2 Crónicas 25
25
Amasías king kana
(2 Re 14:1-22)
1Amasías kurih 25 duwa kat king kana, Jerusalén yakat kurih 29 king kana. Witing nanangni ayangni laih Joadán, bahang witing laih Jerusalén kaupak dai. 2Amasías di yamwa balna kidika Dawan minikpa yakat barangni dai, kaunah kulnin bitik palni laih barangni yamwas dai.
3Amasías kidika parasni duna kat, tunan muihni balna papangni ihina kidika balna laih bitik imukna dai. 4Kaunah kidika balna walaninabis laih iwasdai, kat Moses lani balna yakat ulna kidika Dawan yaklauwi aput pakna dai: “Papangnina balna kidika sip daunin yakat wirlawas karang walaninabis balna yayamna kidika yulni, dawak walaninabis balna yayamna kidika bik papangnina yakat wirlawas karang, kaunah muih bitik laih silp dutni yamna kidika yulni dauna karang.”#Dt 24:16; Ez 18:2-4.
5Amasías yaklauwi Judá dawak Benjamín ahalni balna bitik uduhna dawi witing yaklauwi tunan āwi dana dai, sulani balna bitik tunanina yakat, kalbauyang tunan balna kidika. Kidika usnit kat ayangnina āna muih kurih 20 kaupak minitkauh duduwa balna kidika bitik, bahang kaput laih bangdai kidika satni muihni balna kidika tausin manah 300 kalbauyang balna walwi yakna kidika, kidika balna laih ridi dai wār kau kiunin dawak langsa bik ruhmwi lan balna kidika dawak nanitna daknin bik yusyamwi lan balna kidika. 6Kidika minit yakat Israel kaupak kalbauyang muihni balna tausin manah 100 kidika witing duna dai, dawak lalah laih kilo tausin bās minit kau 300.
7Kaunah Papang alni as witing muhni yakat kiwi kalyulna:
—King, man Israel muihni kalbauyang balna karak kalpakwinih, kat Dawan laih Israel karak awaski, Efraín muihni balna bitik kidika karak. 8Kaunah man kalbauyang balna dutaman kidika parasni yamnin kulma kat, kidika balna ilpni kau,#25.8 Kidika balna ilpni kau: kaput ulna kidika yamni kapatki. Hibru kau laih amangladas ki. dawak kaput wār kau yawama kat, Papang yaklauwi yamwak waihmala muhnit yakat bukma, kat Papang laih parasni duwi ilp kalanin, dawak bik tukwi laknin.
9Amasías yaklauwi, Papang alni yakat kalyulwi dakana:
—Kaunah, ¿bahang ais kalahwarang yah, Israel muihni kalbauyang balna yakat lalah kilo tausin bās minit kau andat bās dianayang kidika?
Papang alni kidika biriwi nangnitlana:
—Dawan laih mahni palni duwi, kidika kaput minit yakat manin.
10Kaput laih Amasías yaklauwi yamna, Efraín kaupak kalbauyang muihni balna aina dai kidika sahwi kalahwi mahka ūnina atnin. Kaunah witingna Judá niningyakat kulninna daukakalwa dai, dawak kulninna daukalwi mahka nawatwi ūnina kau uina dai.
11Amasías kulnin dadasni yamwi, kalbauyang muihni balna duwa kidika Kuma Sauni Langni yakat duwi kiuna, dawak yakat Seir ahalni balna tausin salap īna dai. 12Kidika minit yakat, Judá balna yaklauwi tausin salap sangka lalaihna, dawak asang nunuhni kipala manah balna yakat duwi uiwi kidika kaupak tuk'ahana, bahang kaput laih dadauna bitik.
13Kaput laih Amasías yaklauwi kalbauyang muihni balna duwa kidika ūk balna karak kalpapakwas dai kidika muihni balna laih nawatwi uiwi Judá tawanni nunuhni balna kidika Samaria kaupak Bet-horón kat, muih tausin bās ihina, dawak di mamalna balna kidika mahni laih duwi uina dai.
