1 Samuel 19
19
Saúl laih Devid yakat inin yamwi
1Saúl yaklau yamnin diyulna dai walanibis Jonatán yakat dawak kalbauyang muihni yaihnitkau duwadai yakat bik Devid kidika ipamna atnin. Kaunah Jonatán witing Devid yakat dalani kaltalwadai kidika, 2wirlawi kalyulna dai. Aput kalyulna dai:
—Saúl, yang papangki kidika, maīpamna atnin yamwi. Kaput bahang yahan mani ma baisa amungtalah dawak pa as malni pāni kat malda sakawah. 3Yang laih papangki karak kalpaktik alahwakiki, di dadahwa pāni kau man sakawama yakat. Witing karak yulbautik dakana awaki man yulma kidika, bahang witing aistarangkat, usnit kat wirlatik mayulna awaki.
4Dawak Jonatán laih Saúl karak yulbauna dai Devid ilpni. Aput kalyulna dai:
—Man kingman kidika dutni as bik yamnam awasdai man dima yamyang Devid niningyakat, kat witing kuduh king man yakat dutni as bik mayamwaski, dawak yamni laihtakat mahni palni yamna; 5bahang sangnika karak yakisdi filisteo muihni kidika ina dai, dawak kaput karak Dawan yaklau Israel muihni balna bitik kau laihwi yakna dai. Man kingman kidika tala alasna alahwanaman dai kidika yulni. ¿Ais yulni man kingman kidika dutni yammayah muih as di as yamwas kidika sangnika niningyakat, Devid yakat inin kulmayah yul as bik dis?
6Saúl witing Jonatán rahmni balna kidika dakana mani kat, parasni yulwi sarahna dai:
—Dawan ayangni usnit yakat pramis yamtayang Devid laih dauwas karangki.
7Bahang Jonatán yaklau Devid yakat kalyulwakat kiuna dawak yulbabauna kidika bitik kalyulna dai. Usnit kat Saúl muhni yakat duwi kiunadai dawak Devid laih watwi Saúl dini yamna dai sihm muhnilau kau dai kaput.
8Watwi kalbaunin kidika yaklauna, dawak Devid laih kalahwi kiwi filisteo muihni balna niningna yakat kalbauwi minitna bayakna dai, minitbayaknin nuhni as minitna bayakwi diyamwakat kirikakana dai. 9Saúl niningkauh laih, watwi spirit dutni Dawan kaupak kidika kallaihna dai; dawak langnisa kidika tingni yakat duwi payahwa pāni yakat yalahna sakkauna, Devid laih paswi yakisdinin dini kidika yakisda sakkat, 10langsa yakau Devid yakat tat karak libittik pakuh atnadai. Kaunah Devid laih ihrwi yaklana dai kalinin dai yakaupak, dawak Saúl langnisa laih tat yakauh pana dai. Sihm kidika puknita Devid laih Saúl tingni kaupak kalahwi kirana dai. 11Kidika minitni yakat Saúl yaklau kalbauyang muihni balna yakat dipakna dai Devid ūni yakat uiwi, mainkaltalwi payahwak mapiris kat ipamna atnin yulni.#Sal 59 Yulni tunan kidika Hibru kau ulna. Kaunah Devid yalni Mical yaklau wirlawi kalyulna dai, aput kalyulna dai:
—Adika pukta ira lawas awamakat, yahan mani kat laih muih al as dauna awamaki.
12Usnit kat Mical yaklau Devid yakat windar munah kaldawakat bukna dai, dawak Devid laih sipdai kiri yaklana atnin. 13Usnit kat Mical yaklau dawan dauh as duwi payahnin pāni yakat laktusna dai, kidika tunning yakat tunanin as kuts butuni kau biwi lakwi dawi umuk as kau muktusna dai. 14Dawak Saúl yaklau kalbauyang muihni balna yakat yamnin dipakna dai mani Devid kidika laihna atnin, Mical yaklau diyulna siknis tuski. 15Kaunah Saúl yaklau watwi disihna dai kalbauyang muihni balna yakat Devid walna atnin, dawak adika yamnin diyulna dai:
—¡Payahnin pāni yakat tuskarang ki, kidika kaupak yakta duaitanauh yang lawik ina atnik!
16Saúl kalbauyang muihni balna duwa kidika Devid ūni yakat kakanadai, kaunah payahnin pāni yakat laih dawan dauh kidika dawak tunning ānin kuts butuni kau bīna kidika manah yayakna dai. 17Bahang Saúl yaklau Mical yakat kalyulna:
—¿Ais yulni aput alas yayulta, yang nikingkauh yaklauwa muihni kidika datangkat kiri yaklana atnin?
Mical yaklau nangnitlana:
—Kat witing yaklau pramis kalahna dai yaīna atnin kaldating kiras karangkat.
18Kaput dai Devid witing kiri yaklana dai kidika. Dawak Ramá yakat kiunadai Samuel yakat kaltalna, dawak Saúl yaklau ais kalyamna dai kidika bitik kalyulna dai. Usnit kat Devid dawi Samuel karak uinadai Naiot pāni yakat yalahna atnin. 19Dawak Saúl amanglana mani kat Devid kidika Ramá sauni Naiot yakat sakdai kidika, 20kalbauyang muihni balna duwa dai kidika sihna dai laihna atnin. Kalbauyang muihni balna Saúl duwadai kidika uiwi kakana mani kat prapit uduhna as Papang yulni yulwabangkat tatalna dai, Samuel yaklau taninatuna duwadai kidika balna yakat. Sirihni palni Papang spiritni kidika yaklau kalbauyang muihni balna Saúl duwadai kidika yakat dilaihwi duna dai, dawak witingna bik sihm prapit Papang yulni yulyang kakalna dai.
21Saúl dakana mani kat, kalbauyang muihni balna ūk sihna dai, kaunah witingna bik sihm prapit Papang yulni yulyang kakalna dai. Wat bas yakat Saúl yaklau kalbauyang muihni balna ūk sihna dai, dawak witingna bik sihm kapat dikalahna dai. 22Bahang Saúl witing muihni palni kiunadai Ramá yakat, dawak Secú pāni yakat was tuhni as sakdai yakat kiuna mani kat, Samuel dawi Devid karak yulwi dakana dai. Laihwatwas palni as kalahwi kalyulna dai, Ramá sauni Naiot yakat bangki, 23dawak Saúl laih kidika niningyakat kiunadai. Kaunah Papang spiritni kidika witing yakat bik sihm kallaihwi duna dai, dawak Saúl laih prapit Papang yulni yulyang kalnadai, dawak kaput tanityakat kiunadai, Ramá sauni Naiot yakat kiwi kana kat; 24kidika minityakat prakni balna yakmukwi wahdis kaput Papang yulni yulwasakdai Samuel muhni yakat mapiris kaupak masan kat dawak masan kaupak payahwakat mapiris kat. Kidika kaupak kulnin lani as kidika kaiwi: “¿Saúl bik sihm prapit as yah?”#1 Sam 10:11-12.
Currently Selected:
1 Samuel 19: SUMU
Highlight
Share
Compare
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
