2 Crónicas 9
9
Sabá kingni yal kidika Salomón yakatkiwi talwi
(1 Re 10:1-13)
1Sabá kingni yal#Mt 12:42; Lc 11:31. witing dakana Salomón ayangni nuhni dulauna kidika, bahang witing Jerusalén yakat kiuna yulwi dakanin dadasni balna kalyulwi dakana atnin. Witing kiuna kidika laih di yayamni yaksisihni manah awaihdak kiuna, kiamil balna kidika dia walapni satni balna kidika trukwi uina, gol dawak kipala minit nunuhni kidika mahni palni duwi kiuna dai. Witing Salomón nuhni yakat kiuna kat ais yulwi dakanin kulna kidika bitik kalyulwi dakana, 2dawak Salomón yaklauwi biriwi bitik nangnitlana. Yulwi dakana balna kidika as bik laih sip-awas awasdai nangnitlana atnin. 3Sabá kingni yal kidika talna Salomón sinsni nuhni kidika, dawak king ūni bik pakna kidika, 4tinibil yakat kasnin dini auhni balna lakna kidika, dawak kalbauyang balna taninatuna pāni kidika bik amput kidika, dini yamyang balna praknina kidika dawak tibil yakat wain utuhwi ilyang balna praknina bik dawak, amput makatyulnin ūni yakat kilwi kiwa dai kidika bik,#9.4 Amput makatyulnin úni yakat kilwi kiwa dai kidika: kaput wirlana kidika yamni kapat ki. Aput satuk wirlanin sip kidika: makatyulnin úni yakat sakripais karauni kauna buswadai kidika (talah 1 Re 10:5). bahang kidika balna bitik witing niningyakat taldas dini talna 5bahang king yakat kalyulna: “Yang sauki yakat dakana yang dai kidika man sinsma nuhni dutaman yulni kidika laih rahm palni ki; 6kaunah yang kidika rahm kulnik sipdai, yang palni aiwik mikpa kau talikda bahang. Di rahm palni kidika laih man sinsma nuhni kidika papuswayah bik yāyuyulwasdai, kat yang dakana yang kidika minit yakat bayaknaman. 7¡Ampus isningnalakpa man yalma balna#9.7 Man yalma balna: kaput ulna kidika yamni kapat ki (talah 1 Re 10:8). Hibru kau laih yulwi man alma balna. kidika, dawak man dima yamyang balna kidika ampat isningnalak dakakawapa, kaput ban man yaihmat yakat sinsma lani nuhni kidika dakawi! 8¡Man Papangma Dawan kidika ayangni yamni kalyulna karang, man yakat yamni matalwi, witing tronni minityakat mailna, kingni atnam yulni! ¡Man Papangma dalani talwa kidika Israel, dawak parasni yamnin yulni, man kidika king mahana kidika minit yakat, man barangni la kat king awana atnam yulni!”
9Kidika usnit kat, yal kidika yaklauwi king yakat kalana gol manah paun 7,920, dawak kahnin walapni bik mahni dawak kipala minit nuhni balna kidika bik. Israel yakat laih wat as bik kiwi kawas dai kahnin dini walapni mahni kapat, Sabá kingni yal yaklau king Salomón yakat kalana kapat.
10Kidika minit yakat, Hiram dini yamyang balna dawak Salomón dini yamyang balna karak kalpakwi Ofir kaupak gol duwi aina dai, dawak kidika minit yakat sándalo panan, kipala minit nuhni bik duwi uina dai. 11Sándalo panan yakau king yaklauwi Dawan kau makatyulnin ūni dawak king ūni kau ta kilitna balna kidika yamna dai, dawak kaput bik laih paswi yakisdinin dini balna bik yamna dai, unbauyang muihni balna kidika yus yamna atnin yulni. Judá sauni yakat kidika satni dini balna kidika watas bik tatalwasdai. 12Biriwi, king Salomón yaklauiwi Sabá kingni yal yakat kalana dai, witing ais dukih kalana kidika bitik, witing di duaiwi kalana dai kidika minit biriwi kalana dai kidika minit yakat.#9.12 Witing di duaiwi kalana...kidika minit yakat: kaput wirlana kidika yamni kapat ki. Hibru kau laih amangladas ki. Kidika usnit kat Sabá kingni yal kidika mahka witing sauni yakat nawatwi kiuna dai witing dini yamyang balna karak kalpakwi.
