Ester 4
4
Ju balna kulninna bukna kidika lāni yulni
1Di balna kalahwa kidika Mardoqueo witing bitik dakana kat, prakni iswi bisna, kulnin dalani duwa kidika yulni, asna utuhni kat duwi kana, dawak tunan yakat wan uhna, dawak tawan yakat kalahwi kiri sarahwi awaihna. 2Kaput kiwi kana, king ūni watak kiwi kawa yakat, kauna kidika yakat kiwi kanin kidika sip-awas dai, kidika asnina satni kat kawi. 3Kaput bik laih sau sahyakna balna bitik yakat king lā āna kidika kiwi kawa kat, Ju balna pasyakat kulnin buknin nuhni sakdai, bahang kidika yulni laih witingna di kakaswas dai, miniknawas yakwi kakaidana, manas bik laih wan minit yakat kalalangna, dawak asna utuhni bik kakana dai.
Ninisan balna ilpnina kana
4King yalni Ester, dini yamyang yayal bangdai kidika, dawak ahal bik witing yakat mainkaltatalwa balna bik yaklauwi kalyuyulna, yul balna kalahwa kidika. Kaput laih king yalni kidika kulnin bukna nuhni palni dai, kaput laih Mardoqueo yakat kalsihna dai asna, witing prakni utuhni kana kidika yakpamwi prakni uk kana atnin yulni, kaunah witing kaput yamnin kidika yulwas dana. 5Ester yaklauwi Hatac yakat kalyulwak kiuna, bahang witing kidika laih kalbauyang muihni balna king ūnikau maintatalwa balna kidika taninatuna nuhni dai, dawak pakna Mardoqueo yakat kiwi talna atnin, dawak bik kalyulwi dakana atnin ais kalahwa sakpa, dawak ais yulni witing kaput yamwih. 6Dawak Hatac witing kiwi yulbauna Mardoqueo yakat, bahang Mardoqueo laih tawan nuhni paskau muih kalududuhwa pani yakat sakdai, bahang kidika pani laih king ūni dūrni muhnit palni yakat dai, 7dawak Mardoqueo yaklauwi kalyulna di kalahwasak kidika bitik, dawak Amán yaklauwi lalah ampus ānin yulna kidika, king lalahni baksni yakat, Ju balna kidika bitik iwi dis yamwarang mani kat. 8Dawakat kaput bik Ju muihni balna iwi dismuknin yulni wauhtaya uhulna kidika Susa tawanni yakat, as yakwi kalana, bahang kidika laih Ester yakat niningkana atnin yulni, bahang kaput laih Ester bik amanglana atnin di kalahwa bitik kidika. Dawak bik Ester yakat pakna witing palni king yakat kiwi yulbauna atnin, dawak tawanni ilpni yamna atnin.
9Hatac nawatwi kaiwi Ester yakat kalyulna, Mardoqueo kalyulna yulni kidika bitik. 10Ester yaklauwi watwi sihna Hatac kidika Mardoqueo yakat kalyulna atnin adika yulni: 11“Muih bitik king dini yayamwa balna kidika, dawak witing tingni dinit kau sau sahyakna bitik kau muih balna kidika, witingna amanglalana ki, lā as sakkidika yaklauwi daunin yakat wirlawa kidika, muih bitik yakat ahal dawak yayal bik, wais kat king ūni watak pasyakat kakawarangkat, king yaklauwi kiunin kalyulwas bik, kaunah king yaklauwi witing tulninah parasni kidika dulauwi kidika muihni niningyakat yu dawarangkat, minikun kaltalwa kidika yulni, kidik sangnika īwas dawi. Kaput bahang yang yamnik kidika laih, uman ma 30 bayakwi king yang akat yayulwaski baisa, witing yakat yawinik.”
12Mardoqueo witing Ester yaklauwi yul kalsihna kidika duna usnitkat 13biriwi adika yulni kalsihna: “Kulwinih man manah sangmaka laihta lama, king ūni yakat yalahtaman bahang, man manah Ju yal as. 14Waradika ap data, yul as yultas damakat, Ju balna laihwi yaknin kidika pa uk kaupak kaiwarang, kauna man dawi wanaihma balna, papangma wanaihni balna bitik laih daunamana karang ¡King yalni āwanaman kidika laih sip atnin ki adika di dutni balna kalahwa adika nining yakat ilp as yamna atnam!”
15Kaput laih Ester yaklauwi adika yulni Mardoqueo yakat sihna: 16“Yawah, Susa yakat Ju balna kidika bitik uduhta data yang yulki dikakaswinih. Di kasnin awas ki dinin bik awaski, ma bās dawak pukta bās kat. Yang dawak diki yamyang yayal balna karak sihm yamki, usnit kat yawik talki king yakat, kidika laih lā niningkauh yawayang karang bik. Yaīnin karang kat, yaīwang.”
17Kaput laih Mardoqueo witing kiwi Ester kalyulna kaput yamna.
Currently Selected:
Ester 4: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998