1 Samuel 28
28
1Kidika mani balna yakat, filisteo muihni witingna kalbauyang muihni balna duduwa kidika ududuhna dai Israel niningyakat kalbauna atnin, dawak Aquis yaklau Devid yakat kalyulna:
—Man yamni amanglataman kaput, man dawi kalbauyang muihni balna dutaman kidika bik yang karak awaihna malahwarang ki.
2Devid yaklau nangnitlana:
—Uba yamniki. King waralaih man amanglama ki adika man dima yamyang ais yamnin sip kidika.
Aquis yaklau nangnitlana:
—Kidika niningkauh laih yang yaihkit yakat kalbauyang muihni ban kaput atnin mahaki ki.
Saúl dawi Endor kaupak yul as baisa di kai'kalahwas kau yakwi yulwa muihni kidika karak
3Kidika mani yakat Samuel laih uman dauna dai, dawak Israel sauni bitik yakat dauna kidika yulni kakaidana dai, kidika usnit kat witing batahndana tawanni nuhni, Ramá yakat nununadai.#1 Sam 25:1. Saúl niningkauh laih, kidika sauni kaupak kang'yakmukna dai baisa di kai'kalahwas kau yakwi yulyang balna yakat dawak muih dadauna balna yakat minitna yuyulwadai kidika bik.#Lv 20:27; Dt 18:10-11.
4Filisteo muihni balna laih kaluduhwi dawi Sunem yakat ui'watwi ūnina labanni yayamna dai, dawak Saúl laih Israel muihni balna bitikkau uduhwi Gilboa yakat pa duna dai. 5Kaunah filisteo muihni balna ūnina labanni kidika talna mani kat, yamaduna dai dawak yamadangni kidika yaklau kaltaihwi duna kaldakana dai. 6Bahang Dawan yakat kalyulwi dakana dai, kaunah Dawan yaklau amana munah, Urim#Nm 27:21. munah, prapit balna munah bik nangnitlawasdai. 7Kidika yulni witing yaihnitkau kalbauyang muihni balna duwa yakat yamnin diyulna:
—Muih yal as muih dauna balna yakat minityulwakat waltanauh, kaput karak yang yawik witing yakat di as kalyultik dakana atnik.
Dawak witing yaihnitkau kalbauyang muihni balna duwa kidika yaklau nangnitlalana:
—Endor yakat muih yal as sakki muih dauna balna yakat minityulyang.
8Saúl laih prak ūk kawi dawi pukta kat kalbauyang muihni balna bu karak kalpakwi kiunadai yal kidika yakat kaltalna atnin. Dawi kalyulna dai:
—Kalmadinit buktayang suerte kidika yakta yayulna atnam, dawak wais spiritni mayulki kidika yakat kalyamtang kaiwang.
9Yal kidika yaklau nangnitlana:
—Man amanglatamahn Saúl ais yamna kidika, adika sauni kaupak baisa di kai'kalahwas kau yakwi yulyang balna kidika dawak muih dauna balna yakat minitna yuyulwa balna yakat bik kang'yakmukna kidika. ¿Ais yulni yang muihki inik dini yakat yahatamahn?
10Kaunah Saúl witing Dawan kau pramis yamwīnah, kalyulna:
—Dawan kau pramis mayamtayang adika yulni di dutni as bik makalahwas karang.
11Yal kidika yaklau nangnitlana:
—¿Wais yakat kalyamtingkat kainin kidika dukih mawih?
Saúl yaklau yulna:
—Samuel yakat yultang kaiwang.
12Pini yakauna yal kidika Samuel yakat talna, dawi parasni sarahna; usnit kat Saúl yakat kalyulna:
—¿Ais yulni alas yayulnamahn? ¡Man kuduh Saúl!
13Kaunah king yaklau kalyulna:
—Yamaduwinih. ¿Ais talnamanh?
Yal kidika yaklau nangnitlana:
—Sau kaupak dawan dauh as kilwakat#28.13 Dawan dauh as kilwakat: aslah kau yulnin, ais yulni kat yulwa kidika. Barangni yulnin kat, dawan dauh balna buas kikilwa kidika. talayang.
14Saúl yaklau yulwi dakana:
—¿Pīsni ampat duwih?
Yal kidika yaklau nangnitlana:
—Muih al muihbarak as ki, kalmuknin asnina as kau kalmukna.
Usnit kat Saúl witing amanglana Samuel dai kidika, dawak abukwi sapani kau saukat sukna dai. 15Bahang Samuel yaklau kalyulna:
—¿Ais yamta yausta yayamtang kat akat aiwikdah?
Saúl nangnitlana:
—Uba kulnik kaidi, filisteo balna nikingkauh aiwi yakalbaunin, dawak Dawan bik yaruhmwi dana. Nangkitlawaski prapit balna munah, dawak amana kau bik. Kidika yulni mayultingkat aiwanaman, ais yamnik kidika yayulna atnam.
16Samuel yaklau nangnitlana:
—¿Ais yulni yang akat yayulta dakamahn, Dawan yaklau maruhmna, dawak witing kidika waihmala kalna kat? 17Dawan yaklau man yakat yamna witing yaklau yang munah yulna kidika. King āwaman sauni kidika madakyakna dawak man karak kaltalyang yamni#1 Sam 15:28. Devid yakat kalana, 18kat man laih Dawan lani kidika yakat dakasman bahang, dawak amalecita#1 Sam 15:3-9. balna yakat daukalmuknam mayulna bik, kidika yakat yamtasman dai bahang. Kidika yulni waralaih Dawan yaklau adika dini yamna man yakat. 19Kidika minityakat Dawan yaklau Israel muihni balna kidika dawi man kauna filisteo balna tingnina yakat mana-awarangki, dawak yahan mani man dawi walamabis balna kauna yangkarak karangki. Dawan yaklau yamwakat Israel ūni labanni kidika bik sihm filisteo muihni balna tingnina yakat buknakarang ki.
20Sirihni palni Saúl laih sauyakat bukna kat nai palni tusdai. Muihsakdauna sakdai Samuel yulni balna kidika dakana kat, bahang kidika yulni sangkadauna dai. Baisa kidika witing di as bik kaswasdai, mapiris kaupak masan kat dawak masan kaupak mapiris kat. 21Yal kidika Saúl yakat talwakat parasni dis kat, yaihnit yakat kiwi kalyulna:
—Man dima yamyang yal adika man yulnaman kidika madakana. Yang sangkika yamadahngni yakat atik man lawa yamnin yayulnaman kidika kaput yamnayang. 22Kaput bahang waralaih man kalmadinit buktayang yang yulki dakah: kasnin dini apis laktik makiki, watta parasma duta tamatyakat yawanam yulni.
23Saúl di kasnin kidika dukih kalawasdai, kaunah yaihnitkau kalbauyang muihni balna duwa kidika dawak yal kidika kauna yaklau wat wat yuyulwakat usnit kat di kasna dai. Usnit kat sau kaupak yaklauwi dawi payahnin pāni as kau yalahna dai. 24Kaput bik, yal kidika witing ūni yakat turuh almuk wahmabin salani kat as duwasakdai kidika ina dai, dawi plawar pupuhnin dini dis kuruhna dai lahna atnin. 25Usnit kat kidika dini Saúl yakat dawak yaihnitkau kalbauyang muihni balna duwadai kidika yakat uiwi diana dai, witingna kakasna usnit kat, kalparaswi dawi sihm kidika puknita yakat kalahwi uinadai.
Currently Selected:
1 Samuel 28: SUMU
Highlight
Share
Compare
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
