Ndando ya Tindando 4
4
Muhorana
1Wona taku, u tshurile ngutu, awe mndoni wangu,
wona taku u tshurile ngutu;
maso ako hagari ka timbobo tako,
mafana ni maso a matuva,
misisi yako yi fana ni mtxhambi wa tiphongo
ti ti dyiswako mmangoni ka Gileyadhi.
2Makwasa ako ma fana ni mtxhambi wa tinvuta ti nga kaywa,
ti txita ngu kusambiswani,
ati ti velekako ngu mahasa,
se kha ku nga ni txifule ni txa tximwetxo ka tona.
3Txisofu txako txi fanana ni ngoti yo bhilivila,
ni kuwombawomba kwako ka tsakisa;
mathama ako hagari ka timbobo tako
ma fana ni txikhwemu txa diromani.
4Thamo yako yi fana ni txitezi txa Dhavhidha,
txi nga akwa kasi kuhayeka kona matxhari,
amu ku hayekwako 1.000 wa matxhari,
otshe a vathu va mtamo.
5Titshumbu tako ta timbidi
ti fana ni simhotyana simbidi sa mahasa,
si dyiswako hagari ka makhoñwa.
6Ni na tsula mmangoni ka mira,
ni tximangwanani ka dibaselo,
kusanzi kutitila,
ni mitsudi yi sanzi kumwalala.
7Mndoni wangu, u tshurile ngutu,
kha ku na txi txi solekako kwako.
8A hi khukhe Libhanoni, awe msikati wangu,
ngono hi khukha Libhanoni;
wonetela kukhukhela tshokani ka mmango wa Amana,
kukhukhela tshokani ka mmango wa Seniri ni wa Hermoni,
khukhela mazumboni ka tingonyamo, ni mimangoni ka tiyingwe.
9U ni dute mbilu, ndiyangu, awe txirandwa txangu,
u ni thote mbilu ngu maso ako,
ngu liketani limwelo li ku thamoni kwako.
10Hi nga kutshura ka lirando lako ndiyangu!
Awe msikati wangu, lirando lako nda linene kupinda vhinya!
Ni kubhumula ka mafura ako ka tsakisa
kupinda yotshe mixowo ya makha.
11Mahesa a wulombe ma khulunga ha txisofu kwako, awe msikati wangu!
Wulombe ni masi si hahatshi ka lidimi lako,
se kubhumula ka syambalo sako, nga ka Libhanoni.
12Awe u thembwe yo bhiyelwa, ndiyangu, msikati wangu,
u txiziva txo sekelwa, txisima txo fenengetwa.
13Kuthunga kwako kufana ni thembwe ya maromani,
yi ku ni mihando ya yinene:
I ku sipresite ni nardhu.
14Nardhu ni safarawu,
ni kalamoni ni kanela,
ni yotshe mindonga ya dibaselo,
ni mira ni alowesi, ni sotshe sibhumuliso.
15U txisima txa thembweni,
txisima txa mati o vhela,
mnambo wu wu khulungako Libhanoni.
Muhorana
16Khukha, moya wa wuphemba,
ngono awe moya wa wulambwe;
futeta thembweni kwangu,
kasi kupfalisa kunungela ka yona.
Ha! I ti ku txota txirandwa txangu thembweni ka txona,
txi ta dya mihando ya txona yo tshamba.
Currently Selected:
Ndando ya Tindando 4: BEC2016
Highlight
Share
Copy
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
