Masalmo 25
25
Kukombela kuvhunwa ni kuvhikelwa
Disalmo da Dhavhidha
1 Mkoma ni guleta mipimiso yangu
ni txi yi tisa kwako.
2Txizimu txangu, ni themba awe,
u nga ni leke ni txi wiswa tingana.
Hambi valala vangu va nga thuke va txi ni seka!
3Ngu ditshuri, avale va themako awe,
kha va na mbi wiswa tingana.
Va na wiswa tingana avale va ku wukelako
na ku si nga ni txigelo.
4 Mkoma, ni gondise tinzila tako,
ni gondise kutsimbila ngu magondo ako.
5Ni gondise kutsimbila ngu tinzila tako ta ditshuri,
nguko u Txizimu txi txi ni hanyisako;
ni themba awe yotshe mbimo.
6 Mkoma, khumbula wunene wako, ni wumbilu wako
nguko i kale u txi hi mahela toneto.
7U nga alakanyele sionho sa wujaha wangu,
hambi ni sihambunyeto sangu;
aniko ni alakanye, Mkoma,
ngu konaho ka wunene wako,
ni wumbilu wako.
8 Mkoma mbwa mnene kambe a lulamile;
ngu kumaha keto wa gondisa vaonhi
kutsimbila ngu tinzila ta tinene
9e tsimbitisa va kutiveka hahatshi
ngu nzila ya yinene,
ni ku va gondisa kumaha kuranda kwakwe.
10Totshe tinzila ta Mkoma
ndo kateka ni ditshuri,
ka vale va vekisako txitumelelano txakwe ni sirumo sakwe.
11 Mkoma, sionho sangu nza hombe ngutu,
ni divalele kasi kudhumisa ditina dako.
12M'thu wule a thavako Mkoma
ene wa m'gondisa nzila
yi a fanelako kutsimbila ngu yona;
13Moya wakwe wu na zumbiseka kwati
ni liveleko lakwe li na mana
ditiko di di nga thembiswa.
14 Mkoma a dhunda vale va mthavako
ene wa va ninga kuziva
Txitumelelano txakwe.
15Maso angu ma wonetela Mkoma yotshe mbimo,
nguko ene wa ni hulukisa ka totshe tiphango.
16Ni rendekele u txi ni wona, Mkoma!
Telwa ngu wumbilu ngu ngani,
nguko ni nokha kambe ni kuxanisekani.
17Thavisa kupandiseka ka mbilu yangu;
u txi ni hulukisa ka sixaniso sangu.
18Wona kupandiseka kwangu ni kuxupheka kwangu
u txi ni divalela sotshe sionho sangu.
19Wona ti va nga talisa tona valala vangu!
Ni livengo li va ni vengako ngu lona.
20Ni lwele u txi ni hulukisa.
Ani ni themba awe,
u nga ni leke ni txi wiswa tingana.
21Wunene ni kululama si na ni vhikele,
nguko themba yangu ni yi vekile kwako.
22Awe Txizimu, hulukisa Israyeli
ka sotshe sixaniso sakwe!
Currently Selected:
Masalmo 25: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
