Apastil Balna Warknina 10
10
Pita dawak Cornelio
1Cesarea tawanni nuhni yakat al as sakdai, ayangni laih Cornelio, kalbauyang muihni uduhna as ayangni Italiano atwa kidika tanituna. 2Kidika al laih muih kau miniknakun talwadai, witing walanibis balna bitik laih Papang yakat minitna yuyulwādai. Kaput bik laih Ju balna yakat lalah manas laih diawadai, dawak bik Papang yakat minityulwādai nining. 3Ma as kat, ma ulahu, awar bās kapat kat, amana kapat as talna:
Lāih talna, Papang innisal as kiwi kawak witing sakyakat, dawak kalyulna: “¡Cornelio!” 4Cornelio, witing insal yakat talna, yamaduna kaunah ban kalyulwi dakana: “¿Aisyah, Dawan?” Insal yaklauwi kalyulna: “Papang dakawi mamatyultaman balna kidika, dawak muih miniknakunni yakat ilp diataman kidika bik. 5Muih sihtah, Jope tawanni nuhni yakat, dawak duahaiwang al as ayangni Saiman kidika, ayangni ūk kidika laih Pita. 6Witing laih Pita di unitak pauyang ūni, kuma kungkau kidika yakat kawi.”
7Insal yulkalbauna kidika kiuna, dawakat, Cornelio witing dini yamyang balna bu yulwak uina witing yakat, dawak soldado Papang kau kulyang kidika bik, kaput bik witing tanit yamni kulwa balna kidika bik, 8kidika yulni balna bitik diyulwi dawi sihwak uina Jope yakat.
9Kidika payahwak, matunak kat, Jope ulis yakat uiwabangkat, Pita witing ū tuna yakat kilna minityulnin. 10Yuh bahang di kaskihdai, bahang kasnin dini kidika ridi yamwabangkat, amana kapat as talna: 11talwak, makau kisang kidika apahna, dawak sau akat kaiwi bukna, asna panuhni kapat, sipintang arungkapak laihwi lakna. 12Kidika asnina pasyakat kalni arungka duwa balna satni bangdai, dawak bil balna, di lawani balna bik. 13Dawak muih dinit as kalyulwak dakana: “Pita lawah, dawak īta kastah.”
14Pita nangnitlana: “Dikah, Dawan, yang di maisihni kidika kastasyang.” 15Muih dinit yulwa kidika watwi kalyulna: “Papang yaklauwi maisihnidis yamna kidika, man lawa maisihni yulwinih.”
16Adika dini watbās kalahna, usnit kat asna pihni kidika watwi makau kisang yakat kilwi kiuna. 17Pita kulnin abahlna, dawak kulna aisdaih, amana kapat talna kidika, Cornelio muih sihna balna kidika dūr yakat uiwi kakana, Saiman ūni kidika walwi yayakna usnit kat. 18Uiwi kawi, parasni yulwi dakakana, Saiman kidika, kidik ūni yakat kawapa, dawak ayangni ūk kidika laih Pita.
19Pita laih witing amana kapat talna kidika yakat baisa kulwasakkat, Spirit Holi yaklauwi kalyulna: “Talah, muih ahal bās mawawalwi. 20Lawa lakyawah, dawak witingna karak yawah wattaski, kat yang lawik sihnayang bahang.”
21Pita yaklakkiwi ahal balna yakat diyulna:
—Manna waltamana kidika laih yang; ¿ais yulni aiwanamanah?
22Witingna nangnitlalana:
—Kalbauyang uduhna as tanituna muihni Cornelio yaklauwi yanasihna, witing laih lā kat ki, Papang kau minityulwi, bahang witing kidika laih ju muihni balna bitik yamni dalani kaltatalwi. Papang innisal as yaklauwi kalyulna, man kidika mayulwak yawana atnam, kaput laih witing ūni yakat yawa kalyultang dakana atnin.
23Kaput laih Pita yaklauwi diyulwak kawiyaklalana, dawak kidika puknita laih yakat payayahna. Payahwakat, Pita laih kidika balna karak kiuna, kaput bik laih Jope kau yalalahwa muihni balna as as bik laih Pita karak uina.
24Dawak ma as payahwak Cesarea yakat uiwi kakana, bahang kidika yakat Cornelio kidika tahawasakdai, wanaihni balna dawak kaltalyang yamni balna kidika karak kalpakwi. 25Pita, kidika ū yakat kiwi kawak, Cornelio kalahkiwi kalpakna, dawak limbabahna, witing yakat minityulnin. 26Kaunah, Pita laihwi dulauwi kalyulna:
—Lawah, yang bik al as yang sihm man kapat.
