ROMA 7
7
Ower bajuwut
1Dojowow akatonokom. Car jirmec atakam camsom ow ara. Inimas e aotawcey atakam, jen ajicomokom ara. Bare, tetakay ow cowok, jirmec aman aemapmes. Ow damir aafces, ar jirmec aman boemap opok. 2Er cowoc ower ajuwutef inim cimin ara. E jirmec atakam ara, “E cowoc e armipic bajiwem, wunam wun ipic bojuwut arapok.” Inim aema. E nat, e armipic damir aafcow, wunam e cowoc ower aojuwutcow, e jirmec e cowoc dosa atakam opok. 3Inimas ara, cowoc armipic tetakay memem ara, wunam e cowoc wun ipic aojuwutcow, bare, e cowoc jursumec ara. E nat, e armipic damir affcow, e cowoc e ower bojuwut arapok, inim jirmec aman boemap opok aemcema. Ar wun ipic aojuwutcow, ar jursumec opok. 4Dojowow akatonokom. Caram inim ara. Car Kristus cowkon aemapmokom. E aramat ipic damir aafef. Inimas caram damir aaffokom inim cimin ara. Bare, car e Jirmec aman boemap opok. Car masirin, wow e aojaworsitef ipic aras ara. E dar e Allah akat apormaras bwemas ara. 5Bap ara, dar e dajak basinomas jipu cowok aemawirum. Dar e Jirmec aporawirum, inimas dosa bwem, jak asinomawirum. Bare, e aemawirumas damir bafas cowok ara. 6Bare, dar damir aaffom inim cimin ara. Inimas ara, Allah atakam aotawef, “Car e Musa tulis aeapomef Jirmec aman boemap opok.” Inim aeef. E Allah kerja aemtamamomas, bare, e tareyas jipu boem opok. Er e Musa surat aeapomef Jirmec jipu opok. E Allah kerja aemtamamomas nat, e Roh Kudus ay jak atetamforowas jipu ara.
E Jirmec, pwicakas open?
7Da nat ucim atakam aotawcom? E Jirmec dosaas open? Opok cowok! Do e Jirmec jen baji opok ayaw, doram dosaas bapor opok aemawiru. E wun Jirmec atakam, “Pok sinomcokom,” inim aema. E Jirmec inim atakam opok ayaw, doram pok basinom bapor opok aemawiru. 8E Jirmec nat, pok basinomas atakam amememtamfan. Dor masirin, pok basinom kayimin aokakayimof. Bap ara nat, dor e Jirmec atakam bapor opok aemawiru, dor pok basinom kanim inim aemawiru. 9E Jirmec atakam ara, “Car inim inim pok emcokom,” inim aema. Dor e atakam bapor opok aemawiru, bare dor jak akat aememawiru. Do nat, e jirmec aporsipor aporof ara, dosa bwem asinomof. Dor masirin, jak pwicak aememof. 10Doram damir aafof inim cimin ara. Bare, Allah, jiwneas, asmat ow batetam akat aeefen. Inimas ara, e jirmec aporsipor atatitamefen. E nat, e jirmec, dor damir baf atakam basakamtiwas ara. 11Bare, dosa asan akat aporef, e dosa tot aotfan inim cimin ara. Doram e jirmec aporsipor atakam jen ajiof ara, bare e dosa dor acatiwfan inim cimin ara. E dosa, e jirmec, dor acatiwfan inim cimin ara.
12Bare, e Jirmec, Allah atatitamefas ara. E jirmec aporsipor, Allah atatitamefas ara. Aram atakamnak ara. Aram akat ara. 13Inimas ara, e akat Jirmec dor acatiwfannew? Inimas opok! E dosa dor acatiwfan. E dosa, akatas, dor acatiwfan. E nat, eras, e dosa apwicakas, umuton baporomas ara. E jirmec aporsipor, ow dosa bwem arapok, inim atakam atawmes. Bare, ow e dosa dar acatiwforow apormes ara, aram e dosa pwicaknakut apormes.
Asmat jak
14Bare, Jirmec, Allahas apormom ara. Do nat, asmat ipic ara. Dor dosa akerja bwemtam ipic ara. 15Dor e jak aserememofas jipu bwem opok. E nat, e bifan afayomaminas jipu aemamin. Dor inimas bwem ucimaram? Doram nomsom opok. 16Dor e dor jak baseremem opokas jipu aemey, dor e Jirmec akat aporcimin. 17Inimas dor e pwicakas bwem, dorma opok. E nat, e dojak aman aemapmar dosa, e pwicakas aemcema. 18E dojak aman aemapmaras, bare, akatas opok apormin ara. E dojak, bare asmat jak ara. Doram akatas bwem jak aserememamin. E nat, dor eras bwemem asan opok. 19Dor akatas bwem jak aserememamin. Do nat, eras bwem opok. Bare, dor e do jak baseremem opok dosa aemcimin. 20Dor e do jak baseremem opokas aemcey, eras dorma bwem opok. E nat, e dojak aman ewatepec dosa, eras aemtamceman.
21Inimas ara, dor akatas bwem aememcey, e pwicakasam sotopnakap aememceman. Dor inimas cowok aemcimin. 22Dor bi binip aceceremamin, “Allah Jirmec akat cowok.” Inim aemin. 23E dobi binipas nat, aropas ara. E dodam amanasam aropas ara. “E Allah Jirmec ji bwe akat ara.” Inim bi binip kanim aceceremamin. E nat, e dodam amanas, dosa bwemawar, awutut asinomama. E dodam amanas fakut ara. 24Bare, dor asan pwicaknakut ara. A dam adamirafcema. Dor ajortewcan nat, cam? 25E Yesus Kristus daTuhan ajortewceman araman! Inimas ara, dor terima kasih atakam Allah aotawmin. Bare. Dor bi binip aceceremamin ara, “Allah Jirmec ji bwe akat ara,” inim aemin. E dojak aman nat, dosa ajirmec ji aemin.
Currently Selected:
ROMA 7: LAICNS
Highlight
Copy
Compare
Share
Want to have your highlights saved across all your devices? Sign up or sign in
LAI 1985
