Apastil Balna Warknina 13
13
Bernabé dawak Saulo karaksumalnin warkni kidika duduna
1Antioquía kau suts sakdai kidika yakat prapit as sakdai dawak maestro bik as sakdai. Kidika balna laih Bernabé dawak Saiman (ayangni ūk kidika laih Sani bik kalatwadai), Lucio Cirene kaupak dai kidika, Manahem (Herod karak aslah bararakna dai kidika) dawak Saulo. 2Ma as kat prias yamwabangkat Dawan yakat, dawak bik di kaswas, dawak Spirit Holi kidika yulna: “Bernabé dawak Saulo kidika silp yaktanauh, witingna wark yamnin diyulnayang kidika yakat.”
3Kaput laih, di kaswas dawi minitna yuyulna usnit kat, witingna minitna yakat tingnina yuwi dawak mahka damumukwak uina.
Chipre yakat sumamalna
4Spirit Holi yaklauwi disihna Bernabé dawak Saulo karak, bahang Seleucia yakat uina, dawak kidika munah kuring kau kawi Chipre kalangnisah yakat uina. 5Dawak Salamina yakat uiwi kikilna, dawak mahka sumamalna Papang yulni kidika sumamalwa ūni ju balna duduwadai yakat. Dawak Jan bik witing kiuna tingninasut laihyang as kapat.
6Kalangnisah kidika bitik awaihwi tatalna, dawak Pafos yakat uina, bahang kidika yakat ju al as sakdai kidika laih sukyah, ayangni laih Barjesús, witing laih prapit alas muihni as dai. 7Adika sukyah laih, kabamint tunan muihni Sergio Paulo karak dai, bahang kidika alni laih sinsni sirihni dai. Dawak kabamint muihni kidika yaklauwi diyulna uina atnin, Bernabé dawak Saulo karak, kat Papang yulni kidika dakakihdai bahang. 8Kaunah sukyah kidika, witing ayangni kidika grik kau laih Elimas, bahang witing yulwasdana, kabamint muihni kasak kulwarang kidika yulni tanit dakna. 9kaput laih Saulo, dawak ayangni ūk kidika laih Pal, witing Spirit Holi kidika kalbuhng bahang, witing yakat yamni kaltalna 10dawi kalyulna:
—¡Alas muihni, muih dutni, diablo walanibis dawak di yamni balna kidika bitik niningkauhman! ¿Ampadawak datasmahn, Dawan tani balna barangni kat wirtaman kidika? 11Waralaih Dawan yaklauwi wah mawarang: mamakpa puklakwarang, ma as as, ma yaringni kidika talas awama.
Kidika minitni yakat, Elimas witing minikpa kidika puklakna, dawak muih walna kaldukiuna atnin tingni yakat laihwi, kat minikpa di talwa kalna bahang. 12Kidika talwi, kabamint kidika kulyang kalahna, kat Dawan yulni sumalna kidika yamni palni dai bahang.
Antioquía dawak Pisidia yakatsumamalna
13Pal dawak wanaihni as balna kidika karak Pafos yakat kuring kau kawi Perge yakat uina, Panfilia sauni yakat; kaunah Jan laih nawatwi Jerusalén yakat kiuna. 14Perge kaupak bayakwi Pisidia kau Antioquía yakat uina. dawak kidika yakat urupnin mani#13.14 Urupnin mani: Kidika laih satadi mani. kat sumamalwa ūni yakat uiwi kawi yalalahna. 15Lā balna dawak prapit balna wauhninataya kidika yulwi tatalna usnit kat, sumamalwa ūni tanituna balna yaklauwi diyuyulna uina atnin:
—Wirah balna, manna yul dutamana kat, muih balna kulninna dulaunin, waradika yultanauh.
