Matewu 26
26
Txikungo txo lava kudaya Jesu
(Marku 14:1-2; Luka 22:1-2; Johani 11:45-53)
1Se ku to maheka ta ku, Jesu a di gwitile kuwomba timhaka tiya totshelele, e gela vagondiswa vakwe a txi khene: 2“Ma tiziva ti to ngako ma di pindile masiku mambidi ku nava i di Pasika; se Mwanana wa M'thu a na ningelwa kasi kuya bethelwa ha txihambanoni.”
3Sekoko vaphaxeli va hombe ni madhota a ditiko va to tshangana digumani ka Mphaxeli wa Hombe a nga ti dhanwa ku i Kayifasi. 4Konaho va to ya sunga txikungo txa kuñola Jesu, kasi ku m'daya. 5Aniko va ti ti kha vona: “Ti nga mahwe tiya ha m'busoni, ku nga wuka mazunga hagari ka vathu.”
Jesu e totwa mafura a di Bhetaniya
(Marku 14:3-9; Johani 12:1-8)
6Se ngako Jesu a di Bhetaniya, m'tini ka Simoni, awu a nga ti dhanwa ku wa tshekela, 7#Wona ni ka: Luk. 7:37-38. a to mtshuketela mmweyo wamsikati, a di ni txikadyana txa alabhastru, txa mafura o bhumula ngutu, a txi ma thela ha msungo ka Jesu, mbimo yi ene a nga ti ha kudyani. 8Mbimo yi va nga wona tiya vagondiswa va to henya va txi kha vona: “Simaha siya si xakelelwa txani mahala kani? 9Nguko si ndi na xaviswa ngu kudhula ngutu, se male ya kona yi ningwa sisiwana!” 10Aniko Jesu, ngako a txi ziva mapswi awa, a to va gela ku khene: “Mi karatela txani wu wa wamsikati, kani? Khaditsuri ene a ni mahete mthumo wa lisima. 11Kha ditshuri, sisiwana mi na va naso yotshe mbimo, kasi ani kha mi na mbi va ni nani yotshe mbimo. 12Nguko, ngu kuthela mafura ha mmidi kwangu, a mahela ditshiku da kutshotshwa kwangu. 13Kha ditshuri na mi gela ku khani: Hani ni hani ku no txumayelwa Evhangeli, ka dotshe ditiko, ti na xawutwa ni tona tiya a nga ti maha, kasi kuve mu alakanya.”
Kuningelwa ka Jesu ngu Judha
(Marku 14:10-11; Luka 22:3-6)
14Sekoko konako, mmweyo wa vale va digumi ni vambidi, a dhanwako ku i Judha Iskariyoti, a to ya ka vaphaxeli va hombe, a txi ya khene: 15“Mi na ni ninga txani, ngako ni txi ningela Jesu kwanu kani?” Vona va to m pimela magumi mararu a male ya silivela. 16Se kukhukhela konaho a to khata kulava mbimo ya yinene ya ku mningela ngu yona.
Jesu a txi dya Pasika ni vagondiswa vakwe
(Marku 14:12-21; Luka 22:7-14,21-23; Johani 13:21-30)
17Ka ditshiku do khata da M'buso wa mapawu o mbi tshumbelwa, vagondiswa va to ya ka Jesu, veya mu wotisa, va txi kha vona: “U lava ti to hi txi kulongisela hani wukhalo wa kudyela kona Pasika kani?” 18Ene a to angula, a txi khene: “Tsulani didhoropani, ka m'ti wa nombwe wokari, mi na ya mu gela tiya: ‘M'gondisi a khene: Mbimo yangu yi hafuhi. Ni lava ku ta mahela nyumbani kwako Pasika kumweko ni vagondiswa vangu.’ ” 19Vagondiswa va to maha nga ti Jesu a nga va rumisa tona, veya longisela Pasika.
20Se ku di hokile minova, a to khalahatsha ha sakudyani ni vagondiswa vakwe va digumi ni vambidi. 21Se va di ngadi va txi dya, a to va gela a txi khene: “Kha ditshuri ni khani kwanu: Mmweyo wanu a na ni ningela.” 22Se vona va to karateka ngutu, mmwani ni mmwani e khata ku mu wotisa a txi khene: “Mkoma i nga va i di ani kani?” 23#Wona ni ka: Mas. 41:9. Ene a to va xamula a txi khene: “Awu a betako dianza mbiyani kumweko ni nani, ngeneyo a na ku ni ningela. 24Mwanana wa M'thu a na tsula nga ti ti nga bhaliswa tona, aniko dikhombo da wule ene Mwanana wa M'thu a no ningelwa ngu ngene! Ti ndi nava i di txhuko, ngako mthuyo a ti sa velekwa!”
25Konaho Judha, awu a nga mningela, a to angula a txi khene: “M'gondisi, i nga va i di ani kani?” Jesu a to xamula a txi khene: “U ti landute upune!”
Txilalelo txa Mkoma
(Marku 14:22-26; Luka 22:14-20; 1 Vakorinto 11:23-25)
26Va di ngadi va txi dya, Jesu a to teka dipawu a txi di katekisa, a txi di bhanda, a txi di ningela ka vagondiswa vakwe, a txi khene: “Tekani mi txi dya, asiya mmidi wangu.” 27Ngu msana a to teka digombe, e bonga, se e va ninga, a txi khene: “Selani ngu dona motshenu. 28Nguko awuwa mnoha wangu wa txitumelelano, wu na ku theketelwa vavangi, kasi ku na mana divalelo ya sionho. 29Aniko ni khani kwanu: Kukhukhela konkuwa, kha ni na mbi sela kambe m'hando wa m'vhinya, kala ditshiku di ni nota wu sela i di wa wuphya, kumweko ni nanu, Mfumoni ka Tate wangu.” 30Msana ka kuva va di embelete mzeno, va to huma veya mmangoni ka Olivheti.
