Masalmo 41
41
Mkombelo wa wule a lwalako
Disalmo da Dhavhidha. Ka Mthangeli wa vaembeleli.
1A katekile m'thu wu a alakanyako txisiwana;
Mkoma a na m'hulukisa ka dikhombo.
2 Mkoma a na mxayisa e mninga kuhanya,
a na mninga kuzumbiseka ha mafuni;
kambe kha na mbi mleka
e xaniswa ngu valala vakwe.
3Ngako a di ha ditahoni ngu kuxaniseka,
Mkoma a na mtsanisa,
amu ka malwati, Mkoma a na mu ongola.
4Ani ni ti khani:
“Mkoma ni pfele wusiwana;
ni hanyise, hambiko ni nga kuonhela.”
5Valala vangu va womba-womba kubiha ngu ngani
va txi kha vona:
“A na fa ditshiku muni m'thu wuwa,
kasiku ditina dakwe di txi divalwa kani?”
6Ngako mmwani a txi ta ku ta ni xola,
wo tela ku ta womba ta kukanganyisa,
a sengeleta mbiluni kwakwe wotshe wubihi.
Mbimo yi a humako,
a khata ku wu hangalasa.
7Votshe va va ni vengelako,
va ngurangura, va txi ni lenga;
va pimisa kubiha ngu ngani va txi kha vona:
8“Wulwati wakwe mbwa kubiha;
a nga thuke e wuka kambe
ngu ha ditahoni ha a nga otela kona.”
9 # Wona ni ka: Mat. 26:23; Mar. 14:18; Luk. 22:21; Joh. 13:18. Hambi mndoni wangu,
awu ni nga ti m'themba,
awu ni nga ti dya nayo mbiyani kumweko,
se konkuwa a ni wukete a txi ni ganyata ngu txizenende txakwe.
10Kambe awe, Mkoma, ni divalele;
u txi ni ninga kuhanya,
kasi ni mana mtamo wa kupharela.
11Ngako mlala wangu asi ni xuli,
ni na tiziva konako ti to wa ni tsakela.
12Awe u na ni vhuna,
nguko ani ni hanya mndani ka ditshuri,
u na ni ninga kuhanya
yotshe mbimo masoni kwako.
13 # Wona ni ka: Mas. 106:48. A na dhumiswe Mkoma,
Txizimu txa ka Israyeli,
konkuwa ni yotshe mbimo!
Ti na maheke! Amen ni amen!
Currently Selected:
Masalmo 41: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
