Masalmo 71
71
Mkombelo wa m'thu wa kale
1 Mkoma, ani ni themba awe;
u nga ni leke ni wiswa tingana kala kupinduka.
2Ni ponise, u txi ni vhikela,
awe u ku wo thembeka!
Ni engise, u txi ni hanyisa!
3Awe maha m'vhikeli wangu
ni wuthavelo wangu,
awe u nga thembisa ku ni vhuna yotshe mbimo.
Awe u dirigwi dangu ni mkhokhola wangu!
4Ni txhatxhise, Txizimu txangu,
manzani ka m'thu wo biha,
manzani ka m'bihi ni mxanisi,
5nguko awe, Mkoma, kukhukhela ha wananani kwangu
u kuverela kwangu ni themba yangu.
6Awe u m'vhuneteli wangu,
kukhukhela mndani ka mame wangu;
kukhukhela kuvelekwani kwangu
ngawe u ni xayisako!
Ni na kudhumisa yotshe mbimo!
7Ni txixamaliso ka vavangi,
nguko awe u wuthavelo wangu.
8Txisofu txangu txi na tale ngu ku kudhumisa
ni wudhumo wako dotshe ditshiku.
9U nga ni tshotshe, kukumbani kwangu;
u nga ni leke, ngako ni di gumile mtamo.
10Valala vangu va womba-womba ngu ku ni wukela;
avale va lavako ku ni daya va langana txikungo,
11va txi kha vona: “Txizimu txi mtshuralete;
m'hingeni, mi mñola nguko,
kha nga ho wo sikota ku m'hanyisa!”
12Txizimu, u nga ti hambukise kwangu;
Txizimu txangu, kukuluveta u ta ni lwela!
13Va na kanganyiseke va txi haxulelwa
avale va zamako ku ni daya!
Va na xowokiswe ve wiswa tingana
avale va ni navelelako dikhombo!
14Hambi keto, ani, ni na va ni kuthemba yotshe mbimo
ni na simana ni txi kudhumisa.
15Dotshe ditshiku ni na huwelela ti to u hi hanyisile
ni na xawutela mithumo yako ya kululama,
16hambiko yona yi si sikotiko kubalwa.
Ani ni na xawutela mithumo yako ya mtamo, Mkoma,
ni huwelela ti to ngawe wekha u ku wo lulama!
17U ni gondisile awe Txizimu,
kukhukhela ha wananani kwangu
se ni ngadi ni txi huwelela sidiwukiso sako.
18Se konkuwa, ni nga kumba ni basa misisi,
awe Txizimu, u nga ni leke,
nguko ni ngadi ni txi na xawutela
ka liveleko liya ni ka va va nota,
wukoma wako ni mtamo wako.
19Kuthembeka kwako, Txizimu,
nga hombe ngutu kufana ni nzuma;
u mahile simaha sa hombe.
I mani a fananako ni nawe kani?
20Awe u nga ni maha ni wona
wubihi wawungi ni sixaniso,
u na ni ninga kambe wutomi
u na ni humisa diphalani ko hokoma ka mafu.
21U na engetela wuhombe wangu,
u txi ni tangalisa kambe.
22Ngu toneto, ni lava ku kudhumisa ngu kuveta haripa,
ni txi dhumisa wuhombe wako, Txizimu txangu;
ni lava ku ku embeleta
ngu kuveta txitende, Txizimu txa Israyeli.
23Ni na giya ngu kutsaka,
ngako ni txi embelela tindando
wotshe mmidi wangu wu na giya,
nguko awe u wu hanyisile.
24Dotshe ditshiku lidimi langu
li na xawuta kululama kwako,
nguko va xowokile ve tala ngu tingana
vale va nga txi lava ti to ni welwa ngu dikhombo.
Currently Selected:
Masalmo 71: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
