Masalmo 19
19
Wudhundo wa Txizimu wu wonekiswa nzumani ni mlayoni
Disalmo da Dhavhidha. Ka mthangeli wa vaembeleli.
1Nzuma yi nuwela wudhumo wa Txizimu,
ani mpfhuka wu zivisa
mithumo ya manza a txona.
2Ditshiku di womba-womba ngu wudhumo wa txona
ka dimwani ditshiku,
ani wusiku wu xawutela tona eto
ka wumwani wusiku.
3Kha si wombi mahungu mwendo mapswi,
kha ku pfali kutuma ka sona.
4 # Wona ni ka: Var. 10:18. Aniko kunuwela ka sona
ka hoka ka dotshe ditiko
ni kuwombawomba ka sona
kuhokile magemeta-mitshi ka mafu.
Txizimu txi akete ditambo
m'dhuti nzumani,
5ditambo di humako ni mixo
kufana ni mteki a wukako
ngu ha m'bhedhuni kwakwe,
kufana ni ndena yo tsakela kumaha mapalisana a kututuma.
6Dona di huma di txi khukhela makhatoni ka nzuma
di tutuma di txi ya manela magwito ka yona nzuma.
Kha ku nga ho txilo txi sikotako kuthava kuhisa ka dona.
7Mlayo wa Mkoma mbwo hetiseka,
wa ninga kuhanya kakuphya.
Sirumo sa Mkoma nzo thembeka;
sa ninga wuzivi ka m'thu wo divala.
8Sirumo sa Mkoma nzo lulama;
sa ninga litsako mbiluni.
Sirumo sa Mkoma nzo lulama;
sa woninga mapimo.
9Kuthava Mkoma ngunene;
ka simama yotshe mbimo.
Kulamula ka Mkoma nga ditshuri
kambe ku lulamile yotshe mbimo.
10Milayo ya dhundeka ngutu
kupinda nzalama ya ditshuri;
ya lombela kupinda wulombe wa mahesa;
11ya gondisa wuzivi
ka txithumi txako, Mkoma,
awule a yi xayisako
wa mana hakhelo.
12I mani waku a nga wona sionho sakwe apune kani?
Ni divalele, Mkoma,
sionho si ni si si woniko!
13Kambe hulukisa txithumi txako amu ko tikulisa;
kasi ku ku si fumi kwangu;
ngu kumaha keto, ni na va ni di thembekile,
ni si nga ni txisolo
ni txi ti hulukisa ka sionho sa hombe.
14Mapswi a txisofu txangu,
ni mipimiso ya mbilu yangu
ma na amukeleke masoni kwako Mkoma,
awe dirigwi dangu ni mtxhatxhisi wangu.
Currently Selected:
Masalmo 19: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
