Mavingu 29
29
1M'thu wule a ku a txi kawukwa ko tala e ti bangisa msungo, a na phatulwa ngu txikuluveta, asi kalamuki.
2Mbimo yile va kulako vale vo lulama, vathu va tsaka, se i ti muonhi a tongako, ditiko da xomuleka.
3M'thu wule a randako wutxhari, a tsakisa tate wakwe, kambe mngana wa magelegele, wa xakela thomba.
4Mfumeli wo lulama wa tsanisa ditiko dakwe, aniko awule i ku mngana wo xavwa, wa di hoxota.
5M'thu wu a xengetelako mwakelani wakwe, o mriyela milawu mikondoni kwakwe.
6Ku ni mlawu masoni ka m'thu wu i ku m'hambunyeti, aniko awule wo lulama, o embelela e ti tsakela ngutu.
7M'thu wo lulama wa ziva kuxaniseka ka sisiwana, kambe muonhi kha nga ni mhaka nito.
8Vatseketseli va turisa mndilo wa pfilu-pfilu didhoropani, kambe avale vo txhariha, va releta kuhenya.
9M'thu wo txhariha a txi phikizanako ni txiphukuphuku, mwendo wa henya mwendo wa seka, kha na mbi mana kuhumula.
10Sidayi si ni livengo ka m'thu wo lulama, kambe vale vo lulama va ti lavela wunene wawe.
11Txiphukuphuku txa hangalasa kuhenya ka txona kotshe, aniko txhari ya sisa, ni ku ti layetela.
12Mthangeli wule a engiselako timhaka ta makuhu, a na pimisa taku sotshe sithumi sakwe mbaonhi.
13Txisiwana ni mxanisi wa txona va manana, se maso awe votshe vavambidi, ma woningetwa ngu Mkoma.
14Mfumeli wu a lamulako sisiwana madingano ni ditshuri, a na tsanisa wukoma wakwe yotshe mbimo.
15Limhika ni kukawuka sa ninga wutxhari, kambe mfana wo ti mahela takwe ekha, a wisa tingana mwamwakwe.
16Mbimo yile vaonhi va engetelanako, kuhambunyeta ni kona ka engetelana, aniko avale vo lulama, va na wona kuwa ka vaonhi.
17Laya mwanana wako, a na kuninga kuhumula, se a na tsakisa dihika dako.
18Aha ku pwatekako ditshuri, vathu mbanyammahe dwe; kambe awule a vekisako mlayo, eyo a katekile.
19Txithumi kha txi na mbi laywa ngu mapswi, nguko hambi i ti txo engisa kha txi na mbi pfisisa.
20U ti nga mmona m'thu wa magwava amu ka mapswi akwe kani? Txiphukuphuku txa thembeka kupinda ene.
21Awule a fuyako txithumi txakwe ngu ku txi hena kukhukhela wananani ka txona, msana keto, txona txi na lava ku ti maha mwanana wakwe.
22M'thu wa txihenyisani, wa wusa mazunga; se awule wa txiviti wa engetela sihambunyeto.
23Kutikulisa ka m'thu ku na m'dayisisa, kambe awule a ku ni moya wo ti veka hahatshi, a na mana kudhundeka.
24Awule a ku ni thomba yimweyo ni dikhamba, wa venga dihika dakwe apune; wa engisa ta walo, aniko kha wombi txilo.
25Dijowa da m'thu di na riya milawu, kambe awule a thembako ka Mkoma, a na vekwa ka wukhalo wo guleka.
26Vathu vavangi va lava khohe ya mthangeli, aniko kululama ka mmweyo ni mmweyo kuta ngu ka Mkoma.
27Muonhi njinyenyeko ka wule wo lulama, se nene wule wa tinzila ta tinene njinyenyeko ka muonhi.
Currently Selected:
Mavingu 29: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
