Deuteronomio 8
8
Muih al kidika plawar busna karak manah sangka awas ki
1“Manna traitala, warmani yang lawik Dawan lani balna manatayang adika laihta duta yamtanauh, kaput karak ban sangka bang-atnamana data tawan bik nuhni kalnamna yulni data papang yaklauwi muihmanabarak balna kau sau dianin pramis kalahwa dai sauni kidika bik laihta dunamna yulni. 2Manna yamni ismangna aitanauh, manna Papangmana Dawan yaklauwi kauhmak wanilang kau kurih 40, ta naini manaduwi awaihwadai kidika yakat kuduh manna kau traimanatalna dai, ais praisni kat manna kulnamna barangni dutanama dai kidika, rahm palni witing lani balna yulwa yakat yamtanama pa kidika awas kat sip yamtas awanama pa kidika manatalnin yulni. 3Kidika tani naini yakat trabil balna mahni wauhnamana manayamwakat yuh bik wauhna mana, usnit kat manna kau plawar busna manabayahna adika rahmni kidika manna muihmana bararak balna bik tatalwasdai, kidika karak manna kau namangna manin want dai, muih al kidika plawar busna karak manah sangka awas kidika tanka, kaunah sangka atnin yulni Papang tuni kaupak kalahwa yulni balna kidika dakawarang kat.#Mt 4:4; Lc 4:4. 4Adika kauhmak wanilang pas yakat kurih 40 pasyakat manna asmanana balna ātamana kidika daukalwasdai dawi kalmana balna bik bahngwasdai. 5Manna yamni ismangna aitanauh manna Papangmana Dawan yaklauwi manna yakat barangni manayamna kidika sihm papang as walanibis kau barangni kalyamwa kapat.#2 Sam 7:14; Sal 89:32; Pro 3:11-12; Hib 12:5-11. 6Kaput bahang manna Papangmana Dawan lani balna ana yakat laihta yamtanauh, data witing ayangni kidika bik nuhni dulautanauh, data witing yaklauwi ais yamnin mana sumalna yakat yamtanauh. 7Kat Dawan yaklauwi sau yamni yakat manaduwi kiwarang, sau as was murwa kidika manas karang, wastuna balna sau langni kaupak dawak asang balna kaupak bik kalahwa kidika; 8sau as plawar minik kidika manas karang, pan minik satni balna mahni, ani damni panan mahni, olib minik dawi amak bik dahni palni ki. 9Kidika sauni yakat manna kulta kalbautas awanama kasnin dini kidika yulni, di ūk bik awas karang; kimanapala balna yakat ayan yaktanama, dawak bras bik. 10Manna di kasna bitik aitanimana bang kastanama usnit kat, manna Papangmana Dawan ayangni kidika nuhni yamtanauh, witing yaklauwi sau yamni manana kidika yulni.
Papang kau dinitnakahnin awas isningkatna kidika
11“Manna yamni palni ismangna aitanauh Papangmana Dawan damatnakahnin awaski. Warmani witing lani balna yamnin manayulnayang kidika kat yamtanauh. 12Manna bamana manabuhng kasta usnit kat yamni kaldakanama kidika minit yakat yamni yayamna pasyakat awamana mani, 13talnauh, sīpmana balna dawak tumanaruh balna mahni kakalna dawak, golmana lalahmana balna bik sihm kaput kalna, kaput bik laih dimana balna bitik. 14Manna muihmana yakat nuhni kaldakanamna awaski, kaput bik manna Papangmana Dawan Egipto sauni kau muih dini yamyang mana kat manayakna kidika bik damatnakahnin awas ki; 15kat, witing manayakwi ta naini kauhmak wanilang dutni pasyakat, bil, wakurus, was dis pāni yakat bik mana duwi awaihwa dai kidika. Kaunah witing yaklauwi kipala nuhni as kaupak was yakwi manabayahwadai, 16dawi kauhmak wanilang pasyakat kidika, maná dibayahna, muihninabararak balna amanglalawasdai kidika, kaput laih sau yakat lakmukwi traininatalna atnin, kidika laih manna yamni atnamna yulni.#Os 13:5-6.
17“Manna ban bik kulnamna awaski, di balna mahni dutanama kidika bitik manna alas parasmana kau yakta dunamana kaput. 18Kaunah manna Dawan Papangmana kidika ismangnakatnamna ki, witing yaklauwi parasni manana kidika yulni, kaput laih witing manna muihmanabararak balna kau pramis yamna dai kidika kat yamna.
19“Kaunah, Dawan Papangmana kidika damatnakahtanama karang kat, dawak dawan dauh balna ūk usnitna uita prinias yamtanama kat, yang lawik warmani kaupak manayultayang manna laih bitik daunamana karang. 20Kaput bik Dawan yaklauwi daukalna karang, manna bayahtanama tawanni balna bitik yakat, kaput bik manna aslah manalibitwi manadaukalna karang, kat manna Dawan Papangmana yulni lana mana yulni.
Currently Selected:
Deuteronomio 8: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
