Masalmo 122
122
Ndando ya kudhumisa Jerusalema
Ndando ya mpfhumba. Disalmo da Dhavhidha.
1Ni tsakile mbimo yi va nga kha vona kwangu:
“A hi yeni Nyumbani ka Mkoma!”
2Mikondo yathu yi hokile
ha txikeni kwako, awe Jerusalema.
3Jerusalema, u didhoropa di
tinyumba tako ti nga gwatamela
ti nga akwa ngu kutsana ta tinene.
4Eyo ti kwelako tiya kona tihunzu, tona tihunzu ta Mkoma,
ve fakazela mlayo wa Israyeli,
kasi kuya dhumisa ditina da Mkoma.
5Nguko koneyo siho sikhalo sa wulamuli,
sikhalo sa wulamuli sa nyumbani ka Dhavhidha.
6Kombelelani kudikha ka Jerusalema.
Va na humelela vale va randako kudikha.
7Ku nave ni kudikha mndani ka maguma ako
ni kuhumelela tinyumbani kwako ka wukoma.
8Ngu lirando ka vanathu ni vangana vangu, ni na khani:
“Kudikha ku nave ni nawe!”
9Ngu mhaka ya Nyumba ya Mkoma, Txizimu txathu,
ni na ku lavela si i ku sa sinene.
Currently Selected:
Masalmo 122: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