Salomón ayangni nuhni dawakritsni balna kidika bik
(1 Re 10:14-29; 2 Cr 1:4-17)
13Salomón kurih kaiwa bitik yakat gol duwadai kidika laih tausin 22 kilo dai, 14di wauhwi bakanyang balna dawak pa ūk kaupak aiwi bayayakwa kidika tunan minit lalauwa kidika balna laih bahawi kulwas dai. Kidika minit yakat Arabia kingni balna, kidika sauni kabamintni balna yaklauwi gol dawak lalah duahaiwi kalalawadai Salomón yakat. 15King Salomón yaklauwi pakna dai kalbauyang balna tanitna daknin dini nunuhni gol kau manah 200 yamna atnin, bahang nanitdaknin aslah yakat gol manah paun 12 āna dai. 16Kaput bik pakwakat tanit daknin dibinina kidika andat bās yayamna dai; bahang kidika aslah gol kilo bās minit yakau apis āna dai, dawak kidika dini balna laih king ūni “Líbano asangni pas” ta kidika watakni yakat lakna dai. 17Kaput bik pakwakat trun nuhni as yayamna dai, marfil kau, dawak dipakna gol kau manah kahna atnin minit yakat. 18Tronni kidika kilitna tiaskauas duwa dai, kilitna as kidika laih gol manah dai, dawak yalahnin sinini tingni taihnin dini balna kidika pirini nabupak duwa dai, kidika yaihnit yakat layan bu yaklauna raudai. 19Kaput bik layan ūk salap minitkau bu kidika balna bik bangdai yaklauna, ta kilitna tiaskauas kidika pirini nakaskau as as yaklalauna bangdai. ¡King sauni ūk balna yakat kapat as bik yayamwas dai! 20Kidika minit yakat, king sūnitak balna kidika bitik laih gol manah dai, kaput bik king ūni ayangni “Líbano asangni pas” ta kidika paskau di yusyamwa balna kidika bitik laih gol manah dai. Lalah kau di yamna balna kidika laih as bik disdai, kat Salomón mani balna yakat lalah kidika minit nuhni kulwas dai bahang, 21kat, king kuringni nunuhni balna kidika Tarsis yakat uiwa dai Hiram dini yamyang ahalni balna kidika, kurih bās pasyakat wat as, bahang kidika yakaupak duahaiwadai, gol, lalah, marfil, urus dawi pikak balna bik.
22King Salomón kidika sau bitik kingni balna minitna bayakna dai, ritsni dawak sins kidika bik. 23Sau bitik kingni balna kidika witing yakat talkih diawadai, dawak Papang yaklauwi sinsni nuhni kalana kidika yulbauwak dakana atnin, 24witingna bitik laih kurih kaiwa balna yakat minitdis kalanin dini as uiwi kalalawadai: lalah kau, gol kau di yamna balna kidika, kalmuknin asnina, kalbaunin dini, wasni walalapni balna, aras dawak muyul bik.
Salomón witing wauhwi bakannakār dawak aras bik
(1 Re 10:26-29; 2 Cr 1:14-17)
25Salomón duwa dai aniras balna payayahwa pāni tausin arungka, witing aniras balna panina dawak kār balna bik, dawak aras kilyang balna kidika tausin ,#1 Re 4:26. bahang kidika balna laih sihna dai kalbauyang balna ūnina pararasni yakat, dawak kalbauyang muihni balna king yaihnitkau duwasak kidika Jerusalén yakat, kidika balna yakat sihna dai. 26Salomón laih parasni tanit duwa dai, Eufrates wasni kaupak filisteo balna saunina kat, kidika kaupak Egipto sauni kat,#Gn 15:18; 1 Re 4:21. kidika sauni balna pasyakat king balna bangdai kidika bitik minitna yakat tanit parasni dai. 27King yaklauwi yamna dai, Jerusalén yakat lalah manas atnin, sihm kipala kapat;#Dt 17:17. kaput bik laih suhun kidika bik manas atnin sihm ani damni panan asangpas kau kapat. 28Salomón aniras balna kidika Muzri#9.28 Muzri: kaput ulna kidika yamni kapat ki. Hibru kauh laih yulwi Egipto. dawi sau ūk mahni kaupak bik duahaiwadai.#Dt 17:16.
Salomón dauna
(1 Re 11:41-43)
29Salomón yulni umani balna kidika tatuna kaupak witni kat kidika, prapit Natán ulna wauhnitaya yakat ulna bangki, prapit Ahías, Silo kaupak dai kidika yulna balna yakat, dawak kaput bik prapit Iddo lāih yakwi yulna balna dai kidika walanbis al Jeroboam yulni. 30Salomón witing king kana Jerusalén yakat, dawak baisa king kana kidika laih Israel minit yakat, kurih 40, 31witing dauwakat Papangni Devid sauni yakat nununa. Witing usnit yakat, walanibis al Roboam kidika king kana dai.
Currently Selected:
2 Crónicas 9: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
