2 Crónicas 12
12
Sisac, Judá niningyakat kalbauwi
(1 Re 14:21-31)
1Roboam witing king kawa kidika parasni yamna kat, witing parasni kaldakana, Dawan lāni balna kidika yamwas dana, dawak Israel balna bitik kaput yayamna dai. 2Kaunah Dawan karak barangni awasdai bahang, Roboam king kana kaupak kurih singka laihwa yakat, Egipto kingni Sisac kidika Jerusalén niningyakat kalbauna 3war kārni 1,200 karak, dawak aras kau kilwi kalbauyang balna kidika laih tausin 60 dai, kaput bik laih kalbauyang muihni balna kidika mahni palni sip kuldi yakdas dai witing karak aina kidika Egipto kaupak, Libia muihni balna, muih pini panina bukwas balna dawak Etíope muihni balna bik. 4Judá kau tawan pararasni balna kidika dakyakwi duna, dawak Jerusalén kat kiuna dai.
5Kaput laih prapit Semaías kidika Roboam yakat kiuna, dawak Judá tunan muihni balna bitik kalududuhna Jerusalén yakat, Sisac niningna kauh kiwa kidika yulni, dawak aput diyulwa:
—Dawan yaklau yulwi manna witing yakat ruhmta danamana, kidika bahang, witing manaruhmwi dāwi Sisac tingni yakat.
6Israel tunan muihni balna, dawak king bik witingna amanglalana, dawak kulninna limahni kakalna, dawi yuyulna:
—¡Dawan rahmni duwi!
7Dawan talna, witingna sau yakat bubukna kidika, dawak Semaías yakat kalyulna: “Witingna sau yakat bubukna bahang, itik dismuktas awaki, nawatkauh laih tihndawak dilaihtik yakki, dawak Sisac kidika yusyamtas awaki kulnik daukalna kidika Jerusalén minit yakat sihnik yulni; 8kaunah witing tingni dinit yakat bubukna karang, bahang kaput laih witingna amanglalawarang, ais amput kidika, yang diki yamnin dawak nisan ūk kingni dini yamnin kidika.”
9Egipto kingni Sisac Jerusalén niningyakat kalbauwi minit bayakwi kawi duna, Dawan kau makatyulnin ūni lalahni kidika, dawak king ūni kau kidika bik duna. Di balna kidika bitik duna, dawak kalbauyang balna tanitna daknin gol kau yamna dai kidika Salomón bitik dukiuna.#1 Re 10:16-17; 2 Cr 9:15-16. 10King Roboam yaklauwi kalbauyang balna tanitna daknin dini balna kidika bras kau yamna dai, dawak king ūni kiwi kawa kau maintalyang balna tingnina yakat dana dai, maintalna atnin. 11King kidika Dawan ūni yakat kiwa bitik yakat, kalbauyang muihni balna duwi uiwa kidika duwi uiwa dai. Kidika usnit kat kalbauyang muihni balna panina yakat duwi uiwi dadawadai. 12Kaput Roboam kidika sau yakat bukna bahang, witing niningyakat Dawan kulnin daukalna kidika yamni kalna dai, dawak bitik palni laih daukalpamwas dai. Kaput dai kaunah, Judá yakat di yamni bik sakdai.
13King Roboam, kidika Jerusalén yakat baisa parasni kalna, bahang witing ban tanit yakat king kana. Witing king kana kat kurih 41 duwadai, kaput laih Jerusalén yakat kurih 17 king kana, Jerusalén kidika laih Dawan yaklauwi walwi yakna dai kidika Israel walanibis balna paskaupak, kaput laih witing ayangni kidika ban sak-atnin kidika pāni yakat. Roboam nanangni ayangni laih Naama, witing kidika laih Amón kaupak dai. 14Witing yamna balna kidika laih dutni manah dai, witing kulnin yamni Dawan yakat walnin kidika laih disdai.
15Roboam yulni umani balna kidika tatuna kaupak witni kat ulna ki, prapit Semaías dawi Iddo balna yulnina ulna yakat, kidika ulna kidik laih kalwanaih balna yulnina ulna pasyakat ulna ki.
16Roboam dawi Jeroboam karak war kalbabauwa kidika laih ban dai kaput. 17Roboam dauwak, Devid tawanni nuhni yakat uiwi nununa. Kidika usnit kat witing walanibis al Abiam kidika king kana dai.
Currently Selected:
2 Crónicas 12: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
