1 Samuel 17
17
Devid laih kidika sauni yakat kalbauyang muihni as nuhni kalkulna
1Filisteo muihni balna laih kalbauyang muihni balna kidika kalbahahana dai kalbauna atnin yulni dawak Judá sauni yakat tawan as Soco kidika yakat kalududuhna dai, Efes-damim pāni yakat ūnina labanni yayamna dai Soco dawi Azeca walsah yakat. 2Kidika minitni yakat, Saúl dawi Israel muihni balna karak kaluduhwi dawi Ela asangni sar yakat ūnina labanni yayamna dai, filisteo muihni balna niningna yakat dikalbauna atnin yulni. 3Filisteo muihni balna kidika pa duduwadai asang as kau, dawak Israel muihni balna kidika bik sihm asang ūk kau, asangsar kidika yaklau dakwi yakna kat naikau naikau raudai. 4Sirihni palni, filisteo muihni balna kalpaparna kidika paskaupak kalbauyang muihni as kalahna dai muihni naini niningkauh kidika metro bas kapat duwadai. Ayangni laih Goliat kaltadai dawak bik witing kidika Gat tawanni nuhni kaupakdai. 5Tunani yakat paknin dini as bras kau yamna kat pakna likdai, dawak muihni minittang yakat laih kalbaunin prakni sihm bras kau yamna kat kana likdai, kidika laih paun 110 duwadai. 6Sihm kidika brasni kau yamna dai barahnimak balna yakat nanitdakwa dini balna dai kidika dawak salahni yakat langsa duwi kiwalikdai kidika bik sihm kapatdai. 7Langnisa panani kidika sihm asna yayamwa panani kapatdai, dawak sutnikau ayan duwa kidika laih paun 12 minityakat duwadai. Witing tanityakat tingnisut laihyang kidika kiwadai. 8Goliat laih watwi dawi Israel muihni kalbauyang balna yakat diyulna:
—¿Ais yulni kalbauna atnin alahwamanah? Bahang yang laih filisteo muihniyang dawak mannalaih Saúl dini yamyangmana, manna kaupak as walta yaktanauh yaklakwi yang karak kalbauna atnin yulni. 9Yang karak sip kalbauwi minit bayakwarang kat, yangnalaih manna dima yamyang awanaki; kaunah yang lawik minit bayakki kat, mannalaih yangna dikina yamyang awanama. 10Adika mani akat, yang lawik ruhtayang adika dalani adika Israel muihni kalbauyang balna yakat: ¡Muih al as yatanauh yang karak kalbauna atnin!
11Saúl dawi Israel muihni balna dakakana mani kat filisteo yulni balna kidika, kulninna bukna dai dawak uba palni yamaduduna dai.
12Belén kaupak muih al as sakdai ayangni laih Isaí, Saúl mani balna yakat witing kidika uman muihbarak dai.#17.12 Muihbarak dai: grik kau laih kaput yulwi. Hib. kau laih yulwi muih ahal kalna dai. Adika alni laih walabis tiaskaubās duwadai, kidika kaupak as kidika laih Devid dai. 13-14Walanibis balna bararakni bas kidika laih Eliab, Abinadab dawak Sama, kidika balna laih uman Saúl karak kalpakwi uinadai kalbaunin pasyakat. Devid, witing bin kauh dai kidika laih, 15Saúl ūni labanni yakat kiwadai, dawak Belén yakat nawatwi kaiwadai papangni sīpni balna maintalna.
16Kaput bik, filisteo muihni kidika kalahwi Israel muihni balna yakat diuswadai mapiris yakat dawak ma ulah yakat bik, dawak kaput manah ma 40 yamna dai.
17Ma as kat Isaí walanibis Devid yakat kalyulna:
—Plawar minik bukulna adika batal 20 dawak plawar busna kidika salap duta sirihni palni yawah ū labanni yakat wirahma balna kau. 18Dawak adika tāwas dadasna salap adika bik duta yawah kalbauyang balna taninatuna kidika dini. Wirahma balna ampat bangpa talma dawak di as duaita yatangkat laktik talki rahm yamni bangkidika.
19Kaput bik, Saúl dawi Devid wirahni balna kauna dawi Israel muihni balna bitik Ela asangni sar yakat filisteo muihni balna niningna yakat kalbauwabangdai.
20Kidika payahwakat, Devid laih sīp balna kidika muih ūk tingni yakat āwi dawi pukkau kalahwi kiunadai, kasnin dini balna Isaí yaklau kalanadai kidika duwi kiunadai. Ū labanni yakat kiwi kana mani kat, kalbauyang balna kidika laih kalbaunin yakat kalahwi uiwabangdai dawak kalbaunin yulni yulwi sararahwadai. 21Israel muihni balna dawak filisteo muihni balna karak biri biri kalmuhpak yaklalauna dai. 22Devid witing di dukiwalikdai kidika kalbaunin dini balna dawak kasnin dini balna maintalwa muihni yakat kalana dai maintalwi kalana atnin, dawak kalparna bangyakat kiri kiwi kanadai wirahni balna yakat diyulwi dakana atnin ampat bangpa. 23Bahang witingna karak yulbauwasakkat, filisteo muihni kalbauyang as Gat tawanni nuhni kaupak kidika, ayangni laih Goliat kalta kidika, filisteo muihni balna kalparna bang pasyakaupak kalahwi dawi Israel muihni balna yakat watwi dalani diana dai muhnilau kau yamwadai kapat manah kidika mani kat. Dawak Devid dakana dai.
