2 Samuel 24
24
Devid muih ayangnina āwi
(1 Cr 21:1-17)
1Dawan watwi kulnin daukalna dai israel balna niningna yakat, dawak Devid yakat kulnin dulauna, Israel balna niningna yakat yaklauna atnin, kaput laih witing yakat pakna ayangnina āna atnin, Israel yakat dawak Judá yakat bik. 2Kaput laih king yaklauwi Joab yakat pakna, kalbauyang balna taninatuna nuhni palni yakat, witing karak uina atnin:
—Israel sulani balna bitik yakat awaihta talah, Dan kaupak Beerseba kat, dawak muih balna ayangnina kidika ātah, kaput laih yang amanglanik muih ampus bangkidika.
3Kaunah Joab yaklauwi king yakat nangnitlana:
—King man Damawan dawak Papangma yaklauwi, tawanma muihni balna kidika wat andat minit kau lakwi mana karang, waradika dutaman kidika karak dawakat, kaput bik king man ban sangka awama kidika talna atnam; kaunah ¿king man aisyamta muih balna ayangnina kidika ānin kultaman?
4Kaput kaunah, king yaklauwi pakna kidika Joab yamna atnin dai dawak kalbauyang tunan muihni ūk balna kidika bik, kaput laih Joab dawak kalbauyang tunan muihni ūk balna kidika bitik witingna kalahwi uina dai, king muhni kaupak witingna muih ayangnina āna atnin. 5Jordán wasni dakyaklawi uina, dawak mahka Aroer kaupak sauni langni kau tawan nuhni as pakkidika Gad dawak Jazer niningkauh, kidika kaupak laih muih ayangnina ahana. 6Kidika usnit kat uina dai Galaad dawak Cades yakat, hitita balna panina.#24.6 Cades yakat, hitita balna panina: kaput ulna kidika yamni kapat ki. Hibru kau laih amangladas ki. Kidika kaupak Dan yakat uina; kidika kaupak tilahwi Sidón munah awaihwi bayayakna. 7Kidika kaupak Tiro kau kalbauyang balna ūnina parasni yakat uina, kidika laih heveo dawak Canaán muihni balna yakat tawannina nunuhni, kaput laih ban uiwi Judá wadah nining yakat uiwi kalalahna, Beerseba yakat. 8Waiku tiaskauarungka, minit kau ma 20 kat awaihwi yaklawi dawi Jerusalén yakat uiwi kakana. 9Joab yaklauwi muih ayangnina awi kulna balna numniba kidika king yakat kalana, kaput laih bitik kat, Israel yakat muih war kalbaunin sip balna kidika 800,000 bangdai, dawak Judá yakat laih 500,000 bangdai.
10Kaunah Devid dutni yamna kulna, muih balna ayangnina āna kidika yulni, bahang Dawan yakat lāih kalyulna dai:
—Di dutni as yamnayang, adika dini yamnayang kidika. Kaunah kalma dinit yakat buktik yultayang, Dawan man dima yamyang dutni yamna kidika datang diswang, kat yang laih tapadadas as kapat yamnayang bahang.
11Payahwak mapiris Devid yaklauwak, Dawan yaklauwi prapit Gad yakat kalyulna, ditalyang as Devid dini yamyang dai kidika yakat: 12“Devid yakat yawa talah, dawak kalyulta yang witing yakat di bās duaitayang, bahang as yakwi duwang angdika dukih kalawa kidika, bahang yang yamtik kalanik.” 13Gad kidika Devid yakat kiwi kaltalwi, kalyulwi dakana:
—¿Angdika dukih mawih: kurih tiaskaubu yuh laknin adika sauni akat; kidika awaskat, waiku bās man iralik atnam, waihmala balna mauhuiwa kat, dawak kidika awas kat, ma bās yamah dutni bukna atnin adika sauni akat? Waradika kulta yayulta, bahang yasihna muihni yakat yang yawik kalyulnik ki.
