Apastil Balna Warknina 18
18
Pal Kurint yakat
1Kidika usnit kat, Pal kidika Atenas kaupak kalahwi kiuna Kurint yakat. 2Kidika yakat al as kalpakna, ayangni laih Aquila, witing laih Ponto kaupak dai. Baisa apis tanitkauh, Aquila yalni Priscila karak Italia kaupak uina dai, bahang kidika yakat king nuhni Claudio yaklauwi dipakna dai ju muihni balna kidika bitik kalahna atnin Roma kaupak. Kaput laih Pal kiwi ditalna 3dawak, witingna wark yayamwa kidika witing bik yamwādai bahang, kidika laih ū labanni yayamwādai, bahang witing laih kidika yakat watna dai kalpakwi wark yamna atnin. 4Urupnin mani balna kaiwa bitik kidika Pal laih sumamalwa ūni yakat kiwādai, kidika yakat yulbauwādai, bahang witing laih walna amput dawi Ju balna dawak ju balna awas kidika bik wirlanin kidika.
5Sailas dawak Timoti karak uina kat Macedonia yakat, Pal laih sumalnin warkni manah duna dai, kaput laih niningna kana atnin ju balna yakat, Jisas kidika laih Mesías dai kidika. 6Kaunah kidika balna, witing niningkauh yaklalauna, dawak dutni bik kalyuyulna; kaput laih Pal witing prakni kidika isihna, niningna kau yaklauwa kidika tanka, dawi diyulna:
—Distamana kidika laih manna alas pātmana, yang salahki yakat awaski. Warmani kaupak laih yawaki ju balna awas yakat.
7Sumamalwa ūni kaupak kalahwi kiuna, al as ayangni Ticio Justo, kidika ūni yakat, witing laih Papang yakat minityulwādai, dawak sumamalwa ūni kidika yaihnit yakat kāwadai. 8Dawak Crispo, witing laih sumamalwa ūni kidika tanituna dai, walanibis balna bitik, Dawan yakat kulna. Dawak Kurint muihni balna bik manas sumalna kidika dakawi kasak kukulna dawak was utuh'yakna. 9Pukta as kat, Dawan yaklauwi Pal yakat kalyulna amana kapat kaupak: “Yamaduwinih; ban sumaltah, ap dawinih. 10Kat yang laih, mankarak yang, muih as bik dutni mayamwas karang, kat yang tawanki laih nuhni ki, adika tawanni nuhni pas-akat.” 11Kaput laih Pal witing Kurint yakat kurih as minitkau papusbah sakdai, witingna pasyakat Papang yulni sumalna.
12Kaunah, Galión kidika Acaya yakat kabamint kāwa mani balna yakat, ju balna kidika kalpakwi Pal niningna yakat yaklalauna; dawak lā ūni yakat duwi uina 13dawak kabamint tunan muihni yakat kalyuyulna:
—Adika alni laih muih balna yakat kulninna wirlawalikki Papang yakat makatyulnin, kaunah kidika laih lā niningkauh yamwi.
14Pal mahka yulbaukuhtakat, Galión yaklauwi ju balna yakat diyulna:
—Di dutni palni karang kat laih, yang yulni balna kidika dakaki, ju balna mana yakat; 15kaunah yul manah, ayangni manah dawak manna lamana manah bahang, manna silp barangni ātanauh, yang kidika pasyakat āwakih yāwas ki.
16Dawak lā ūni kaupak yakmukna. 17Kaput laih witingna bitik Sóstenes yakat lalaihna, sumamalwa ūnina tunan muihni yakat, dawak kidika pāni yakat babauna, lā yayamwa muhni yakat. Kaunah Galión laih witing kidika kulwasdai, yayamwa kidika.
Pal, Antioquía yakat nawatwi kiwi
18Pal, witing baisa ma manas Kurint yakat watna dai. Kidika kaupak wirah balna yakat paraswi dawi, Priscila, Aquila kidika balna karak kalpakwi kuring yakat kawi Siria sauni yakat uina. Cencrea yakat, baisa kuring yakat kakawas kau, witing basni kidika kahrna, kidika laih pramis as yamna dai#Nm 6:18. kidika yulni yamna. 19Witingna Efeso yakat uina kat, Pal witing didamukna dai Priscila dawak Aquila karak, dawak sumalnin ūni yakat kiuna, bahang kaput laih ju balna kalududuhwa kidika balna karak yulbauna. 20Witingna yaklauwi kalyuyulna baisa watnin kidika pāni yakat, kaunah witing yulwas dana, 21nawatkauh laih diparaswi aput yulna:#18.21 Tingkau ulna balna yakat laih yulwi: Jerusalén yakat atnikki, alasna kaiwa kidika bainah yamnin. “Papang dukih kalawarang kat, wattik aiwik manatalki.”
Kidika usnit kat Pal kuring yakat kawi mahka kiuna Efeso yakat. 22Cesarea yakat kiwi dawi bayakwi kiuna Jerusalén yakat suts muihni balna yakat parasnin yulni, kidika kaupak mahka Antioquía yakat kiuna.
Pal, witing awaihna Galaciadawak Frigia yakat bik
23Ma as as bayakwak, watwi kalahwi awaihna pāni balna kidika as as, Galacia yakat, dawak Frigia yakat bik, kulyang balna kidika bitik kulninna dulauna.
Efeso yakat Apolos sumalwi
24Kidika mani balna yakat, Efeso yakat ju muihni as kiuna ayangni laih Apolos, witing laih Alejandría tawanni nuhni kaupak dai. Witing laih yul bauwi lan palni dai, dawak bik Ulna balna kidika yamni palni amanglawādai. 25Dawan tani kidika yamni palni lankalna dai, Jisas yulni balna kidika lāih yakwi sumalwadai dawak bik sumalkih sumalwādai, Jan was utuh'yakna kidika manah amanglawadai kaunah. 26Apolos witing lāih yulbauna sumamalwa ūni yakat; kaunah Priscila dawak Aquila karak dakakana kat, laihwi duwi uiwi Papang tani kidika yamni palni sumamalna dai. 27Apolos kidika Acaya yakat bayaknin kulna, dawak wirah balna kidika ilp kalalana, dawak wauhtaya as uhulna, kidika pāni kau kulyang balna yakat, kaput laih kiwak yamni kaldunin kidika yulni. Acaya yakat kiuna kat, ilp manas diana, Papang minikun talnin duwa kidika munah kulyang kalalahna balna yakat, 28bahang muih balna bitik muhnina yakat ju balna kulninna lani niningkauh yulna dai, witingna laih tatalwas ki atninna awas yulni, dawak Ulna kidika munah yakwi niningnakana dai Jisas laih Mesías kidika.
Currently Selected:
Apastil Balna Warknina 18: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
