2 Kurint 2
2
1Kidika yulni yang wattik yawik manatalas danayang kulnamna bukwas atnin yulni. 2Kat yang lawik manayamtingkat kulnamna bukwa kat, ¿wais yaklau yayamwakat alasna awakiyah, manna awas kat, yang lawik kulnamna laknayang kidika? 3Kidika bahang amput yamnayang dai kat kaput wauhtaya manaulnayang, kat yang dukih yawas dai yawingkat manna lawa kulnik laknamna kidika, alasna yayamnamna pāni yakat. Yang barangni kulnayang dai yang alaskina kidika laih manna dimana yamtanama kidika, 4kaunah adika wauhnitaya manaulnayang mani kat, kultik kalbaunayang dai dawak bik kulnik bukwakat aidayang dai. Kaput bik, kulnamna laknik yulni manaultasyang dai, kaunah manna amanglana atnamna yang lawik manna yakat dalani manatalayang kidika.
Wais Pal niningyakat dutni yulna daikidika dutni dawak disnin
5Muih as yaklau kulnin laknin lani yamna kat, yang yakat manah yayamwas ki, kaunah di as as yakat manna bitik yakat bik ki. “Di as as yakat bik ki” yultayang minitbayak yulnik awas yulni. 6Kidika muihni yakat manna bitik lawa wah kalanamana kidika laih kamanah aitani ki. 7Waradika yamnamna kidika laih dutni datanang disnin dawak ilp kalana atnamna, uba kulnin bukwa kat isning abahlnin awas yulni. 8Kidika bahang kalmana dinit buktik manayultayang dalani kaltalamana kidika watta niningkatanauh. 9Muhnilau kau adika yulni manaulnayang dai, manatalna atnik yulni rahm manasumalnayang balna kidika kat yamtanamapa. 10Kaput bahang angdika muihni yakat manna lawa dutni datanangkat diswarang kidika, yang lawik bik dutni dating diswi. Dawak dutni dating diswarang, dutni dawakat disnin dini duwadai kat, manna yakat manakultayang kidika yulni dawak bik Krais muhni yakat. 11Kaput laih sitan kidika mayang kaupak di as yakwas karang, kat witing kulnin lani dutni balna kidika laih yamni amangladi.
Troas yakat Pal yamni kaldakawas kidika
12Troas tawanni nuhni yakat Krais yulni yamni kidika sumalna yawik āwanayang mani kat, dūr balna kidika apahna dai Dawan warkni balna kidika yamna atnik yulni. 13Kaunah kulnik kidika laih yamni awasdai, kat wirahki Tito kalpaktasyang dai kidika yulni. Kidika yulni witingna kaupak alahwik Macedonia yakat yawanayang dai.#Ap.w 20:1.
Krais yakat minit bayaknin lani
14Papang yakat tingkih, witing yaklau Jisas Krais minit bayaknin niningyakat maiduwi kiwa kidika#2.14 Witing yaklau...maiduwi kiwi kidika: wirlana ūk yakat laih aput yulwi: Jisas Krais karak aslah maiyamwakat minitbayakdi. dawak mayang munah witing yulni muih balna yakat diyulwa kidika, kidika yulni laih pa balna bitik yakat rawi kiwi sihm wayani yamni as kapat. 15Kat yangna laih busnin dini walapni kapat yangna Krais yaklau Papang yakat buswi kalawa kidika, dawak laihwi yakwa muihni balna pasyakat dawak didiswa muihni balna pasyakat bik rawi kiwa kidika kapat. 16Didiswa balna kidika niningna kauh laih, adika busnin walapni adika daunin wayani as kapat ki, kaunah dilaihwi yakwa balna kidika niningna kauh laih, walapni yamni as sangninaka diawi. ¿Dawak wais sipyah adika dini yakat? 17Yangna laih Papang yulni kidika lalah yulni yamtasyangna, muih mahni yayamwa kapat; nawatkauh, Papang muhni yakat alas lani dis yulbautayangna, witing yaklau yanasihna kapat dawak bik Krais karak aslah alahwanayangna kidika yulni.
Currently Selected:
2 Kurint 2: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
