Masalmo 73
73
DIBHUKU DA WURARU
(Masalmo 73--89)
Wululamo wa Txizimu
Disalmo da Asafe
1Kha ditshuri Txizimu njinene
ka vathu va ka Israyeli,
ka va vo basa timbilu!
2Mikondo yangu yi ti lava ku ni timeta,
kudotho ni ti lava ku rithimuka.
3Ani ni ti bavela ava va kutikulisa,
ngu kuwona kuzumbiseka ka vabihi.
4Nguko kha va na sixaniso kala kufani,
va hanya kwati, va txi ena.
5Kha va xupheki ngu sikarato kuhanyani kwawe,
kha va na sixaniso kufana ni vamwani vathu.
6Kutiguleta kwawe ku va randete
nga wusekenya mkoloni
va thumisa wurena nga bombo.
7Timbilu tawe ti tate ngu wubihi ti txi thekelela
se misungo yawe yi tate ngu mialakanyo yo biha.
8Va poyilela va txi womba-womba kubiha,
va txi kha vona kwa mbi lulama kuta ngu ka Txizimu.
9Va guleta mapswi ve wukela Nyatxitimwi
va womba-womba kubiha
ngu vathu va ha mafuni.
10Ngu toneto, valondeteli vawe va va dhunda
ve engisela kwati mapswi awe.
11Va txi kha vona: “Txi nga ti zivisa kutxani Txizimu tonti;
ina Nyatxitimwi ova ni wuzivi kani?”
12Ndiva vathu vo biha: Va zumbisekile,
va sengeletela tithomba,
va si khatali ngu Txizimu.
13Kha ditshuri, kha ta vhuna txilo
kubasisa mbilu yangu
ni ku va ni manza o basa ka totshe to biha!
14Ditshiku ni ditshiku ni wo xaniseka;
mixo ni mixo ni wo tsayiswa.
15Idiku ni to londisela tawe,
nga ni di khuvekisile liveleko la vanana vako.
16Mbimo yi ni nga kulava ku ti pimisa tiya,
ti manekile ti txi ni karatela.
17Mbimo yi ni nga wulela
nyumbani ko sawuleka ka Txizimu,
ngu kona ni nga tumbula magwito awe.
18Ngu ditshuri u va vekile
ka wukhalo wo rithimuka,
u va tshotshile kuva ve khundumuswa
19Ngu txidhukisa va na fuviswa!
Votshe va na guma ngu kuthava!
20Nga ti a mahako m'thu ngu mloro, a txi wuka,
na nawe, Mkoma, u txi na wuka,
u na nyenya ni txithuzi txawe.
21Mbilu yangu yi pandisekile
ni so thelwa mphume mapimoni kwangu;
22ni manekile ni di txipumbu ni si zivi txilo.
Ni txi nga no va txihari masoni kwako!
23Hambi keto ni ni nawe yotshe mbimo;
awe wa ni setela ngu diwoko.
24Ngawe u ni tsimbitisako ngu mlayo wako
u na ni amukela kudhumiswani kwako.
25I mani ni ku nayo nzumani, hahanze kwako kani?
Ha mafuni ani ni navela kuzumba ni nawe dwe.
26Hambi ngako mmidi wangu wu txi karala,
Txizimu ngu txona txi ningako mtamo mbilu yangu;
ngu txona i kuthomba yangu yo mbi guma.
27Nguko ava va zumbako kule ni nawe va na lova;
awe wa va fuvisa votshe vale va ku phikizako.
28Aniko kwangu, ndinene kuzumba hafuhi ka Txizimu.
Awe, Mkoma, Txizimu txangu,
u wuthavelo wangu;
ni na huwelela totshe ti u nga maha.
Currently Selected:
Masalmo 73: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
