2 Timoti 1
1
Kalparasnin yulni
1Yang, Pal, Jisas Krais aposnitel, Papang isning lani kat sihna kidika, sangka atnin lani sakkidika kaput Jisas Krais karak aslah, 2adika wauhnitaya maultayang, yang walakibis dalani Timoti,#Ap.w 16:1; 1 Tim 1:2. Papang dawak Madakiwan Jisas Krais karak dalani lani dawak kulnin aslah lani duduwa kidika bik man mamatyakat lalakna karang.
Krais witninis yulnin kidika
3Yang mikit yultayang yakat man yulma isingkatwa mani kat, madah dawak pukta Papang yakat tingkih kalatayang, witing yakat kulnik lani maisihni dis dini yamtayang kidika, yang muihkibararak balna yaklau dini yayamna dai kaput. 4Man mamakwas dai kidika ban isingkatwi, dawak matalnik dukih yawi alasna alahwana atnik yulni. 5Kat isingkatwi man rahm kulnin lani alas lani dis karak dutaman kidika. Tatuna laih man titihngma Loida dawak nanangma Eunice#Ap.w 16:1. karak duduwa dai, dawak yang rahm kultayang man bik dutaman.
6Kidika bahang mayultayang yang tingki balna dulautingkat Papang prisantni kuhpau mana kidika ban dutah. 7Kat Papang laih yamadunin spiritni mayawas ki, kaunah parasni, dalani lani dawak la yamni spiritni kidika mayana. 8Bahang yakasaldinih, Madakiwan ilpni witninis yulna atnin; dawak yang yakat bik nikingkauh yakasaldinih, man yulma silak yakat yang. Baisa yamni ki, Papang yaklau witing parasni mawa kidika karak, laihwi yaknin yulni wauhnin balna kaiwa kidika yakat man bik wauhtah. 9Papang yaklau mailaihwi yakna dawak maiyulna ki masangkika kidika witing dini yakna atnin, mayang yamnamayang kidika yulni laih awas, kaunah kidika dai witing yamnin dini dai kidika dawak Jisas Krais munah dalani maitalwa bahang. Papang witing sau adika baisa kalahwas tanitkau mayang yakat dalani maitalwa kidika, 10waradika witing dalani lani duwa kidika manikingkana, mailaihwi yakyang Jisas Krais kaina kidika yakat, daunin parasni kidika yakat daukalpamna kidika dawak laihwi yaknin yulni kidika yulni, daunin sangnika kidika yaringni yakat yakna.
11Papang yaklau yayulna adika yulni yulna atnik, dawak apostel dawak maestro kapat bik yasihna.#1 Tim 2:7. 12Kidika palni yulni adika dini balna yulni wauhtayang. Kaunah kidika balna yulni asaldasyang, kat yang yamni amanglatayang wais yakat yang kulnik ānayang kidika; dawak yang yamni amanglatayang witing laih parasni duwi kidika mani kat apakna atnin yamnin yayulna dini kidika.#1.12 Yamnin yayulna dini kidika: Y.y. anik pani kidika.
13Yang kaupak sumalna yulni balna yayamni dunaman kidika yakat usnit uitah, dawak rahm kulnin lani dawak dalani lani Jisas Krais kaupak duda kidika yakat yalahtah. 14Mayang yakat spirit yalahwa kidika parasni karak, sumalna yulni yamni Papang yaklau mana kidika maintalah.
15Man amanglataman, Asia sauni sahyakna balna bitik kidika yaruhmwi dadana; kidika balna pasyakat, Figelo dawak Hermógenes kauna. 16Dawan yaklauwi dalani ditalna karang Onesíforo sulani balna yakat, kat witing ma mahni yang yakat ilp yana dai dawak witing yakasaldasdai yang silak yakat tusyang dai kidika yulni. 17Nawatkauh, Roma yakat kiwi kana mani kat yakurupdas palni yawalna dai, yayakna kat. 18Dawan yaklauwi madawakat witing dalani lani kidika yaknaman karang kidika mani yakat. Man yamni amanglataman Efeso yakat ampus ilp mayana dai kidika.
Currently Selected:
2 Timoti 1: SUMU
Highlight
Share
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998