Deuteronomio 17
17
1“Manna Dawan Papangmana yakat, turuh almuk kidika awas bik sīp sakahwa kat sakripais yayamwinih, kat kidika laih dutni talwi.
2“Manna Dawan Papangmana pa manawa kidika, pasyakat lāih kalahwarang kat al, kidika awaskat yal karangpa yamwarangkat Dawan dukih kalawas kidika yamwarangkat, dawak bik aslah kalahna kidika kat bik yamwas karang kat 3dawan dauh yakat minityulwarang limbabahwi, ma yakat karang, waiku yakat, yala balna yakat, dawak kidika kuduh Dawan yaklauwi pakwaski yamna atnin, 4bahang amanglalawarang kat, yamni tanka walwi talnin karang; kaunah tanka walwi tatalwak rahm karangkat, di dutni as Israel pasyakat, 5la muhni yakat duyawanama, dawak daunin yakat wirlana karang, kipala kau barhwi ina karang.#Ex 22:20.
6“Daunin yakat wirlawarang kidika laih witnis bu, kidika awaskat bās kalahwi yuyulwarang kat, kaunah witnis aslah karangkat sip-awas karang daunin yakat wirlana atnin.#Nm 35:30; Dt 19:15; Mt 18:16; 2 Kor 13:1; 1 Tim 5:19; Hib 10:28. 7Witnis balna kidika tatuna kipala ruruhmwarang, daunin yakat wirlana muihni yakat, kidika usnit kat muih balna bitik ruruhmwarang. Kaput laih manna pasyakat dutni sakdai kidika yakpamtanama.#1 Kor 5:13.
8“Muih as lani yamnin uba dadasni karang kat, muih dauna, kalbibilna, muihni yakat dakna karang, kaput bik di ūk bik kalahna karang kat tawanmana nuhni pasyakat, yawanama Dawan Papangmana pa walwi yakna yakat 9dawak sumalyang libait balna karak yulbautanauh, kaput bik wihta yakat kalyultanauh kidika yulni. Kaput laih witingna kidika lani yayamwarang, 10dawak manna laih amput yamnin manayulna yakat yamtanama. 11Yamtanauh amput yamnin manayulna kaput, lani yamna kaput yamnin satuk laih yamnin awaski. 12Kaunah waiskat kulnin parasni yamwi, sumalyang Dawan dini yamyang yaklauwi ais yulna yakat yamwas karang kat, daunin yakat kalwirlana karang. Kaput laih Israel paskau dutni kidika dahn yamtanama, 13dawak tawan muihni balna kidika dakakawarang kat, yamaduwi kulninna dadasni yayamwa kidika dadawarang.
King dunin lani kidika
14“Manna, Dawan Papangmana yaklauwi sau manawarang yakat awanama kat, kalbauta minitbayakta, dawak kidika yakat yalahtanama, dawak yultanama: ‘King as dukih mayawi matakituna kana atnin,#1 Sam 8:5. nisan ūk balna duduwa kapat’, 15manna paskaupak king ātanama Dawan Papangmana yaklauwi yakwarang kidika. Pa ūk muihni kat king ānin awaski, manna paskaupak awaskat. 16Kaunah manna king mana kidika aras mahni dunin awas ki,#1 Re 10:28; 2 Cr 1:16; 9:28. dawak Egipto yakat bik muih sihnin awaski aras kilyang balna kidika baisa mahni dunin, kat Dawan yulna bahang: ‘Watta adika tani munah kaiwinih.’ 17Kaput bik yayal mahni#1 Re 11:1-8. dunin awaski, kaput laih pini ta disnin awaski; kaput bik lalah, gol bik mahni dunin awaski.#1 Re 10:14-22,27; 2 Cr 1:15; 9:27.
18“King kawi parasni duwarang kat, pakwak adika wauhnitaya as ulwi kalalawarang, sumalyang libait balna maintalwi duduwa kidika kaupak. 19Kidika wauhnitaya nining ban kaput duwarang, witing sangka karang mani balna bitik yakat yulwi talnakarang, kaput laih Dawan Papangni yakat risnipik kalawarang, dawak kidika lani balna bitik rispik kalawarang, dawak bik yulwa yakat yamwarang, 20kaput laih witing karak aslah balna kidika minitna yakat tanit kalkulnin awaski, dawak adika lani balna kaupak dawi kalahnin awaski. Kaput laih witing dawak sulani balna bik kingni lani kidika naini karang Israel yakat.
Currently Selected:
Deuteronomio 17: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
