Mtuletelo DIPSWI DO THANGA
DIPSWI DO THANGA
Mbimo yi dibhuku diya di nga bhalwa, makholwa ma ti xaniswa ngu mfumo wa Roma, ngu mhaka ya wukhongeli wa ona. Vamwani va ti ñolwa ni kurinzwa mikorani, vamwani va ti dawa. Johani nene a ñotwe ngu mhaka ya Dipswi da Txizimu, a txi yiswa txitondoloni, a txi txi dhanwako ku i Patmosi, i di txibotxhwa. Ene a lava kukomba makholwa kulowe ati Jesu Kristu a nga mxawutela tona aniya Patmosi; a bhalela ngutu-ngutu mabanza mamwani a mtxhanu ni mambidi aniya Aziya wa M'dotho. Kuxuva ka m'bhali ngu kulava kutsanisa makholwa kuxanisekani ka ona, a txi ma khongotela ti to me tsana, kukholwani ka ona ni kurinzelani ka ona, ma txi themba Kristu mxuli.
Ta karata kuengisisa ni kutxhamusela dibhuku da Mtuletelo, nguko di womba-womba ngu sidiwukiso si Johani a nga ningwa ku si wona a di ekha. Kona kambe, dibhuku da Mtuletelo di womba-womba ngu simaha si si si wonwiko ngu maso, mwendo si si ku ngadi si txi ta; di tate ngu sifananiso ni siwoniso, kumwani di vayilela kuwomba ditshuri, ha kubasani ngutu-ngutu ngako di txi gwesa timhaka ta wukoma.
Hambiketo, wufakazi wa hombe wa dibhuku diya wa pfala, i ku wuwa: Yotshe mifumo ya mafu yi na xaniswa ngu Txizimu. Vafumeli ni vathu va tixakaxaka ni va totshe tidimi, va manzani ka txona. Ngu Jesu Kristu Txinvutana txi txi nga bhaywa txi tshumela txi wuka, Txizimu txi na heta votshe valala va txona, txi hetisa ni nene Sathani. Avale va ti karatako ngu kufakazela likholo lawe ka Kristu hambi mu kuxanisekani, va na wona mafu a maphya ni nzuma ya yiphya; va na dya M'buso wa Txinvutana; va na zumba m'tini kakuphya ka Jerusalema wa nzumani ngu ha ku si gumiko.
Longoloko ya timhaka
1. Dipswi do thanga (1:1-8)
2. Txiwoniso txa Kristu (1:9-20)
3. Mapapilo a kubhalelwa Mabanza a mtxhanu ni mambidi (2:1--3:22)
4. Txiwoniso txa dibhuku ni sixambanyo sa dona sa mtxhanu ni simbidi (4:1--8:5)
5. Txiwoniso txa mipundu ya mtxhanu ni yimbidi (8:6--11:19)
6. Wamsikati ni mwamilambo (12:1-18)
7. Sikalani simbidi (13:1-18)
8. Simwani siwoniso (14:1-20)
9. Txiwoniso txa mtxhanu wa magombe a kuhenya ka Txizimu (15:1--16:21)
10. Txiwoniso txa Bhabhilona, digelegele da hombe (17:1--20:10)
11. Kulamulwa ko gwitisa (20:11-15)
12. Simwani siwoniso (19:5--20:15)
13. Nzuma ya yiphya ni mafu a maphya ni Jerusalema wamphya (21:1--22:5)
14. Mapswi o gwitisa (22:6-21)
Currently Selected:
Mtuletelo DIPSWI DO THANGA: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.