Varoma 5

Asi si manwako ngu vale va nga mahwa valulami

1Ngu toneto, ngako hi nga amukela wululami ngu kukholwa, hi ni kudikha ni Txizimu, ngu Mkoma wathu Jesu Kristu; 2awu hi nga mana kukholwa ka kateko yiya ngu mtamo wakwe, yona kateko yi hi ku nayo, ayi yi hi ningako kutsaka, na hi txi tsaniswa ngu txithembo txa wudhumo wa Txizimu. 3Kha hi ti dhumisi ngu toneto tokha, aniko ha ti dhumisa kambe ni mu ka sikarato, ngu kuziva ti taku kuxaniseka ka ninga kuhonisela, 4kuhonisela kuninga kutsana sidukoni, kutsana sidukoni kuninga kuthemba. 5Kuthemba kha ku hi wisi tingana, nguko lirando la Txizimu li thetwe timbiluni kwathu, ngu Moya wo Sawuleka, wu hi nga ningwa.

6Nguko mbimo yi hi nga ti sinzi kutsana, Kristu a fete vabihi ngu txikhati txiya txi nga ti vekilwe ngu Txizimu. 7Ta karata m'thu kutumela kufela m'thu kulowe, hambi i di wo lulama; mwendo ti nga maheka ti to m'thu wokari e tumela kufela m'thu wu i ku wamnene. 8Aniko, Txizimu txa hi kombisa lirando la txona, nguko Kristu a tumete ku hi fela athu hi di ngadi vaonhi. 9Se konkuwa hi nga ningwa wululami ngu kubasiswa ngu mnoha wakwe, ngu koneho hi fanelako kuthemba ti to hi na poniswa ngu ngene ka ditshiku da kuhenyelwa ngu Txizimu. 10Kha ditshuri, hambiko hi nga ti valala, hi mani kutshanganiswa ni Txizimu, ngu mhaka ya kufa ka Mwanana wa txona; se ngutu-ngutu aku hi nga tshanganiswa, hi na hanyiswa ngu wutomi wakwe. 11Kambe hi nga toneto tokha, aniko kambe ha giya ngu ka Txizimu, ngu mhaka ya Mkoma wathu Jesu Kristu, awuwa hi nga mana kutshanganiswa ngu ngene.

Adhamu ni Jesu Kristu

12 # Wona ni ka: Gen. 3:6. Ngu kota yeto, ngako txionho txi nga wulela ha ditikoni ngu mhaka ya m'thu wammweyo, ngu msana ku txi wulela lifo, ngu toneto lifo nilona li wulelete votshe vathu, nguko votshe va onhile. 13Nguko hambi mbimo yile ku nga sinzi ku va ho mlayo, txionho txi ti ti ho ha mafuni; kambe ahawa ku ku si nga ni mlayo, kuwalo kuonha. 14Ti di ngeto, lifo li fumile kukhukhela ka Adhamu kala mbimo ya Mosi; li va fumile hambi vona vale va nga ti sa maha txionho txo fana ni txa Adhamu, awu i nga ti mfanekiso wa wule a nga ti ngadi a txi ta, 15Aniko txiningo txa wuxinji kha txi fani ni txionho. Nguko akuwa vathu vavangi va nga fa ngu mhaka ya kueyisa ka m'thu mmweyo, ngutu-ngutu konaho, kateko ya Txizimu, i ku txihiwa txa ku ta ngu ka m'thu wammweyo, ene Jesu Kristu, yi hanyisile, ngu wungi wa yona, vathu votala. 16Se txihiwa txiya kha txi fani ni txionho txa m'thu wule wammweyo, nguko kulamula kule ku nga humelela ngu mhaka ya txionho txile txa tximwetxo, ku hi manisile mnandu; kasi txiningo txa wuxinji, atxi txi nga ta msana ka sionho so tala, txi hi manisile wululami. 17Ngu toneto, hambiko txionho txa m'thu mmweyo txi nga wuyisa mtamo wa lifo, ngu kota yakwe ene mthuyo wammweyo, ngutu-ngutu avale va amukelako ngu kutatiseka wuxinji ni txiningo txa kululama, va na mana kufuma ka wutomi ngu mtamo wa m'thu mmweyo dwe, ene Jesu Kristu.

18Se ngu toneto, nga kuwa txionho txa m'thu wammweyo txi nga manisa mnandu votshe vathu, ngu toneto kambe, ngu mthumo wa kubasisa wa m'thu mmweyo, va na mana kuhanyiswa ka wutomi votshe vathu. 19Ngu toneto, kambe, nga kuwa txieyiso txa m'thu mmweyo txi nga nyeta votshe vathu, kufana ni toneto, ngu kuengisisa ka m'thu wammweyo vavangi va na mahwa valulami.

20Mlayo wu tile kasi kuonha ku txi anda; aniko, ahawa kuonha ku nga anda kona, kateko yi andile ngu kupindisa; 21ti to ngako kuonha ku nga fuma ngu lifo, kateko ni yona yi fanela kufuma ngu kululama ku ku yisako ka wutomi wo mbi guma, ngu Jesu Kristu Mkoma Wathu.

Currently Selected:

Varoma 5: BEC2016

Highlight

Compare

Copy