Deuteronomio 6
6
La balna kalana kidika
1“Adika kuduh lā balna dawi muih bitik yamnin lani balna ulwi yakna kidika, mana Papangmana Dawan yang kau adar yana manna yakat namangnakatik manasumalna atnik, kaput karak sau manawarang pasyakat yawa adika lani balna kidika laihta yamna atnamna. 2Kaput karak manna Papangmana Dawan ayangni kidika nuhni dulautanama, dawakat manna sangmanaka bitik yakat walamanabis balna dawi mamana balna bitik yakat bik, adika lani balna mana Sumaltayang kidika laihta yamna awanama, kaput karak kurih mahni sangka atnamna yulni. 3Kaput bahang Israel walanbis balna, adika lani balna kidika laihta yamtanauh, kaput laih tamatna yakat yamni yawanama dawi tawan bik nuhni kaltanama, kidika sauni manawarang pas yakat amak dawi tāwas kidika bik sihm was kapat kira kidika, manna muihmanabararak balna Daninawan dawak Papangnina yaklau pramis diyamna dai kaput.
4“Israel dakah: Dawan Papang kidika laih, witing manah aslah ki Dawan.#6.4 Witing manah aslah ki Dawan: wirlana ūk yakat laih aput yulwi: Dawan laih aslah ki.,#Mk 12:29.
5“Man Papangma Dawan yakat dalani talna kulnam bitik karak sangmaka bitik karak dawi parasma bitik karak bik dalani talna.#Mt 22:37; Mk 12:30; Lc 10:27.
6“Man tunama yakat warmani yul mayultayang bitik kidika āta dutah, 7data man walanbis balna yakat bik ma bitik yakat adika yulni balna di yulta awah, uma pas yakat sak awama, tapas yakat likawama, alangwama data lawa bik adika yulni balna kidika di yultah, 8adika lani balna kidika tingma yakat sitta dutah data sapama yakat bik mark as kapat āta dutah, 9data ūma rahni balna yakat ulta datah dūr kawa yakat bik.#Dt 11:18-20.
Moses yaklauwi Israel walanbis balna yakat yul dakanin di yulni
10“Manna Papangmana Dawan yaklauwi mana yamwa kat, muihmana bararak balna Abraham,#Gn 12:7. Isaac#Gn 26:3. dawi Jacob#Gn 28:13. balna kau sau dianin pramis kalahwadai sauni yakat manaāna karang. Adika sauni pasyakat tawan nunuhni dawak tawan yamni bik bangki, dawa kat adika tawanni balna bik manna yamtasmana dai; 11ū yayamni pasyakat di puwi bahngna bangkidika, manna puta bangtasmana; was dunin pāni kuhrna balna kidika bik manna kuhrtasmana dai, dawak wain yamak, olib kidika bik manna dahtasmana dai, kaunah kidika balna kaupak ismangnalak dawarang. 12Kaput kastanama mani manna Dawan kidika datanang kat damatna kahnin awas ki, witing kuduh Egipto sanni yakat muih dini yamyang bangmana dai kaupak mana yakwa dai. 13Manna Papangma Dawan yakat ayangni tanit nuhni yamtanauh dawak witing manah dini yamtanauh,#M t 4:10; Lc 4:8. dawakat pramis as yamnamna karang kat, Dawan ayangni yakat manah yamtanauh. 14Manna yaihmatna kau tawan ūk balna, wayani dauh kau ayangni dulalauwa yakat usnitna uhuiwinih, 15kat manna Papangma Dawan, manna karak kidika, Papang as minit anyang ki, dawak manna namangnakauh kulnin daukalwi manaimuknin sip ki.
16“Kidika bahang manna Papangmana#Mt 4:7; Lc 4:12. Dawan yakat traini tatalwinih, Masah sauni kau yamtadai kapat.#Ex 17:1-7. 17Manna Papangmana Dawan lani balna kidika kat yamtanauh witing yaklau yamnin manayulna kaput. 18Di barangni yakat yamtanauh dawak Dawan minikpa yakat yamni talwa kidika dini yamtanauh, kaput karak manna Papangmana Dawan yaklauwi muihmanabararak balna kau sau dianin pramis kalahna dai sauni yakat āwanamna yulni, 19dawak bik Dawan yaklauwi manna waihmanala balna manna namangna yakat yaklalauwarang mani diyamwak kikirarang, witing pramis yamna kaput.
20“Ma as mani manna walamanabis balna yaklau aput manayulwi dakakawarang: ‘¿Adika lani balna ais tanka yah, mayang Mapapangki Dawan yaklauwi yamnin maiyulna kidika?’, 21mana nangnitnalatanama: ‘Yangna laih Fero dini yamyang yangna dai, Egipto yakat, kaunah Dawan parasni nuhni kau yanalaihwi yakna. 22Mayang palni mamikpa kau di balna mahni yamwa kat talnamayang, dawak Dawan parasni nuhni karak di balna yamwa talnayangna Egipto yakat, dawak Fero niningyakat bik, 23kaunah mayang laih kidika kaupak maiyakna, dawak maiduwi kiuna, mamuihkibararak balna kau sau dianin pramis yamna dai yakat. 24Kidika usnit kat Dawan Mapapangki yaklauwi maipakna lāni balna kidika yulwa kaput yamnikna, dawak bik risnipik kalanin, kaput laih sangkinaka kidika witing yaklauwi maintalna karang, warmani yamwa kaput. 25Dawak lakat yamnin kidika dudarang, adika lāni balna yulwa yakat yamdarang kat, Dawan Mapapangki muhni yakat, witing yaklauwi yamnin maipakna kaput.’
Currently Selected:
Deuteronomio 6: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
