1 Samuel 31
31
Saúl dawi walanibis ahal balna karak kalbaunin pasyakat dadauna
(1 Cr 10:1-12)
1Filisteo muihni balna laih Israel yakat kalbabauna dai, dawak Israel muihni balna laih witingna niningna kaupak kikirana dai, bahang Gilboa asangni yakat laih muih mahni palni dadauna dai. 2Dawak filisteo muihni balna laih Saúl dawi walanibis ahal balna yakat uiwi uinadai, dawak Jonatán, Abinadab dawi Malquisúa yakat ihina dai. 3Usnit kat bitik kalududuhna dai Saúl niningyakat kalbauna atnin; dawak las ruhmyang balna kidika uiwi kalkukuihna kidika yulni uba palni yamaninaduna dai witingna yakat. 4Kaput bahang, tingnisut laihyang muihni kalbaunin dini balna duwalik yakat kalyulna:
—Ismaparah yakta kidika kau yapalatah, adika muihni balna Papang yakat kukulwas balna kidika aiwi witingna yaklau yaiwi nikingkarinin awas yulni.
Kaunah tingnisut laihyang muihni kidika laih yamnin yulwasdana dai, kat uba palni yamaduwadai kidika yulni. Bahang Saúl witing isniparah kidika duwi minityakat bukna dai. 5Dawak tingnisut laihyang muihni kidika talwakat Saúl dauna kat, witing bik sihm isniparah minityakat bukwi witing karak dauna dai. 6Kaput dadauna dai kidika mani yakat Saúl, walanibis ahal balna bāspak, tingnisut laihyang dawak witing ahalni balna bitik. 7Dawak Israel muihni balna asangsar nakaskau dawak Jordán kaupak ma kilwa niningkauh yalalahwadai kidika witingna tatalna dai Israel muihni kalbauyang balna kidika kikirana kat, dawak Saúl dawi walanibis ahal balna kidika bik dadauna kat, witingna bik tawannina nunuhni kidika dawi kikirana dai. Bahang filisteo muihni balna laih kidika tawanni nunuhni yakat ui'watwi yalalahna dai.
8Kidika payahwakat, filisteo muihni balna witingna muih dadauna balna kidika ruhmmukna uiwakat, Saúl dawi walanibis ahal bas kidika kauna dauwi bukna bangkat yayakna dai Gilboa asangni yakat. 9Bahang tunani kidika dakwi dawak kalbaunin dini balna kidika dakyayakna, dawi filisteo sauni bitik yakat yul duwi uiyang muihni balna sisihna dai tawan muihni balna yakat yul kidika diyuyulna atnin daninawan dauh balna ūnina yakat. 10Usnit kat Saúl kalbaunin dini balna duwadai kidika dawan dauh Astarté ūni yakat ahana dai dawak muihni nuhni kidika laih Bet-sán tawanni daklana yakat ilwi alalahna dai.
11Galaad sauni Jabes muihni balna witingna dakakana kat filisteo muihni balna yaklau Saúl ais kalyayamna dai kidika, 12muih ahal kulninna dadasni balna kidika bitik kulninna aslah kalalahna dai, dawak pukta bitik yakat lapapakna usnit kat, Bet-sán tawanni daklana kaupak duduna dai Saúl muihni nuhni kidika dawak walanibis ahal balna muihnina nunuhni kidika bik dawak Jabes yakat nawatwi uiwi busmumukna dai. 13Usnit kat wakalni balna kidika laih Jabes yakat nununadai, pan as dinitkau. Kidika usnit kat ma tiaskaubu di kakaswasdai.
Currently Selected:
1 Samuel 31: SUMU
Highlight
Share
Compare
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
