2 Samuel 1
1
Devid dakana Saúl dauna kidika yulni
1Saúl dauwak usnit kat,#1 Sam 31. Devid laih Siclag yakat nawatwi kiwi, amalecita balna yakat minitna bayak dawi,#1 Sam 30. yakat ma bu watna dai. 2Ma bās laihwa yakat Saúl ūni labanni kaupak muih al as kiuna prakni bisna manah, dawak bik tunan yakat sau uhna dai, kulnin dalani wauhwa kidika yulni. Devid muhni yakat kiwi yaklauwi limbabahwi sau kat bukna risnipik nuhni duwa kidika yulni. 3Devid kalyulwi dakana:
—¿Angkaupak aiwamahn?
Al kidika yaklauwi kalyulna:
—Israel balna ūnina labanni kaupak aiwayang irik lawik.
4—¿Bahang ais kalahnayah? ¡Yayultah! —Devid yaklauwi pakna kalyulna atnin.
—Kalbauyang muihni balna kalbabauwak sip awas dawak kikirana, dawak bik manas dauna —al kidika yaklauwi kaput kalyulna— ¡Dawak Saúl bik dauna, walanibis Jonatán bik!
5—¿Amput amanglanamahn, Saúl dawak walanibis Jonatán bik dauna kidika? —Devid yaklauwi kalyulwi dakana, yul duaina muihni yakat. 6Al kidika yaklauwi nangnitlana:
—Kidika yakat yang sakyang dai, Gilboa asangni yakat, dawak talnayang Saúl kidika langnisa kau taihwatna witkat, dawak waihnila balna kārnina kidika dangnit yakat laihnin manah dai. 7Kidika minitni yakat wiryaklawi yatalwi yuyulna yawana atnik witing yakat. Bahang yulwa yakat yamnayang dai. 8Usnitkat yuyulwi dakana, yang adika waisyangpa, dawak nangnitlanayang amalecita muihni as yang. 9Kaput laih yuyulna yaihnit yakat yawinik dawak īna atnik witing yakat kat uman kalsuhna dai, kaput kaunah baisa sangka dai. 10Kaput laih witing yaihnit yakat yawik īnayang, kat amanglanayang, bukna kidika kaupak baisa sangka atnin kidika sip-awas dai bahang. Usnitkat king paknin kidika tunan kaupak yaknayang, dawak tingni kau āwa dai kidika bik yaknayang, man akat duaina atnik, yang dakiwan.#1 Sam 31:1-6; 1 Cr 10:1-6.
11Kaput laih Devid dawi witing karak aslah bangdai kidika balna bik asninana iswi bibisna kulninna dalani kukulwa kidika yulni. 12dawak kakaidana Saúl dawak walanibis Jonatán dauna kidika yulni bik, dawak israel balna sip-awas kalalahna dai kidika yulni bik, kalbauyang balna Dawan dini kidika, dawak maulahu kat yuh wawauhna dai. 13Usnit kat Devid yulwi dakana yul duaina muihni yakat:
—¿Man angkaupakmahn?
Kalyulna:
—Yang laih amalecita muihni as yang.
14—¿Amputdata tingma dulaunamanh king niningkauh, Dawan yaklauwi walwi yakna dai kidika yakat? —Devid yaklau yulna, 15dawak alni balna as yulwak kaiwak yamnin pakna:
—¡Yawa itah!
Kaput laih amalecita yakat tuswi īna, 16Devid yulna:
—Man dautaman kidika laih alas salahma yakat ki; man silp yulma yaknaman, king as Dawan yaklauwi walwi yakna muihni kat īna man kidika.
Saúl dawak Jonatán balna yulnina kaidana
17Devid unbauwi kaidana Saúl dawak walanibis Jonatán karak dadauna kidika yulni, 18dawak pakna Judá muihni balna#1.18 Judá muihni balna: grik kau ulna kidika laih kaput yulwi. Hibru kau laih baisa minitlakwi. yakat niningna kana atnin. Adika kaidana kidika ulna ki la kat wauhnitaya#Jos 10:13. yakat:
19“¡Israel,
alasmana yaksihni kidika kalina asangma balna yakat!
¡Kulninna dadasni duduwa dai kidika amput bubuknayah!
20Gat#Mi 1:10. yakat kalyulwinih,
Ascalón tanipas balna yakat bik yuyulwinih,
filisteo yayalni balna alasna dunin-awas yulni,
dawak kulnin bitik alasna duwi sutninna-awas ki,
Papang kau kulwas muihni balna kidika.
21“¡Manna mamatna yakat baisa buknin-awas ki,
was dawak, diwas bik, kat Gilboa asangni yakat
dadauna sauni#1.21 Dadauna sauni: kaput kapat ulna ki. Hibru kau laih minitdis kalanin dini pāni balna. bahang!
Yakat kalnina kau atatakna
kalbauyang balna nanitna daknin kidika.
Kidika yakat yaringni disna
Saúl nanitdaknin dini duwa dai kidika.
22“Saúl dawak Jonatán witingna kidika watwi aiwasdadana
witingna isninaparah, sīninabang kidik susuihwas laih awas dai,
ānina dawak salanina
kalbauyang balna tanit kulninna dadasni kaupak.
23“Saúl dawak Jonatán witingna balna kidika dalani kaldakakawa dai,
sangka bik, dawak dauna kat bik, kaldak-kalalahwas dai.
¡Kau siririhni dai yakalnuh karak dawakat!
¡Baisa pararasni dai layan karak dawakat!
24“¡Israel walanibis yayal balna, Saúl yulni aidanauh,
asna pauni manah mana-awa dai, asna tanit yamni manah manawadai,
dawak gol kau libitwi yaksihni yamna kidika bik!
25¡Kulninna dadasni balna dai kidika amput bubuknayah,
kalbaunin pāni yakat!
¡Jonatán laih dauna ki
asangma balna tanit maluihni yakat!
26“¡Kulnik kaidana ki man yulma,
Jonatán, yang wirahki!
¡Damni ampus yang niking yakat yāyamnamandaih!
Yang nikingkauh man dalani yatalaman dai kidika minit bayakna
yal kau dalani talnin karak dawakat.
27¡Kulninna dadasni duduwa balna dai kidika amput bubuknayah!
¡Kalbaunin dini balna dai kidika bahwi dis kalna!”
Currently Selected:
2 Samuel 1: SUMU
Highlight
Share
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998