Mavingu 31
31
Sileleto ka mfumeli
1Mapswi a mfumeli Lemuweli, i ku txiprofeto txi a nga gelwa ngu mwamwakwe.
2Kutxani kani mwanangu kani? Se kutxani kani mwananawe wa mndani kwangu kani? Se kutxani awe mwanangu, wa sithembiso sangu kani? 3U nga ningele mtamo wako ka vavasikati, hambi tinzila tako ka wule a khundumusako vafumeli. 4Hi nga tona ka vafumeli, awe Lemuweli, hi nga tona ka vafumeli kusela vhinya, hambi ka madhota kunavela so sela sa mtamo. 5Ku mahela ti to va si seli, se ve divala milayo, ni kuonhetela wululamo wa votshe vale va xanisekako. 6Ningani so sela ka vale va lovako, ni vhinya ka vale va si tsakiko dihikani kwawe; 7kasiku ve sela, ve divala wusiwana, kambe va si alakanyi ni kuya kuthumani.
8Tula txisofu u womba-womba ka dotshe ditiko, ngu madingano a votshe vale va ti wonako va ti xasetwe. 9Tula txisofu txako, lamula ngu kululama, u lamulela sisiwana ni vale va pwatako somaha.
Alefe
10I mani a nga sikotako kumana msikati wamnene kani? Mtengo wakwe wa pinda ngutu wa marigwi a lisima.
Bheta
11Mbilu ya mwamna wakwe yi themba kwakwe, kambe msikati kha na mbi pwata txo maha.
Gimeli
12A maha ta tinene ka mwamna wakwe, na i si nga to biha
masiku otshe a kuahanya kwakwe.
Dhalete
13A lavetetela matoya ni masedha, kambe e ti thumela kha kwati ngu manza akwe.
He
14A ya tshunza sakudya kule, ngu txitimela txa matini.
Vhawu
15A wuka i di ngadi wusiku, e dyisa mwaya wakwe, ni ku abanisela mithumo ka sithumi sakwe sa txisikati.
Zayini
16Wa wonisisa thomba e yi xava; e phaya mindonga ya mihando ngu manza akwe.
Hete
17Wa sunga txiwunu txakwe txi tsana, kambe a ni mtamo mawokoni kwakwe.
Tete
18Siya sakwe wa si xolisisa e si wona taku nzinene; kambe dilambu dakwe kha di timeki ni wusiku.
Jodhe
19Wa ñola ndonga e luka simaha ngu manza akwe, kambe ona manza akwe ma ñola ndonga yo hora ngu yona.
Kafe
20Manza akwe ma vhuna wule a xanisekako; e tula kambe manza ka wule a pwatako somaha.
Lamedhi
21Kha nga ni dizowa ni hunguva, nguko yotshe nyumba yakwe ngu mndani yi bhiyetwe ngu simaha so tshanzuketelwa.
Meme
22Wa ti vekela so ateta hahatshi; a ambala sa masedha o hehuka, ni sa txiwunguwungu.
Nune
23Mwamna wakwe a zivaneka a di ngadi ha txikeni, mbimo yile a khalahatshako ha lirendoni ka madhota a mafu.
Sameki
24Wa luka simaha sa disedha do hehuka e si xavisa, ni kuninga tibhande ka vale va xavako.
Ayini
25Syambalo sakwe ngu mtamo ni wudhundo, kambe wa verela ta tinene mangwana wa ditshiku.
Pe
26Txisofu txakwe a txi tula ngu wutxhari, kambe a emela mlayo wa kuhumelela, ngu mapswi a lidimi lakwe.
Tsadhe
27A xayisa mwaya wakwe ngu nzila ya yinene, khadyi sakudya sa wukara.
Kofe
28Vanana vakwe va womba-womba ngu wunene wakwe; mwamna wakwe nene wa mdhunda, a txi khene:
Rexe
29Mahorana amangi ma vile ni mamahelo amanene, aniko awe wa va pinda ngutu votshe.
Ximi
30Kutshura ka kanganyisa, kambe kona kutshura ngutu mbukanganyisi, aniko msikati wule a thavako Mkoma, eyo a na dhundwa.
Tawu
31Mningeni mihando ya manza akwe, kambe mithumo yakwe yi na m'dhunde txikenini.
Currently Selected:
Mavingu 31: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
