AEMAWIRISAS 23
23
1Paulus masirin, e atakam mamsakam ow, manmok asupicayopef, wunam atakam aotawef. “Dojowow akatonokom. Dor wow ajiwar Allah bipu aemkurumawiruas, bare jak bini opok cowok aememamin.” Inim aeef. 2E Allah atakam mamtaw tugas ipic awut juwas Ananias masirin, e Paulus sotop aememfes ow, aramat ipic ewen picin omop baf, jirmec ajirimef. 3Paulus masirin, atakam aramat ipic aotawef. “Or pir bwe ipic ara. Allah omop or aafceman. Or Musa Jirmec jipu dor aoworpormeneme? E ow omop do baf jirmec ajirimamem, bare e Jirmec aopowmem.” Inim aeef. 4E sotop aememfes ow nat, atakam Paulus aotawfes. “Or, Allah aratakam mamtaw tugas ipic awut, pwicak atakam aotawmeme?” Inim aefes. 5Paulus masirin, “Dojowow akatonokom. Dor e ipic Allah aratakam mamtaw tugas ipic awut nomsom opok. Bare, e Alkitab atakam ara, ‘Car e cakepala ow, pwicak atakam arapok.’ Inim aema.” Paulus inim aeef.
6Bare. E wun atakam mamsakam ow Saduki ow ara. E wun masirin, Parisi ow ara. Paulus inimas aporef, wunam e atakam mamsakam cem aman, atakam afakaytawef. “Dor Parisi ipic ara. Doram Parisi ow atiw ara. Dor e damir ow aojaworsitcemes atakam asicimamin. Doram eras jirey aemin. Inimas awapes ow dor aoworpormenes.” Inim aeef. 7Paulus inim atakam aotawef, masirin, e Parisi owam, e Saduki owam, atakam awutnakut aamtawfes. Inimas e ajarewsiapfes ow, atakam cawor opok. Wun ow arop atakam atawfes. Wun owam arop atakam atawfes. 8E Saduki ow abi binip ara, “E damir ow bojaworsit opok. Malaikatam bare opok ara. Asmat owam, damup epcom opok.” Inim aecemes. E Parisi ow nat, e damir ow aojaworsitcemes atakamam, e malaikat awapes atakamam, asmat ow damup epcom atakamam, takas asicimames. 9Bare, jisuwan awut aemfes. E wun Parisi Allah Jirmec mamememtam ow masirin, asitfes, wunam atakam fak aamtawfes. “Dar e ipic salah opok apormom. Damupnew, malaikatnew, atakam e ipic emeotawef openow.” Inim aefes. 10Bare, e Parisi owam, e Saduki owam, atakam awutnakut aamtawfes. Inimas e tentara kepala ipic e ow Paulus dam das bacirkokomtaw omar aeef. Inimas ar e tentara ow e Paulus baneycajimtew, wunam e tentara cem aman botowomiw, jirmec ajirimef.
11Bare. Iram ara, Tuhan, Paulus sotop aememef, wunam atakam aotawefen. “Oram jak faka. Or doratemen Yerusalem aatamerem. Oram inim atemen Roma aatamcemem.” Inim aeefen.
Yahudi ow, Paulus bacatiw, atakam aamsakamtiwfes
12Bare, jo apuef, e Yahudi ow atakam aamsakamtiwfesen. Ar masirin, Allah bipu, inim atayi aefesen. “Dar amosam, bwiam, boan opok. E Paulus atakamcatiwcom, dar amosam, bwiam, aoancomom.” Inim aefesen. 13Inim atakam aamsakamtiwfes ow empat puluham, wun ow bokayimam, inim ajiwar arawen. 14E ow masirin, e Allah atakam mamtaw tugas ow awutam, e ownucur owam, abipu aenawomfes, wunam atakam aamtawfesen. “Dar Allah bipu atayi aeorom. Dar pok boan opok. E Paulus atakamcatiwcom, pok aoancomom. Inim aeorom. 15Car ara nat, e atakam mamsakam owcin, atakam e tentara kepala ipic mamotawporey. Ar e Paulus cabipu batowocen, atakam mamotawporey. Car e Paulus boworporkurum cimin mameey. Dar ara masirin, aramat ipic e bowsec acatiwcomom.” Inim aefesen.