14Devid yaklauwi Gad yakat nangnitlana:
—Dutni palni yang yataihna. Kau yamni ki Dawan tingni yakat bukdarang kat, kat witing dalani lani kidika laih nuhni palni duwi, kaunah muih ahal tingnina yakat buknin laih awaski.
15Kaput laih Dawan yaklauwi siknis dutni as sihna dai, Israel minit yakat, kidika manipiris kaupak ma āna yakat, dawak Dan kaupak Beerseba kat muih tausin 70 muih dadauna dai. 16Insal kidika Jerusalén yakat daukalpamnin manah kat, Dawan kulnin dalani talna daukalna balna kidika yulni, bahang insal muih balna yakat iwalik kidika yakat pakna: “¡Yakat dahnki, baisa yamwinih!”
Kidika minitni yakat Dawan innisal kidika, jebuseo alni Arauna di minik balna unitak yakwa pāni yakat sakdai. 17Devid witing talna dai insal muih iwa kidika, dawak Dawan yakat kalyulna:
—¡Yang kuduh dutni yamnayang kidika! ¡Yang kuduh dutni yamna muihni! ¿Kaunah adika muihni balna#24.17 Adika muihni balna: barangni yuldarang kat adika sīpni balna. laih ais dutni yayamna yah? ¡Yang kalma dinit yakat buktik yultayang, man wah sihtaman kidika yang mikit yakat kalatang kaiwang, dawak bik yang walakibis balna minitna yakat bik!
Devid sakripais busnin pāni as yamwi
(1 Cr 21:18-27)
18Kidika mani, Gad kiwi kaltalna Devid yakat, dawak kalyulna sakripais busnin pāni as yamna atnin Dawan dini, jebuseo muihni Arauna di minik balna unitak yakwa pāni dai yakat. 19Kaput laih, Devid witing kiwi yamna dai, Dawan yaklauwi Gad yakat pakwak kalyulna kaput. 20Arauna kidika laih naikau talwa sakdai, king dawak dini yamyang balna karak witing yakat uiwa kidika. Kaput laih Arauna yaklauwi niningtani kauh kiwi king muhni tani yakat abuk danadai 21dawak kalyulna:
—¿King man aiskat aiwa kaltalaman man dima yamyang akat?
Devid yaklauwi nangnitlana:
—Man di minik unitak yaktaman pāni adika bakankuhtiang, kaput laih adika pāni akat Dawan kau sakripais busnin pāni as yamnik, kaput laih siknis kidika tawan paskaupak kalahwi kiuna atnin.
22Arauna yaklauwi nangnitlana:
—Dutah king man amput yamni talaman yakat, dawak karauni kauna sakripais bustah. Akat turuh ahalmuk bangki karauni kauna sakripais busnin dini, dawak di minik unitak yakwa dini kidika dawak turuh arangnina yakat pan sitwak mumurwa balna pananina bik bangki, kuh dunam karangkat. 23¡Adika bitik man yakat matayang king!
Dawak baisa minit yakat Arauna aput yulna:
—¡Yamni karang king man kidika Dawan kulnin yakat yamni yamna kat!
24Kaunah king yaklauwi nangnitlana:
—Tingkih matian, kaunah adika dini balna bitik laih bakannik ki, man yakat lautik maki minit ampus kidika, bahang yang diki awas kidika laih Papangki Dawan yakat sakripais karauni kauna bustik kalatas awaki ki.
Kaput laih Devid yaklauwi bakanna dai kidika pāni, dawak turuh ahalmuk balna bik lalah andat papusbah minit, 25dawak kidika pāni yakat sakripais busnin pāni as yamna dai Dawan kau, dawak busna dai biri biri madutki dādak disnin yulni sakripaisni kidika. Kaput laih Dawan dakana dai muih balna yuyulwa kidika, dawak siknis dutni kidika mahka yakna dai kidika Israel pāni kaupak.
Currently Selected:
2 Samuel 24: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
