Mavingu 7
7
1Mwanangu, xayisa mapswi angu, u sisa mndani kwako sirumo sangu. 2Xayisa sirumo sangu u na hanya; ni mlayo wangu, kufana ni ndololwani ya diso dako. 3Si sungelele mu ka titiho tako, u si bhala ka mbila ya mbiluni kwako. 4Womba ka wutxhari ku khawe: Awe u ndiyangu; ni ka kupfisisa, i nda khawe dixaka; 5kasiku si kuvhikela ka wamsikati wa vane, ka wule wa wubihi, wo tshambisela ngu mapswi akwe.
Wamsikati wa wubhemba
6Nguko ani ni solelete ngu ha ka difasitela da nyumbani kwangu, 7ni rumarumete hagari ka siphukuphuku, ni tumbute hagari ka vavaphya, dijaha dimwedo do kelelelwa ngu mapimo, 8di nga ti pinda ngu nzila, hafuhi ni dikhonani ka dona, di txi tsimbila ngu nzila yoya m'tini ka dona, 9ku txi phumelaa, kuswani ka ditambo, amu ka txidema txa wusiku. 10Wona taku, ku to huma wamsikati e muhingeta, a di ti tshurisete ngu nzila ya wugelegele, ni mbilu ya wukanganyisi. 11I ti wamsikati wa diguwa ni kanu, mikondo yakwe yi ti si emi hamtini; 12nze a tinzilani, nze a mithandani, e solelela ka otshe makhona, 13a to tshuketa kwakwe, se e mpswopswa, kambe a to gwatamisa khohe yakwe, a txi khene:
14Ni nayo miphaxo ya kuthutha; nyamsi ni dihisile kuvilela kwangu. 15Ngu konaho, ni humile ni kuhingeta, ku ta wonisisa khohe yako, se ni ku mani. 16Se ni fenengetile m'bhedhu wangu ngu simaha so tshura, ngu so mahwa ngu masilika o hehuka a Egipta; 17ni tshatshete ditaho dangu ngu mira, mafura ni kinamomo. 18Ngono hi ta ti khurisa ngu lirando kala ditxa; a hi tsakisane ngu lirando. 19Nguko mwamna wangu kha nga ho m'tini, a endete kuya kule. 20Manzani kwakwe a ni txikwamana txa male; a na wuya m'tini ngu ditshiku di a ngadi womba.
21A mndindile ngu kutala ka mapswi akwe, ngu kutshambisela ka txisofu txakwe a mkurumetile. 22Se ene e mlondisa koneko, nga homu ya kuya kudawani; nga txiphukuphuku txi txayiswako mkorani; 23eza e fulwa txivindi ngu lingove, kufana ni txinyana txi tutumelako mlawuni, na txi si ti zivi taku wu riyela wutomi wa txona.
24Konkuwa koko, anu vanangu, niheni tinzeve, kambe mi pfisisa mapswi a txisofu txangu; 25mbilu yako yi nga wekelele ka tinzila takwe, kambe u nga mwalatwe ngu tisoko takwe; 26nguko a dayisile votala e va wisa; kambe mbangi ngutu vale va nga dawa ngu ngene. 27Mtini kwakwe ku ni tinzila to yisa dithithani, ti yisako tinyumbani ka lifo.
Currently Selected:
Mavingu 7: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
