Mtuletelo 3

Ka Dibanza da Sardhisi

1Ka ngelozi ya Dibanza da Sardhisi, bhala u txi: “A womba tiya awule a ku ni mtxhanu wa Mimoya ni yimbidi ya Txizimu ni tinyeleti ta mtxhanu ni timbidi: Na yi ziva mithumo yako: U na ni nduma ya ti to wa hanya, kasi u fite. 2Wuka u txi khutala. Tsanisa asi si nga sala, si lavako kufa, nguko mithumo yako kha na yi mana yi di hetisekile masoni ka Txizimu. 3#Wona ni ka: Mat. 24:43-44; Luk. 12:39-40; Mtu. 16:15. Ngu konaho alakanya ati u nga ti amukela ni ku tiengisa. Ti xayise u txi hunduluka. Ngako u si woneleli, ni nata nga dikhamba, na awe u si txi zivi txikhati txi ni no ku tela ngu txona. 4Kambe, didhoropani ka Sardhisi, u na ni vathu vavadotho va va nga mbi nyeta syambalo sawe, vona va na tsimbila ni nani, va di ambate tinguwo to basa, nguko va ni fanelo yeto. 5#Wona ni ka: Eks. 32:32-33; Mas. 69:28; Mtu. 20:12; Mat. 10:32; Luk. 12:8. Awu a xulako a na ambala siamlalo so basa, se ani kha ni na mbi thuka ni pfhuta ditina dakwe dibhukuni ka wutomi. Ni na nuwela ditina dakwe masoni ka Tate wangu ni ka tingelozi takwe.

6Awu a ku ni tinzeve a na engise ati Moya wu embelako Mabanza.”

Ka Dibanza da Filadhelfiya

7Ka ngelozi ya Dibanza da Filadhelfiya, bhala u txi khawe: “A womba tiya msawuleki, awu wa Ditshuri, awu a ku ni khiya ya Dhavhidha, awu a tulako, ku si maneki ni wammweyo wo seka, awu a sekako, ku si maneki ni wammweyo wo tula.

8Na yi ziva mithumo yako: Wona, ni vekile masoni kwako ditimba do tulwa, adi ni mmweyo a no mbi sikota ku di seka, nguko mtamo wako mbudotho, aniko u veketile dipswi dangu, kambe khwa lamba ditina dangu. 9Ni na kuningela vokari va disinagoga da Sathani, va ti wombako ku majudha, na i si nga ona, nguko va womba makuhu; ni na maha ti to ve ta ku khizamela minengeni kwako, kasiku ve tiziva ti to na kuranda. 10Ngako u nga xayisa dipswi dangu da kutimisela, nanani ni na kuxayisa ka txikhati txa kudukwa ku ku nota ka dotshe ditiko, kasi ku ta duka votshe va va nga aka ha mafuni.

11Na ta kunukunuku, ñolisisa ngu kutsana asi u ku naso, kasiku ni mmweyo asi thuki e kuhonyola m'bhoti wako. 12Awu a xulako ni na mu maha phande dithepeleni ka Txizimu txangu, se konaho kha na mbiswa e huma. Ni na bhala txitimwi kwakwe ditina da Txizimu txangu ni ditina da didhoropa da Txizimu txangu, Jerusalema wamphya a txhikako ngu nzumani, a tako ngu ka Txizimu txangu ni ditina dangu da diphya.

13Awu a ku ni tinzeve a na engise ati Moya wu embelako Mabanza.”

Ka dibanza da Laodhikheya

14Ka ngelozi ya Dibanza da Laodhikheya, bhala u txi khawe: “A womba tiya awu i ku Amen. Fakazi yo thembeka ni ya ditshuri, makhato a sivangwa sa Txizimu. 15Na yi ziva mithumo yako: Khu titili, kambe khu hisi. Ti ndina tshura, idiku wa titila mwendo kuhisa. 16Ngu konaho, ngako u ko futumela, u si hisi mwendo kutitila, ni na ku kamba mkanani kwangu. 17Nguko u khawe: ‘Ni nyatithombe, ni humelete, kha ni pwati txilo.’ Aniko khu ti zivi ti to ngawe mxaniseki: Nyantshanzale, u txisiwana, u dibhofu, khwa ambala txilo! 18Na kulaya ti to u ta xava kwangu nzalama yo tshuriswa ngu mndilo, kasiku u txi maha nyatithombe, u xava syambalo so basa, kasiku u ti fenengeta ti to ku si woneki tingana ta wusakato wako, ni mafura o tota maso ako, kasiku u wona. 19Ani na kawuka ni kutsayisa votshe vava ni va randako. Wuseta kukhutala kwako u hunduluka. 20#Wona ni ka: Mav. 3:12; Vaheb. 12:6. Wona, ni ho ha txikeni, na gogota ditimba: Ngako m'thu a txi engisa dipswi dangu e tula ditimba, ni na wulela nyumbani kwakwe ni lalela nayo, nene e lalela ni nani.

21Ka wu a xulako ni na mninga kateko yo khalahatsha kumweko ni nani ha txikhaloni kwangu ka wukoma, kufana ni nani ni nga xula, se ni nga khalahatsha kumweko ni Tate wangu ha txikhaloni kwakwe ka wukoma.

22Awu a ku ni tinzeve a na engise ati Moya wu embelako Mabanza.”

Currently Selected:

Mtuletelo 3: BEC2016

Highlight

Copy

Compare