani yayamna yakat.
—¿Wais watak yakat likyah? —king yulwi dakana.
5Muih nunuhni balna nangnitlalana:
—Amán.
King yulna:
—¡Datanang kawi yaklawang!
6Amán kawi yaklawak, king kalyulwi dakana:
—¿Ais yamninyah, king yaklauwi al as kau ayangni nuhni yamnin kulwa kidika?
Amán witing alas kulnin kau kulna: “¿Wais yakat ayangni nuhni yamnin sipyah king kidika, yang akat awas kat?” 7Kaput laih nangnitlana:
—Kidika alni laih 8king asnina kawa kidika duainin, dawak king kilwa āniras kidika, dawak king kraunni#6.8 King kraunni: yulwa kidika sipki, aras arangni basni balna kau paknin as yamna atnin, bahang kidika laih king kraunni as kapat ki. paknin bik. 9Prak dawak aras kidika muih al as tanit nuhni kalkulna tingni yakat āna karang, bahang witing yaklauwi al as king yaklauwi ayangni nuhni yamnin kulwa muihni yakat asnina ānin, dawak aras kau ilsakwi tawan nuhni kau muih kalududuhwa pani yakat sarahwi kiwarang tanit yakat: ‘¡King yaklauwi angdik alni yakat ayangni nuhni yamnin kulwa kidika aput yamwi!’
10Kaput laih king yaklauwi Amán yakat kalyulna:
—Bahang bainahta, prak kidika dawak aras kidika bik dutah, dawak yultada kaput yamtah Ju al Mardoqueo yakat, witing laih king ūni dūrni yakat yalahna sakki. Yulnaman kaput yamma as bik danam-awas ki.
11Amán witing prak dawak aras bik duna, dawi Mardoqueo yakat prakni āna, dawi tawan nuhni paskau muih kalududuhwa pani yakat duwi kiuna, bahang witing aput sarahwi yulna: “¡King yaklauwi angdika alni yakat ayangni nuhni yamnin kulwa kidika aput yamwi!”
12Awaihwi dahn dadawakat, Mardoqueo laih king ūni dūrni yakat kiuna, dawak Amán laih sirihni palni ūni yakat kiuna muhni put dawi. 13Dawak witing yalni yakat, kaput bik kaltalyang yamni balna yakat bik diyulna, amput di kalahna kidika, dawak witingna yaklauwi kalyuyulna:
—Mardoqueo niningyakat man parasma kidika disnaman, witing laih Ju, kidika bahang minit bayaktas awama, nawatkauh laih sau kat bukma.
14Baisa yulbauwi dadawas kat, king dini yamyang balna uiwi kakana, sirihni palni Amán kidika duwi kiuna atnin, Ester yaklauwi kasnin alasnina yamna yakat.
Currently Selected:
Ester 6: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
