Mtuletelo 15

Tingelozi ni mitungu yo gwitisa

1Ni to wona kambe nzumani tximwani txikombiso txa hombe txa kuxamalisa: Mtxhanu wa tingelozi ni timbidi kumweko ni mtxhanu wa mitungu ni yimbidi, yo gwitisa, nguko ngu yona ku na hetiseka kuhenya ka Txizimu.

2Ni woni kambe txo nga Linene la ngilazi yo pataniswa ni mndilo ni va va nga xula Txikalani, ni txithombe, ni txikombiso, ni txibalo txa ditina da txona: Va ti emile txitimwi ka Linene la ngilazi na va di ñote tiharipa ta Txizimu, 3#Wona ni ka: Joy. 3:13. na va txi embelela lindando la Mosi, txithumi txa Txizimu, ni lindando la Txinvutana, va txi kha vona:

“Mithumo yako nja hombe, kambe ya xamalisa,

awe Mkoma Txizimu txa mtamo wotshe,

tinzila tako ndo lulama ni ta ditshuri,

awe mfumeli wa otshe matiko.

4 # Wona ni ka: Mas. 86:9. Mkoma, i mani a no mbi thava

ni kupfalisa ditina dako, kani?

Ina! Ngawe dwe u ku msawuleki!

Yotshe mifumo yi nata khizama masoni kwako,

nguko mithumo yako ya kululama yi ha kubasani.”

5 # Wona ni ka: Eks. 38:21. Msana ka tiya ni to wona ku di tutwe dithepele nzumani, amuwa ku nga ti ni ditenda da mtshangano. 6Se ku txi huma mndani ka dona mtxhanu wa tingelozi ni timbidi ti nga ti ni mtxhanu wa mitungu ni yimbidi. Ti ti ambate tinguwo ta linya ya lisima, yo khetima, ti di sungile tibhande ta nzalama ha khana ka tona.

7Tximwetxo ka sivangwa sa mune si hanyako txi to ningela ka tingelozi ta mtxhanu ni timbidi, mtxhanu wa magombe ni mambidi a nzalama, ma di tate ngu kuhenya ka Txizimu, txi txi hanyako ngu hawa ku si gumiko. 8Dithepele di to tala ngu wutshi, ngu mhaka ya wudhumo wa Txizimu ni mtamo wa txona, ahawa koza ni wammweyo asi sikoti kuwulela Dithepeleni, kala kuza kuhetiseka mitungu yile ya mtxhanu ni yimbidi ya tingelozi ta mtxhanu ni timbidi.

Currently Selected:

Mtuletelo 15: BEC2016

Highlight

Copy

Compare