16Paulus atarsowoc atiw nat, e atakam aamsakamtiwfesas, jen ajiefen. Aramat ipicam e tentara cem afiwef, wunam inim atakam Paulus aotawefen. 17Paulus masirin, komandan ipic cowok ajateefen. “Or awamec ay ipic, e tentara kepala ipicpu batowoceney. Aram aramat ipic atakam botawen.” Inim aeefen. 18E komandan ipic masirin, e ay ipic e kepala atowocenef, wunam atakam aotawefen. “E penjara cem aman tewapomfom ipic juwas Paulus ajatean, wunam awamec ay ipic or batowocen, janim dor aaniman. Ar atakam o botawen.” Inim aeefen. 19E kepala ipic masirin, e ipic ban atowomefen. Aram aramat ipic arpuak asan atowocenef, wunam jonow atowporefen. “Or ucim atakam dor aotawcenem?” Inim aeefen. 20E ipic masirin, “E Yahudi ow atakam aamsakamtiweres. Ar or e Paulus e atakam mamsakam ow asan, to batowocen, janim aanimcemenesen. Ar aramat ipic boworporkurum cimin bwe arawen. 21Or ara nat, e ow aratakam jen baji arapok. Ow empat puluh ajiwaram, wun ow bokayimam, bwer acukapcemes. E ow takas Allah bipu atayi aeeres. Ar amosam, bwiam, boan opoken. E Paulus atakamcatiwces, ar amosam, bwiam, aoancemesen. Bare, aram sur emeotaperes. Ar oratakam asakamtiwcemes jen baji aemaperes.” Inim aeefen. 22E tentara kepala ipic masirin, “Or e otawemenem atakam, kawey ow otawcem.” Inim aeefen.
Tentara kepala ipic, Paulus, gubernurpu atewosomef
23Aramat ipic masirin, komandan ipic jamnuk ajateefen. “Car tentara ow dua ratus ajiwaram, kudu op ajarcemes tentara ow tujuh puluh ajiwaram, urin epcom tentara ow dua ratus ajiwaram, pok batawkenem jirmec mamjirimey. Ar jam sembilan iram, kota Kaisarea baysos baememces. 24Caram Paulus op batometap kuda mamincop mamtawkenemey. Car, e Paulus, asan akat epcom, Gubernur Felikspu mamtowomosey.” Inim aeefen. 25Aramat ipic masirin, inim surat aeapomefen:
26“Gubernur Feliks akatnakutenem. Dormomo. Do Klaudius Lisias ara. 27E Yahudi ow awap ipic ban akimomfes. Aram aramat ipic bacatiw aemfes. Dor masirin, ‘Aramat ipic Roma ipic ara,’ inim atakam jen ajiof. Inimas doram, tentara owam, e ow aenawomfom, wunam aramat ipic ajortewfom. 28E ow, awap ipic salah, inim atakam aotawfes. Dor masirin, e atawfes salah atakam jen bajikurum aemof. Inimas dor, aramat ipic, e ow aratakam mamsakam owpu atowocenof. 29E ow, awap ipic, e Yahudi jirmec aopowef, inim atakam aotawfes. Eras nat, e ipic or bacatiwas opok. Aram penjara cem aman batewapomas opok. Dor inimas aporof. 30Doram e ow Paulus bacatiw aamsakamfes atakam jen ajiof. Jen ajiof masirin, dor aramat ipic or asarimtewosomof. Doram e aramat ipic salah atakam aotawfes ow, e salah atakam, e obipu bataw, jirmec ajirimof.” Inim surat aeapomefen.
31Barewen. E tentara ow, e kepala ipic atakam ji aefesen. Iram ara, ar Paulus kota Antipatris ajiwar, atowocenfesen. 32Ajofay masirin, e mami tentara ow acem aofasifesen. Ar e kuda op ajarfes tentara ow, e Paulus akac bajar, bakan ajiosfesen. 33Ar kota Kaisarea ajaremfes, e surat e gubernur ipic atetamfesen. Aram Paulus e ipic aotasimemtamfesen. 34E gubernur ipic e surat baca aemef, wunam jonow Paulus aotowporefen. “Or ucim propinsi ipicam?” Inim aeefen. Paulus masirin, “Dor Kilikia ipic ara.” Inim aeefen. 35E gubernur ipic masirin, “E casalah atakam aotawfes owam arasan aenawces, dor e aemfemas aoworporcimin.” Inim aeefen. Aramat ipic masirin, tentara ow e Paulus e Herodes aeapomef raja cem aman manmok batiw, jirmec ajirimef.
Currently Selected:
AEMAWIRISAS 23: LAICNS
Highlight
Copy
Compare
Share
Want to have your highlights saved across all your devices? Sign up or sign in
LAI 1985