14Amasías kidika Edom yakat minit bayakwi dawi nawatwi kaina yakat duaina dai Seir kaupak dawan dauh wayani as, dawak kidika yakat minit yulwi dawak walapni bik buswa dai. 15Dawan witing Amasías niningyakat kulnin daukalna, dawak prapit as sihwak kalyulnin:
—¿Ampadawak nisan ūk balna daninawan dau yakat kulnam wirlanamahn, kat kidika yaklauwi witingna yakat man kaupak dilaihwi yakwas dai kidika?
16Prapit yaklauwi kidika yulni yulwak, king yaklauwi biriwi kalyulna:
—¿Man kidika king yakat yul sumalnin maahana katpah? ¡Yulni yultaman kidika datah! ¿Dukih mawih mai-ihiwarang kidika?
Prapit baisa yulwasdana, kaunah yulna:
—Yang amanglatayang, Papang yaklauwi yulna madispamna atnin, adika yamnaman yulni, yang yul mayulnayang kidika dakasdata.
17Kaunah Amasías, Judá kingni kidika, muih ūk balna yulnina laih dakana dai, dawak yul kalsihna Israel kingni yakat, Jehú mani, Joacaz walanibis Joás yakat: “Aiwah, kaput laih biri biri mamuihki taldarang.” 18Kaunah Joás yaklauwi biriwi aput yul kalsihna: “Pan wakal kidika yaklauwi Líbano suhunni yakat kalyulna: ‘Man walambis yal kidika walakibis al yakat kalatah kaput laih witing yalni karang’. Kaunah kidika yakat di anyang as yakut bayakwi wakal kidika taihwi labanpamna. 19Man yultaman, Edom muihni balna yakat minitna bayaknaman, dawak kidika yulni laih man manah kapat kaldakaman, dawak baisa rismapik nuhni dulaunin kidika waltaman. Kaunah baisa yamni ki ūma yakat wattah. ¿Ais yamta man alas daukalnam kidika waltaman, dawak Judá yakat bik dutni kalnin kidika waltamahn?”
20Kaput kaunah, Amasías yaklauwi yulni kulwasdai, kat Papang yaklauwi kaput yamwi Joás tingni yakat ānin yamna bahang, Edom muihni balna daninawan dau yakat wawalna kidika yulni. 21Kaput laih Joás kidika kalahwi kiuna Amasías niningyakat kalbauna atnin yulni, Bet-semes yakat, kidika pāni laih Judá sauni yakat pakki. 22Bahang Judá laih Israel yaklauwi minit bayakna dai, dawak as as kalahwi ūnina kau uina dai. 23Israel kingni Joás yaklauwi Bet-Semes yakat Judá kingni Amasías kidika laihwi Jerusalén yakat duwi kiuna, dawak Jerusalén daklana yakat sulihni as yamna, naini laih metro 180, Efraín dūrni kaupak dawak dūrni ūk kidika sipintang yakat. 24Kidika minit yakat gol dawak lalah balna kidika bitik duna, kaput bik laih, Papang ūni kau di mahni bangdai kidika Obed-edom tingni yakat, bitik duwi kiuna, dawak king ūni kau di bangdai kidika bik. Dawak muih as as laihwi dawi Samaria yakat nawatwi kiuna.
25Joás walanbis al Amasías, Judá kingni kidika, witing sangka dai kurih 15, Joacaz walanibis Joás Israel kingni kidika dauwak minit yakat. 26Amasías yulni umani balna tatuna kaupak witni kat kidika ulna ki, Judá dawak Israel balna kingnina yulnina uhulna wauhninataya yakat. 27Amasías kidika Dawan kaupak naikau kalahna minitni yakat, Jerusalén yakat Amasías niningkauh yaklauna, bahang witing laih Laquis yakat kiri kiuna dai; kaunah kidika tawanni nuhni kat uiwi uina dai, dawak kidika ihina. 28Usnitkat aras kau ilwi duwi uiwi nununa, muihnibarak balna panina yakat, Devid tawanni nuhni#25.28 Devid tawanni nuhni: tingkau ulna uk balna yakat kaput yuyulwi, dawak 2 Re 14:20 yakat bik. Hibru kau laih yulwi Judá tawanni nuhni. yakat.
Currently Selected:
2 Crónicas 25: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