24Israel muihni balna witingna kidika alni yakat tatalna mani kat, yamadangni palni kaldakakana dai dawak witing muhni kaupak bik kalahwi kikirana dai, 25aput yulwinah: “¿Manna uman talnamanah muih al as kalahna kidika? ¡Israel muihni yakat dalani kalana atnin kaina! Angdika muihni yaklau minit bayakwarangkat king yaklau minit nuhni dini manas palni kalana karang, walanibis yal kidika bik kalana karang witing yalni atnin dawak sulani balna kidika bik laihwi yaknakarang tunan minit lauwa kidika kaupak.”
26Bahang Devid yaklau diyulwi dakana dai yaihnitkau muih bangdai yakat:
—¿Ais kalalawarang pah muih al as kalahwi adika filisteo muihni akat iwarangkat dawak Israel muihni yakat dutni kalyamna kidika bik uswi yakwarangkat? Bahang, ¿adika filisteo dutni muihni adika waisyah kaput Papang sangka kalbauyang muihni duwa kidika yakat dalani kalana atnin?
27Bahang witingna muhnilau yuyulna dai kaput nangnitlalana dai, ais kalalawarang kidika muih al as yaklau Goliat yakat iwarangkat. 28Kaunah Eliab, Devid wirahni tatuna kidika, witing kidika muih ahal balna karak yulbauwakat kaldakana dai kidika, witing yakat parasni palni kulnin daukalna dai dawak kalyulna:
—¿Akat aisyamna aiwanamahn? ¿Wais tingni yakat data aiwanamahn sīp balna buas kauhmak wanilang yakat bang kidika? Yang amanglatayang ais traitalaman kidika dawak dutni yamnin kultaman balna kidika bik, kat kalbaunin kidika talna aiwanamahn.
29Devid yaklau nangnitlana:
—¿Dawak warmani ais yamnayang, kat dauhmanah yulbaunayang adika?
30Usnit kat wirahni yaihnit kaupak yaklana, dawak ūk yakat kalyulwi dakawakat, sihm yulni kidika kalyulna dai. 31Devid yulwi dakawakat, as as dakakana muihni balna kidika yaklau Saúl yakat uiwi kalyuyulna dai, dawak Saúl yaklau Devid yakat kalyulwakat kiunadai. 32Bahang Devid yaklau Saúl yakat kalyulna:
—Muih as bik kulnin buknin awaski filisteo muihni dutni yamwa kidika yulni, kat yang, king man dima yamyang as yang adika, yawanayang karang witing niningyakat kalbauna atnik.
33Saúl yaklau nangnitlana:
—Sip awaski man alas yawa kidika filisteo muihni niningyakat kalbauna atnam, kat man laih baisa wahmabin palni man; kaunah wirlawakat, witing laih kalbauyang alni as ki wahma mani kaupak.
34Devid yaklau nangnitlana:
—King, yang man dima yamyang adika, papangki sīpni balna maintalayang dai mani, layan as kidik awaskat dangkatakalbas as kaiwi sīp balna paskaupak sīp as dukiwakat, 35usnityak yawik nangnitak kaupak dakyaktayang dai; dawak yakaskuhti nawatwi kaiwakat, kananmak yakat laihtik dalani kalatik itayang dai. 36King man dima yamyang adika kaput iwadai, layan karang bik kidik awaskat dangkatakalbas karang bik. Dawak adika filisteo muihni Papang yakat kulwas adika sihm kaput kalkalahwarang ki, kat Papang sangka kalbauyang muihni duwa yakat dalani diana kidika yulni. 37Dawan yaklau layan dawi dangkatakalbas tipisninamak kaupak yalaihwi yakna kidika, sihm adika filisteo muihni tingni kaupak bik yalaihwi yakwarangki.
Bahang Saúl kalyulna:
—Bahang, yawah, dawak Dawan yaklau mamakdana karang.
38Usnit kat Saúl yaklau dipakna dai Devid prakni ana atnin sihm filisteo muihni prakni awadai kapatnah prakni kau, dawak tunani yakat bik paknin dini bras kau yamna kidika pakna atnin dawak muihni minittang yakat bik kalbaunin prakni kidika muklakna atnin. 39Witni kat, Devid witing isniparah kidika banimak yakat alahwitna dai, prakni minittang yakat, dawak witing kaput kiunin kulna, kat kidika balna bitik kidika witing lan awasdai kidika bahang. Kaunah usnit kat Saúl yakat kalyulna dai:
—Yang sip awasyang muihki minittang yakat adika dini karak likatnik; kat yang lan awasyang bahang kidika dini balna kidika.