27Witing karak yulbabauna, dawi ū pasyakat kawi muih manas talna kaluduhna bangkat. 28Pita yaklauwi diyulna:
—Manna amanglatamana, Ju muihni as kidika, witing daniwan lani yakat dutni kulna ki, muih ūk balna karak kalpaknin, dawak ūni yakat bik kanin. Kaunah Papang yaklauwi nikingkana, yang lawik muih as kau bik kalyulnik awaski maisihni. 29Kidika bahang, isingpapakwa minitni yakat, yang laihwattas aiwanayang. Amanglakih yawi, ais yulni yayultanang aiwanayahng.
30Cornelio yaklauwi nangnitlana:
—Ma arungka dawi, sihm adika awarni, yang ūki akat mikityultasakyang dai maulah awar bās kapat kat, dawak muih al as prakni yaringni kat kaina. 31Dawak yayulna: ‘Cornelio, mamatyultaman kidika Papang dakana, dawak bik isningkatna, muih miniknakunni balna yakat ilp diataman kidika. 32Jope tawanni nuhni yakat muih sihtangkat, Saiman kidika duwi aiwang, ayangni ūk kidika laih Pita. Witing kidika laih Saiman ūk ūni yakat kawi, di unitak pauyang kumakung kau yalahwa kidika.’ 33Kaput bahang sirihni palni sihtangkat uiwi wawalwang, kaput laih man kulnam minikun talnin dutaman bahang aiwanaman. Bahang waralaih mayang bitik bangmayang Papang muhni yakat, dakakih mayawi, Dawan yaklauwi mapakna kidika yultangkat.
Cornelio ūni yakat Pita sumalna
34Kaput laih Pita mahka yulbauna aput:
—Waradika laih amanglatayang rahm palni, Papang laih muih balna yakat satuk satuk ditalwaski,#Dt 10:17. 35angdika ninisan karang bik witing yakat rispik kulwa kidika, dawak bik wark yamni balna yamwa kidika, witing duwi. 36Papang yuldibauna Israel sulani balna yakat, Jisaskrais, muih bitik mayang Madakiwan munah, kulnin aslah yulni balna kidika yulna dai. 37Manna yamni amanglatamana ju balna tawannina yakat ais kalahna kidika, Galilea kaupak, Jan yulna dai, was kalutuh'kalahna atnin kidika. 38Amanglatamana Papang yaklauwi parasni kalana dai, dawak Spirit Holi bik, Jisas Nazaret kaupak dai kidika yakat, kaput laih Jisas kidika siknis balna kaupak dulauna, muih bitik diablo parasni dinit kau dutni wawauhwa dai kidika balna bitik. Kaput yamnin sipdai kat Papang witing karak dai bahang, 39mayang witnis, Jisas yamna balna kidika Judea dawak Jerusalén yakat bik. Kidika usnit kat pan prihni kau pawi ihina. 40Kaunah Papang yaklauwi ma bās kat watwi dauna kaupak dulauna, kaput laih yamwak yangna akat lāih kalahna. 41Kaunah tawan bitik yakat lāih kalahwasdai, kaunah yangna akat manah, Papang yaklauwi muhnilau kau watwi yakna balna dai kidika witnis balna. Yangna witing karak kalpaktik di kasnayangna, dawak bik dinayangna, dauna kaupak yaklauwak usnitkauh. 42Papang yaklauwi, sangka balna dawak dauna balna wihninata āna kidika yaklauwi yanasihna sumalna atnikna tawan balna yakat. 43Prapit balna bitik Jisas yulni kidika yuyulna dai, dawak bik yuyulna dai wais kat witing yakat kulwarang kat, witing munah dutni dawak dis kidika duna karang.
Ju muihni awas balna kidikaSpirit Holi duduwi
44Pita baisa yulbauwasakkat, Spirit Holi kidika kaina, muih balna dakawa bangkidika bitik minitna yakat. 45Ju muihni kulyang balna Pita karak uina dai kidika balna, witingna yamni tatalna dai, tatalna ju muihni balna awas kidika yakat bik Spirit Holi diana kidika, 46muih tuni satni balna kidika yuyulna, dawak Papang ayangni nuhni yayamna. 47Kaput dawak Pita yulna:
—¿Adika muihni balna sip-awas katpah was utuh'yaknin, Spirit Holi duduna kidika mayang kapat?
48Dawak dipakna Jisaskrais ayangni kau was utuh'yaknin. Kidika usnit kat Pita yakat kalyuyulna, ma as as witingna karak watna atnin.
Currently Selected:
Apastil Balna Warknina 10: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
