2 Crónicas 36
36
Joacaz king kana
(2 Re 23:31-35)
1Tawan muihni balna kidika Josías walanibis Joacaz yakat laihwi duduna, dawak Jerusalén yakat king ahana, witing papangni pāni yakat. 2Joacaz, witing king kana kat kurih 23 duwadai, dawak Jerusalén yakat waiku bās king kana. 3Egipto kingni yaklauwi tronni kaupak lakpamna Jerusalén yakat, dawak kidika sauni yakat tunan minit launin pakna dai, lalah kilo tausin bās minitkau andat bās, dawak gol kidika laih kilo 33. 4Kidika minit yakat Egipto kingni yaklauwi Judá dawak Jerusalén kidika balna yakat king āna dai Joacaz wirahni Eliaquim, dawak ayangni satuk paknadai Joacim, dawak Joacaz laih laihwi Egipto yakat duwi kiuna.#Jr 22:11-12.
Joacim king kana
(2 Re 23:36—24:7)
5Joacim#Jr 22:18-19; 26:1-6; 35:1-19. kurih 25 duwa dai, dawak Jerusalén yakat kurih 11 king kana. Kauna witing di yamna balna kidika Daniwan Papang minikpa yakat dutni manah dai. 6Babilon kingni Nebokatnesar, witing niningyakat#Jr 25:1-38; 36:1-32; 45:1-5; Dn 1:1-2. kiwi, bras sīnni kau sitna dai Babilon yakat duwi kiuna atnin. 7Nebokatnesar yaklauwi Babilon yakat duwi kiuna, Dawan ūni kau di duduwa dini balna kidika buas, dawak babilon kau minitnayuyulwa ūni yakat āna dai.
8Joacim yulni umani balna kidika, di dutni balna yamwak witing yakat kalahna balna kidika laih ulna ki Israel dawak Judá kingni balna wauhninataya yakat. Dawak witing pāni yakat walanibis Joaquín king kana dai.
Joaquín kidika laihwi Babilon yakatduwi uiwi
(2 Re 24:8-17)
9Joaquín witing kurih 18 duwa kat king kana, dawak Jerusalén yakat waiku bās minitkau ma salap king kana. Kaunah witing di yamna balna kidika dutni dai Dawan minikpa yakat.
10Kidika kurihni madaihwa yakat, king Nebokatnesar yaklauwi pakna duwi kiuna atnin Babilon#Jr 22:24-30; 24:1-10; 29:1-2; Ez 17:12. yakat, Dawan ūni kau di balna tanit minit nuhni kidika balna karak, Judá dawak kingni āna, dawak Jerusalén kingni laih Sedequías kidika āna dai, Joaquín wanaihni balna.#Jr 37:1; Ez 17:13.
Sedequías king kana
11Sedequías#Jr 27:1-22; 28:1-17. kidika kurih 21 duwa kat king kana, dawak Jerusalén yakat kurih 11 king kana dai. 12Kaunah witing yamna balna kidika Papangni minikpa yakat dutni manah dai. Prapit Jeremías niningyakat bukwas dai, Dawan yaklauwi pakwak yulwa kidika.#Jr 37—39. 13Kidika minit yakat Nebokatnesar#Ez 17:15. niningyakat yaklauna, witing yaklauwi Papang ayangni kau yakwi kalyulna dai kidika, witing laih witingna karak aslah karangki kalatna dai kidika, kulnin dutni kidika yulni laih Dawan yakat kiwas dana, Israel Papangni yakat.
14Judá tunan muihni balna bitik bik, sumalyang balna,#36.14 Judá tunan muihni balna bitik, sumalyang balna: grik kau ulna kidika kaput yulwi. Hibru kau ulna kidika laih yulwi sumalyang balna taninatuna. dawak tawan muihni balna bik witingna barangni awas kidika minit bayak yayamna, nisan Papang tatalwas balna dutni yayamwa kidika usnit uhuina, dawak Dawan ūni kidika risnipik dis yayamna, witing yaklauwi pa as holi kat walwi yakna dai kidika Jerusalén yakat. 15Dawan, muihninabararak balna Papangnina kidika wat yul sihna dai yul duwi uiyang muihni balna munah, kat witing tawanni kidika dalani talwadai bahang, dawak witing pāni kidika bik. 16Kaunah witingna niningnakakarana dai Papang yulni duwi uiyang muihni balna yakat, isningnapakwa kidika bik dauh kukulna, dawak pranipit balna kidika yakat sarahni ditatalna, Dawan kulnin daukalna kidika sahna kat witing tawanni niningyakat, sinika as bik disdai.
Makatyulnin ūni kidika daukalpamna,dawak Judá kidika laihwi duwi kiuna sau ūk yakat
(2 Re 25:8-21; Jr 39:8-10; 52:12-30)
17Kaput laih Dawan yaklauwi yamwak caldeo balna#Jr 21:1-10; 34:1-5. kingnina kidika witingna niningna yakat kiuna, wawahma balna kidika bitik laih kuhbil kau īna, makatyulnin ūnipas palni yakat, wawahma dawak sirarau balna kidika yakat miniknakun bik talwas dai, muihbararak balna dawak sakahwa balna kidika bik. Dawan yaklauwi bitik palni tingni yakat āna dai. 18Papang ūni kau di dunin dini balna kidika bitik, nunuhni dawak dibinina bik, dawak makatyulnin ūni lalahni, king lalahni dawak kabamint warkni yamyang balna lalahnina kidika bitik laih caldeo balna kingnina duwi kiuna Babilon yakat. 19Kidika minit yakat Papang ūni kidika bubusna,#1 Re 9:8. dawak Jerusalén daklana balna kidika tuklalakna, king ūni kidika kuh kau bubusna, dawak di minit nuhni balna kidika bitik laih daukakalna.
20Kidika usnitkat Babilon yakat yakwi duwi kiuna, ihiwas dawak yaklalana balna kidika, kidika yakat warau lani yakat bubukna, walaninabis balna bitik, Persa kingni nuhni kidika kilna kat, 21Papang yaklauwi prapit Jeremías munah yulna kidika yakat kaikalahna kat. Kaput laih kidika sauni wingnita puhnin dai; kat bahwidis yamna kidika mani balna bitik yakat wingnita puhna dai bahang, kurih 70 bayakna kat.#Jr 25:11; 29:10; Zac 1:12.
Ciro lā āna
(Esd 1:1-4)
22Ciro king kana kurihni tatuna yakat, Persia kingni, Dawan yulni Jeremías munah yulna kidika kat kalahnin yulni, dawan yaklauwi Ciro kulnin dulauna witing king kawa sauni bitik yakat la āna atnin, yul kau bik dawak ulna kau bik adik lani: 23“Ciro Persia kingni, adika yultayang: Dawan, kisang kau Papang kidika yaklauwi sau akat king balna kidika bitik tingki yakat āna, dawak yapakna Jerusalén#Is 44:28; 45:1-4. yakat makatyulnin ūni as paknik, kidika laih Judá sauni yakat ki. Kaput bahang manna pasyakat Dawan tawanni kidika muihnimana kat, Dawan manna Papangmana kidika ilp manawang, dawak kidika yakat yawanauh.”
Currently Selected:
2 Crónicas 36: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