Bahang kidika dini balna bitik yakmukna dai, 40tulninah duna, wasbin kinipala salalaini kidika singka duwi bikni duwalikdai kidika pasyakat āna dai dawak kiniwah kidika tingni yakat duwi filisteo muihni niningyakat yaklauna dai. 41Sihm kidika minitni yakat filisteo muihni kidika tani tani ka'kaina dai Devid yaihnit yakat. Witing tanit yakat tingnisut laihyang muihni kidika kiwalikdai. 42Filisteo muihni kidika Devid yakat kaltalna mani kat, dawak bik talwakat wahma unitak pihni dawak pīsni bik yamni kat, di rahm kulwi yamwasdai, 43kaunah kalyulna dai:
—¿Ais yang adika sulyahng akat, pan kau yakalbauna aiwamahn?
Dawak usnit kat Devid yakat lakaltuhna dai daniwan dauh ayangni yakat. 44Kidika minit yakat kalyulna:
—¡Akat aiwah, muihma kidika di lawani balna yakat dawak asangpas dini anyang balna yakat bik witingna kasninna dini kapat diatingkat kakaswang!
45Devid yaklau nangnitlana:
—Man laih isparah dawak langsa karak duta nikingyakat aiwaman, kaunah yang laih man namangyakat aiwayang Dawan parasni bitik ayangni usnit yakat, Israel muihni kalbauyang balna kau dalani dianaman dai kidika Papangnina. 46Waralaih Dawan yaklau yang tingki yakat mahana karang, dawak warmani maītik tunama bik daknayang karangki, dawak filisteo muihni kalbauyang balna dadauna muihnina kidika laih di lawani balna yakat dawak asangpas dini anyang balna yakat bik dianayang karang. Kaput laih muih balna bitik amanglalawarang Israel yakat Papang as sakkidika. 47Bitik akat kaluduhna bang adika witingna amanglalawarang Dawan laih isparah kau dawak langsa kau bik laihwi yakwas kidika. Adika kalbaunin laih Dawan dini, dawak witing yaklau manna kidika yangna tingkina yakat mana āna karang.
48Filisteo muihni kidika yaklau dawi Devid niningyakat kalahwi kiunadai, bahang Devid laih kidika minitni yakat filisteo muihni kidika niningyakat yaklauna dai: 49bikni yakat tingnikau bakatwi kipala as yakna dai dawak kiwah yakau filisteo muihni niningyakat ruhmwi sapani yakat barhwi dakna dai. Sapani yakat kipala kau barhwi ana yakauna filisteo muihni kidika abukni sau yakat bukna dai. 50Kaput laih Devid yaklau filisteo muihni yakat minit bayakna dai kidika. Kiwah as dawak kipala aslah karak, Devid yaklau bahrwi ina dai. Dawak isparah dis likdai bahang, 51filisteo muihni yaihnit yakat kiri kiunadai dawak isniparah kidika duwi uni kaupak yakwi ipamna dai. Kidika usnit kat tunani kidika bik dakna dai. Filisteo muihni balna witingna kalbauyang yamni as duduwadai kidika dauna kat tatalna mani kat, kalahwi kikirana dai.
52Bahang Israel muihni balna dawak Judá muihni balna bik, kalbaunin yulni yulwi sarahwinah, kalahwi uiwi uinadai Gat sauni kiwi kawakat#17.52 Gat sauni kiwi kawakat: grik kau laih kaput yulwi. Hib. kau laih yulwi sau langni kiwi kawakat. dawak bik Ecrón dūrni balna kat. Saaraim kaupak Gat yakat ta kiwa kidika dawak Ecrón yakat bik filisteo muihni kalbauyang balna dadauna muihnina manahdai.
53Filisteo muihni balna yakat ui'amumukna usnit kat, Israel muihni balna nawatwi uiwi ūnina labanni dudunadai. 54Bahang Devid witing filisteo muihni tunan kidika duwi Jerusalén yakat duwi kiunadai, kaunah kalbaunin dini balna kidika laih ūni labanni yakat awi danadai.
55Baisa kidika tanitkauh Saúl yaklau kalbauyang balna taninatuna, Abner yakat kalyulwi danadai, Devid kidika filisteo muihni karak kalbauna kalahwi kiwak talna mani kat:
—Abner, ¿kidika alnibin papangni kidika waisyah?
56Abner yaklau nangnitlana: King yang man yakat pramis alahwik mayultayang, yang amanglatasyang.
—Bahang walta talah kalatna king yaklau.
57Kaput bahang, Devid witing filisteo muihni kidika yakat ipamwi nawatwi kaiwa mani kat, kidika minit yakat tunani kidika tingni yakat duwi kiwakat, Abner yaklau duwi Saúl muhni yakat duwi kiunadai, 58bahang Saúl yaklau kalyulwi dakana:
—Wahmabin yayultah, ¿wais walanibismahn?
Devid yaklau nangnitlana:
—Yang laih Isaí Belén kaupak kidika walanibisyang, king man dima yamyang kidika.
Currently Selected:
1 Samuel 17: SUMU
Highlight
Share
Compare
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
