1 Samuel 21
21
Devid laih Saúl tingni kaupak kalahwi kirana
1Devid laih Nob sauni niningyakauh kiunadai, sumalyang Ahimelec#Mt 12:3-4; Mk 2:25-26; Lc 6:3. yakat kaltalna, baisa kiwi kawas kau kalpapakna dawak aput kalyulna dai:
—¿Amput alas aiwamahn, muih as bik mamakdawas yakauna?
2Devid yaklau nangnitlana:
—King yaklau yapakna di as yamna atnik, dawak yayulna muih as bik amanglanin awas, ais yulni yasihna kidika dawak bik angdika balnapa yamnin dini balna duaitayang kidika. Muih ahal balna niningnakauh laih, pa as kau uinin diyulnayang. 3Bahang, ¿tingma yakat ais kasnin dini balna dutamahn? Plawar busna singka yatah kidik awasbik ais yakma kidika.
4Dawak sumalyang kidika yaklau nangnitlana:
—Plawar busna tingki yakat dutayang kidika laih plawar busna muih pini kasnin kapatnah awaski, kaunah adika laih Papang dini yakna ki. Kaunah mana awaki, kalbauyang muihni balna dutaman kidika yayal balna kaupak naikau kalalahna karangkat.
5Devid yaklau rahm kidika nangnitlana:
—Yangna alahwik awaihtayangna bitik yakat, yayal balna kaupak naikau yangna. Dawak adika kalahnin bik nining alahwayangna kaunah, yang kalbauyang muihni balna dutayang adika laih klin bangdai alahwanayangna mani, kaput bahang waralaih baisa klin bangkapatki.
6Bahang sumalyang kidika yaklau plawar busna Dawan dini yakna kidika kalanadai, bahang kidika yakat di ūk disdai plawar busna Dawan#Lv 24:5-9. dini yakna kidika manah bangdai dawak sihm kidika mani sakripais busnin pāni kaupak yakpapamna dai, kidika pāni yakat plawar busna daihni kidika lakna atnin yulni. 7Kidika mani, kidika pāni yakat Saúl yaihnitkau kalbauyang muihni duwadai kidika kaupak as sakdai, witing laih holi pāni yakat watwi sak atnin dai. Witing laih Edom kaupakdai, ayangni laih Doeg, Saúl sīpni maintalyang balna taninatuna dai.
8Devid yaklau Ahimelec yakat kalyulna dai:
—¿Man tingma yakat langsa as dutamahn kidika awaskat isparah as dutamahn? Bahang king yulni kidika sirihni palni dai iskiparah dawak kalbaunik dini ūk balna bik laihnik sip āwasyang dai.
9Sumalyang kidika yaklau nangnitlana:
—Agha. Goliat isniparah balna dai kidika dutayang, filisteo muihni as man lawa Ela asangni sar kau kalbauta minit bayaknaman dai kidika.#1 Sam 17:51. Prakni tingni kakalhni minitkau kawa kidika dangnit yakat sakki, kalmuknin dini as kau balakna kat. Dukih mawakat sipki duta yawanam; kalbaunin dini ūk balna laih diayang.
Devid yaklau nangnitlana:
—Uk laih yamni awaskarang. Yatah.
10Sihm kidika mani Devid witing Saúl yamaniduwi kirana dai, dawi Gat kingni Aquis muhni yakat kiwi yaklauna dai. 11Dawak Aquis yaihnitkau kalbauyang muihni balna duwa kidika yaklau kalyuyulna:
—¡Kaunah adika laih Devid, adika sauni kingni Saúl dini yamyang!#21.11 Devid, adika sauni kingni Saúl dini yamyang: kaput ulna kidika yamni kapatki. Hib kau laih yulwi Devid adika sauni kingni. ¡Witing yakat kuduh ubuwi yakisdinin yakat unbauwi yuyulwadai kidika: ‘Saúl laih muih ahal 1,000 ina, dawak Devid laih 10,000 ina’!#1 Sam 18:7; 29:5.
12Devid laih adika yulni balna rahm palni kulna dai, dawak Gat kingni Aquis yakat yamaniduna dai.#Sal 56 Yulni tunan kidika Hibru kau ulna. 13Kidika yulni, witingna muhnitna yakat kulnin lani kidika satuk wirlana dai, dawak sinsni daukalwakat#Sal 34 Yulni tunan kidika Hibru kau ulna. dūr balna yakat ulwadai dawak susuihniwas kidika bik dawadai kungnibas munah kirana atnin. 14Bahang Aquis yaklau kalbauyang muihni balna yaihnitkau duwa yakat diyulna:
—Manna talnangkat adika alni tunani dutni kat, ¿ais yamta duainamanah? 15¿Ais muih tunanina dudutni dukih yāwakat pah, adika duaita yanamana adika yang ūki akat di dudutni balna yamna atnin?
Currently Selected:
1 Samuel 21: SUMU
Highlight
Share
Compare
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