16Kaput laih Pal yaklauwi, tingni kau sain yamna, witing ap danin, dawak yulna:
—Manna dakanauh, Israel balna, dawak pa ūk muihni Papang yamanidutamana balna kidika bik. 17Israel Papangni kidika yaklauwi mamuihki bararak balna kidika yakwi duna; dawak nisan nuhni yamna, witingna kidika sau ūk muihni kapat yalalahna Egipto yakat,#Ex 1:7. dawak usnit kat, witing parasni nuhni kau, kidika sauni kaupak yakna.#Ex 12:51. 18Papang witing wauhna, witingna dutni yayamna kidika kauhmak wanilang yakat, kurih 40,#Nm 14:34; Dt 1:31. 19dawak nisan tiaskaubu dismukna Canaán sauni yakat,#Dt 7:1. mamuihki bararak balna yakat sau dianin yulni.#Jos 14:1. 20Kidika bitik laih kurih 450 bayakna dai.
“Kidika usnit kat tunan muihni wihta diana,#Jue 2:16. kaput laih prapit Samuel mani balna kat.#1 Sam 3:20. 21Kaput laih witingna king as yuyulna,#1 Sam 8:5. kaput laih Papang yaklauwi Saúl, Cis walanibis kidika king diana, kurih 40, witing laih Benjamín sulani kaupak dai.#1 Sam 10:21. 22Kidika kaupak usnit kat, Papang yaklauwi Saúl pāni kaupak yakpamna,#1 Sam 13:14. dawak Devid kidika king diawi yulna: ‘Isaí walanibis Devid kidika yaknayang, bahang al as yamni talayang, dawak bik yang yulki kat yamnin kulwi.’#1 Sam 16:12; Sal 89:20. 23Sihm adika Devid sulani munah kuduh kaiwi kalahna Jisas, bahang witing kidika kuduh Papang yaklauwi sihna dai Israel kidika laihwi yaknin, witing pramis yamna kaput. 24Jisas kaiwas tanitkauh, Jan laih Israel bitik yakat adika yulni yulwi awaihna, witingna kidika Papang yakat nawatwi ainin, dawak was utuh'kalahnin.#Mk 1:4; Lc 3:3. 25Dawak Jan kidika sangnika witni yakat kaiwakat, yulna: ‘Yang kuduh manna kultamana kidika awasyang;#Jn 1:20. kaunah yang uskit yakat as kaiwi, bahang yang sip-awasyang susni wahni manah bik uluhnik.’#Mt 3:11; Mk 1:7; Lc 3:16; Jn 1:27.
26“Wirah balna, Abraham sulani balna, manna pa ūk muihni balna, Papang yamanidutamana kidika: laihwi yaknin yulni adika laih mayang madiki. 27Jerusalén kau yalalahwa balna kidika, dawak tunan muihni balna kidika, witingna Jisas kidika amangnilawas dadana, dawak prapit balna sumamalwa ūni yakat, urupnin mani kat yulwi tatalwa kidika amanglawas dadana; kaput laih sihm witingna yaklauwi Jisas kidika daunin yakat wirlalana, bahang prapit yulna balna yakat kaiwi kalahna. 28Dawak witing muihni yakat daunin dini as bik disdai kaunah, Pailat yakat papakna īna atnin.#Mt 27:22-23; Mk 15:13-14; Lc 23:21-23; Jn 19:15. 29Ulna yakat, witing yulni yulwa balna kaput kalyayamna usnit kat, pan prihni kaupak lakwi dawi nununa.#Mt 27:57-61; Mk 15:42-47; Lc 23:50-56; Jn 19:38-42. 30Kaunah Papang yaklauwi dauna kaupak dulauna. 31Dawak, ma manas lāih dikalahna dai, kidika balna witing karak Galilea kaupak Jerusalén yakat kalpakwi uina balna dai kidika balna yakat;#Ap.w 1:3. kidika bahang waralaih witingna kidika Jisas witninis balna tawan muhni yakat.
