2 Timoti 4
4
1Papang dawak Jisas Krais muhni yakat bik, alasna yaksihni nuhni karak kaiwarang kidika sihm king kapat muih sangka dawak dauna balna lanina yamna atnin, yamna atnin dini mahni mayultayang 2yul yamni kidika sumaltah, dawak yulnin sip dawak sip awas karang bik baisa diyulma. Kulninna laihtah, dibiltah dawak kulninna dulautah, kulnam laihwatnin karuk disumaltinah. 3Kat mani kiwi kawarang ki muih balna kidika sumalna yamni kidika yulni sip wawauhwas karang ki; baisa kauh, witingna dukih diawa kaput, sumalyang balna mahni wawalwarang witingna dakakih diawa yulni balna kidika manah disumalna atninna yulni. 4Rahm yulni kidika yakat laih dangbabahwarang ki dawak kisi satni balna kidika yakat laih dakakawarang ki. 5Kaunah man laih la yamni ban kaput atnin kidika dutah, wauhnin balna kidika sip wauhtah, yul wisam yamni kidika yultah, warkma kidika yamni yamtah.
6Yang laih uman sakripais yāyamnin kidika ridi yang; daunik awarni kidika uman kaiwi uliswi. 7Kalbaunin yamni kidika kalbaunayang, yawik watnik kidika kat yawik āwanayang, barangni lawanayang dai. 8Waralaih kraun dunik kidika#4.8 Kraun dunik kidika: Y.y. la kat kraunni kidika. tahawi Dawan, wihta la kat kidika yaklau, kidika mani yāwarang kidika. Yang yakat manah laih yawas karangki, kaunah angdika muihni balna dalani lani karuk witing alasnina yaksihni karak kaiwarang kidika yakat tahahawa balna kidika yakat bik diawarang ki.
Pal yaklau muihnina kat katdisumalna kidika
9Traitala sirihni palni aiwa yatalma; 10bahang Demas#Col 4:14; Flm 24. laih, adika sangnika dini balna yakat baisa dalani talwa dai kidika, yaruhmwi yadawi Tesalónica yakat kiuna. Crescente laih Galacia sauni yakat kiuna, dawak Tito#2 Kor 8:23; Gal 2:3; Tit 1:4. laih Dalmacia sauni yakat kiuna. 11Luk#Col 4:14; Flm 24. manah yang karak sakki. Mark#Ap.w 12:12,25; 13:13; 15:37-39; Col 4:10; Flm 24. kidika walta man karak kalpakta aiwah, kat sipki yang nikingyakat ilp as atnin wark yakat. 12Tíquico#Ap.w 20:4; Ef 6:21-22; Col 4:7-8. yakat laih Efeso sauni yakat sihnayang. 13Aiwama mani kat, Troas#Ap.w 20:6. yakat kalmuknik dini datik aiwanayang kidika duaita yama, Carpo ūni yakat; wauhtaya balna kidika bik, dawak sīp almuk unitak balna palni kidika duaita yama.
14Alejandro#1 Tim 1:20. ayan warkni yamyang kidika laih yang karak dutni yamna; Dawan yaklau minit lauwi kalana karang amput yamna kat kaput.#Sal 62:12; Rom 2:6. 15Man bik amung talah witing niningyakat, kat uba palni mayang yul yulda kidika niningkauh yaklauna kidika yulni.
16Tatuna la tunan muihni balna niningna yakat rahmki yulnayang mani kat, muih as bik ilpki kawasdai; bitik yaruhmwi dadana dai. Yang dukih yawi kidika yulni Papang yaklau dawak disna atnin. 17Kaunah Dawan laih rahm ilp yana dai dawak bik parasni yana dai, kaput laih laihwi yaknin yulni yamni kidika witni kat sumaltik yawanayang dai dawak bik yamtingkat Papang yakat kukulwas balna kidika bitik dakakana dai. Kaput laih Dawan yaklau yalaihwi yakna dai layan tinpas kaupak, 18dawak di dudutni balna bitik kaupak bik yalaihwi yakna karang, dawak bik yalaihwi yakwi witing king kāwa lani yakat yaduwi kiuna karang. ¡Witing alasnina yaksihni kidika laih ban kaput karang! Kaput karang.
Witni kalparasnin dawak blisin kidika
19Prisca dawak Aquila#Ap.w 18:2,18. yakat parasnin lani balna, dawak Onesíforo#2 Tim 1:16-17. sulani balna yakat bik. 20Erasto#Ap.w 19:22; Rom 16:23. laih Corinto yakat watna, dawak Trófimo#Ap.w 20:4; 21:29. laih siknis kat datik aiwanayang Mileto yakat. 21Traitala baisa was lauwas kat aiwah. Eubulo, Pudente, Lino, Claudia dawak wanaih balna bitik kau bik parasnin masisihwi.
22Dawan Jisas Krais man karak karang, dawak Papang witing minikun talnin lani duwa kidika manna bitik mamatna yakat lakna karang.
Currently Selected:
2 Timoti 4: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
