Masalmo 88
88
Mkombelo wa mxaniseki
Disalmo da mtxawa wa Kora. Ndando. Ka mthangeli wa vaembeleli - ngu txiya txa tingoti txo lumba mitxawa yimbidi ya vaembeleli Txithokozelo txa Hemani, muezira
1 Mkoma, Txizimu txangu ni Muhanyisi wangu,
wusiku ni mitshikari na ku kombela txivhuno.
2Amukela mkombelo wangu,
engisa kudila kwangu!
3Ni karate ngu kuxaniseka ngutu,
ni maneka hafuhi ni kufa.
4Se ni balwa mtengoni ka vafi,
nguko se kha ni swi ni di ni mtamo.
5Ni lekilwe hagari ka vafi;
ni fana ni vale se va nga kelelwa,
ni fana ni vale va nga hambaniswa ni nawe
avale se u si swiko u txi va alakanya.
6U ni tshotshile diphalani ko hokoma ngutu;
diphalani ka txidema txo thisa.
7Txiviti txako txa ni nemela;
u ni khubhunyetile ngu otshe mavimbi ako.
8U ni hambanisile ni vangana vangu;
u ni mahile wo nyenyeza masoni kwawe.
Ni fana ni wo khotelwa asi sikotiko kuhuma.
9Maso angu ma karate ngu kudila ngutu.
Masiku otshe na kukhozela, Mkoma,
na guleta manza angu ni txi khongela.
10Ina u nga maha sidiwukiso sako ka vafi kani?
Ina vafi va nga sikota kuwuka
va txi kudhumisa kani?
11Ina m'thu a nga sikota
kuhuwelela wunene wako diphalani kani?
Mwendo kuhuwelela kuthembeka kwako
a di mfumoni ka lifo kani?
12Ina va nga ziva sidiwukiso sako
va di mfumoni ka txidema,
ni kululama kwako ditikoni ka vale va nga divalwa?
13Aniko, ani, Mkoma, na dila kwako;
ni mixo na kutisela mkombelo wangu.
14Ngu kutxani u txi ni nyenya, Mkoma,
u txi ni sisela khohe yako kani?
15Kukhukhela ha wananani kwangu
ni hanya ngu kuxaniseka ni kupandiseka;
ni txi timisela sikarato so thisa sa kuhenya kwako.
16Txitimwi kwangu kupindile txiviti txako txa hombe;
kuthisa kwako ku ni khozisile.
17Txiviti txako txi ni talete otshe masiku nga mavimbi,
kufana ni mati a ndambi ma mitako.
18U ni hambanisile ni vangana ni vaakelani vangu;
mpangalati wangu ngu txidema dwe.
Currently Selected:
Masalmo 88: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