32“Kaput laih, yangna manna yakat manayultayangna adika yulni: Papang yaklauwi pramis yamna dai kidika mamuihki bararak balna dai yakat, 33bahang kaput kaiwi kalahna sulani mayang akat. Kidika laih Jisas dauna kaupak watwi dulauna kidika, salmo usnit kau ulna kaput: ‘Man laih yang Walakibis man; yang warmani mabatahnnayang.’#Sal 2:7. 34Papang, uman yulna dai, dauna kaupak dulauwarang kidika, kaput laih dāwak witing muihni kidika dutlawas karang, ulna yakat yulna: ‘Devid yakat pramis holi dawak rahm balna yamnayang kidika kat yamki ki.’#Is 55:3. 35Kidika bahang pa ūk yakat yulwa kidika: ‘Datangkat dima yamyang holi muihni kidika dutlawas karang.’#Sal 16:10. 36Rahm kidika laih, Devid witing mani balna dai kidika muihni balna yakat dinina yamna dai, Papang yaklauwi pakna kaput, kidika usnit kat dauwi papangni karak kalpapakna, dawak witing muihni nuhni laih daukalna. 37Kaunah, kidika muihni Papang yaklauwi watwi dauna kaupak dulauna kidika muihni laih daukalwasdai. 38-39Kaput bahang, wirah balna, manna amanglanamna ki, dutni dawak disnin kidika laih yulna ki Jisas munah. Witing munah, kasak kukulwa balna kidika dutnina dawak diswi, Moses lāni munah sip dutni dawak disnin lalaihwas dai kidika. 40Bahang amungtalnauh, kaput laih manna mamatna yakat prapit balna uhulna kidika buknin awas yulni:
41‘Talnauh, manna minitdis kultamana kidika,
tala muihsak kapat daka pini distanauh;
kat manna mamana balna yakat sihm kidika dini kapat yamki
manna rahm kultas awanama,
muih as kidika dini manayulwak.’#Hab 1:5.
42Pal dawak wanaihni balna karak sumamalwa ūni kaupak kalalahna kat, diyuyulna dai urupnin mani ūk yakat watwi uiwi kidika yulni yuldibauna atnin. 43Sumamalwa ūni yakat kalududuhna kidika dahn bayak dawakat, ju balna manas dawak ju lanina yakat wiryaklalana muihni balna bik witingna usnit uhuina Pal dawak Bernabé kidika balna yakat. Dawak witingna yaklauwi yul sumamalna, papang dalani kidika kau manayulwak aiwanamana kidika kaput ban awanauh.
44Kidika wīkni bayakwak, urupnin mani ūk kaiwakat, tawan nuhni kidika bitik kapat kalududuhna Dawan yulni kidika dakana atnin. 45Ju balna witingna tatalwak muih mahni kat, witingna minit anwi Pal niningkauh dutni yuyulna. 46Kaput laih Pal dawak Bernabé karak yamaduwas yulbabauna, dawak bik nangnitnalalana:
—Papang yulni sumalnikna kidika yangna warkkina, tatuna kidika laih ju balna mana yakat, kaunah manna ruhmtadatamana bahang, sangka ban atnin kidika sip manna dimana awaski, kaput bahang waralaih ju awas balna yakat yawanaki. 47Kat kaput Dawan yaklauwi yanapakwi yanayulna:
‘Nisan balna yaringnina kapat mahatayang,
kaput laih laihtik yaktayang kidika dutayawah
sau, tanit naikau yakat.’#Is 42:6; 49:6.
48Kidika dakawi, ju awas balna kidika alasna kukulna, dawak bik yuyulna Dawan yulni kidika laih yamni palni ki; kaput laih sangka ban atnin dunin muihni balna kidika laih kasak kukulna dai. 49Kaput laih Dawan yulni laih kidika sauni bitik yakat sumamalna dai. 50Kaunah ju balna yaklauwi yayal kulninna minikun talnin duduwa dawak rispik yayalni balna yakat bik yulbabauna, dawak ahal apis nuhni dikukulwa balna yakat bik tawan nuhni pasyakat, dawak kulninna yakat dutni ahana Pal dawak Bernabé kidika balna niningnakauh yaklauna atnin, kaput laih witingna kaupak kangwiyaknin. 51Kaput laih witingna kalnina kau sau laihna kidika uswi yayakna, kidika muihni balna niningnakauh yaklalauwa kidika yulni,#Mt 10:14; Mk 6:11; Lc 9:5; 10:11. dawak mahka Iconio yakat uina. 52Kaunah kulyang balna kidika laih alasna manah buhngdai dawak Spirit Holi bik.
Currently Selected:
Apastil Balna Warknina 13: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
