Masalmo 135
135
Ndando ya kudhumisa Txizimu
1Dhumisani Mkoma!
Dhumisani ditina da Mkoma;
di dhumiseni, anu sithumi sa Mkoma,
2anu mi ku Nyumbani ka Mkoma,
magumani ka Nyumba ya Txizimu txathu.
3Dhumisani Mkoma, nguko ene i Mkoma wamnene;
embelelani mi dhumisa ditina dakwe nguko da tsakisa.
4 Mkoma a ti sawulete Jakobe
ni va ka Israyeli kasiku
ve maha thomba yakwe.
5Nguko ani na tiziva ti to Mkoma mbwa hombe,
ni ti to Txizimu txathu
txi txitimwi ka sotshe sizimu.
6Totshe ti Mkoma a ti lavako ene wa ti maha,
ha mafuni ni nzumani,
lineneni ni ka otshe makhalo a kueta.
7Ene wa wuyisa marefu a diphuho
ngu magemeta-mitshi ka mafu;
wa humisa singwalangwanda,
wa wisa mati a nzuma
wa tulela maphuho me huma ngu ku khotelwani ka ona.
8Ngene a nga dayela matiwula a Vaegipta
kukhukhela ka matiwula a vathu,
kala ka matiwula a sihari;
9a rumete sixamaliso ni sidiwukiso,
hagari kwako awe Egipta
kasi kutsayisa Faro ni sithumi sakwe.
10Ene a khozisile mifumo yo tala
a date vafumeli va mtamo:
11Seyoni, mfumeli wa Vaamori,
ni Oge, mfumeli wa Bhasani,
ni votshe vafumeli Vakanana.
12Ni matiko a vona vafumelivo,
a ma ningete me maha thomba,
thomba ya kulumba Vaisrayeli, i ku ngamu yakwe.
13 Mkoma, ditina dako di na pfaliswa kala kupinduka!
Mkoma, vathu va na kualakanya
ka liveleko ni liveleko!
14 Mkoma a na lamula vathu vakwe
e pfela wusiwana sithumi sakwe.
15Sizimu sa vamatiko nza kuwumbwa
ngu nzalama ni silivhela,
nzimaha sa kukhandwa ngu manza a vathu.
16Sina ni sisofu, aniko kha si wombawombi;
sina ni maso, aniko kha si woni;
17sina ni tinzeve, aniko kha si engisi;
kuwalo muhefemulo mkanani ka sona!
18Va na fanane ni sithombe soneso
ava va si wumbako ni va va kholwako ka sona.
19Anu Nyumba ya ka Israyeli, bongani Mkoma!
Anu Nyumba ya ka Aroni, bongani Mkoma!
20Anu Nyumba ya ka Levhi, bongani Mkoma!
Anu mi thavako Mkoma bongani Mkoma!
21A na bongwe Mkoma kukhukhela Siyoni,
awu a zumbako Jerusalema!
Dhumisani Mkoma.
Currently Selected:
Masalmo 135: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