Pedro a txi ziviswa ti to a na lamba Jesu
(Marku 14:27-31; Luka 22:31-34; Johani 13:36-38)
31Sekoko, Jesu a to va gela a txi khene: “Ka wona wuwa wusiku, mi na khuveka motshenu ngu mhaka yangu, nguko kubhatwe ku kha vona: ‘Ni na peka m'dyisi, se tinvuta ta mtxhambi ti na hangalaka.’ 32#Wona ni ka: Mat. 28:16. Aniko msana ka kuwuka kwangu, ni na mi thangela masoni ni ya Galileya.” 33Pedro a to angula, a txi khene: “Hambi votshe va txi khuveka ngu mhaka yako, ani kha ni na mbi khuvekiswa ni ka kudotho.” 34Jesu a to mu angula a txi khene: “Ngu ditshuri na kugela tito, ka wona wusiku wuwa, wu sanzi kuemba mkuku, u na ni lamba kuraru.” 35Pedro a to womba kambe a txi khene: “Hambi i di kulava kudawa kumweko ni nawe, kha ni na mbi kulamba.” Votshe vagondiswa va so wombisa toneto ni vona.
Mkombelo wa Jesu a di Getsemani
(Marku 14:32-42; Luka 22:39-46)
36Sekoko, Jesu a to tsula navo ka wukhalo wu wu dhanwako ku i Getsemani, se e gela vagondiswa vakwe a txi khene:
“Zumbani kona hawa, na nga ya aniya ni txi ya khongela.” 37Ene a to teka Pedro ni vanana va vambidi va Zebhedhewu, se e khata kutelwa ngu dikhodho ni kukarateka ngutu. 38Sekoko a to va gela a txi khene:
“Moya wangu wu ha kuxanisekani ka hombe ka kufa; zumbani hawa mi txi wonelela ni nani.”
39Se a di tshuketile kule nyana, a to ti wisa hahatshi, ngu mbanza, na a txi khongela, a txi khene:
“Tata wangu, ngako ti txi koteka, digombe diya di na pinde kule ni nani; aniko, ti nga maheke nga kuranda kwangu, ti na maheke nga ti Awe u ti lavisako tona.”
40Sekoko a di wuyile hafuhi ka vagondiswa a to va mana va di otete, se e womba ka Pedro a txi khene:
“Mi tandekile ni kuwonelela txikhati txa tximwetxo ni nani kani? 41Wonelelani, mi txi khongela, kasi mi si wi kudukwani. Nguko moya wona wu tsani, aniko mmidi wa rereka.”
42Ti di mahile eto, a to tsula ka wumbidi, eya khongela kambe, a txi khene: “Tata wangu, ngako ti si koteki ti to digombe diya di pinda ni sa di sela, ku na maheke kuranda kwako.” 43Se a di tshumete e wuya kwawe, a to ta va mana kambe va di otete, nguko maso awe ma ti nemelwa ngu wukohe. 44Se e va siya, a txi tsula kambe ka wuraru, eya khongela, a txi womba onayo mapswi o fana. 45Sekoko a di tshumete kambe eya ka vagondiswa vakwe, a va gete a txi khene: “Konkuwa mi nga sikota kuotela, mi txi humula! Wonani, yi hokile mbimo yi Mwanana wa M'thu a no ningelwa ngu yona manzani ka vaonhi. 46Khukhani hi tsula, se a hafuhi awu a lavako ku ni ningela!”
Kuñolwa ka Jesu
(Marku 14:43-50; Luka 22:47-53; Johani 18:3-12)
47Ene a di ngadi a txi womba tiya, konaho ku to bwaka Judha, mmweyo wa va digumi ni vambidi, ni dibutho da hombe da vathu kumweko nayo, na va di ni matxhari ni migomba, va txi ta ngu kurumwa ngu vaphaxeli va hombe ni madhota a ditiko. 48Se mningeli a ti ti langanile navo txikombiso txiya: “Awule ni na ku mu pswopswa, ngeneyo, mu ñoleni.” 49Konako, Judha a to tshuketa hafuhi ka Jesu a txi khene: “Xeweni, M'gondisi!” Se e mu pswopswa. 50Jesu a to mu angula a txi khene: “Mndoni, kasi u tete ku ta maha txani kani?” Sekoko vona va to mtshuketela, ve yisa mawoko hammidi ka Jesu, ve mñola.
51Mmweyo wa vale va nga ti kumweko ni Jesu, a to swomola ditxhari dakwe e peka txithumi txa mphaxeli wa hombe, e txi wila nzeve. 52Sekoko Jesu a to khene kwakwe: “Tshumeta ditxhari dako msavani ka dona, nguko votshe vale va na kuthumisa ditxhari, va na loviswa ngu ditxhari. 53Ina u pimisa ti to ni nga tandeka kukombela ka Tate wangu e ni rumela kunukunukuwa mitxawa ya tingelozi, ya kupinda digumi ni yimbidi kani? 54Se yi na tatisekisa kutxani Mibhalo yi yi wombako ti taku: Totshe tiya ti fanela kumaheka?”
55Sekoko Jesu a to khene ka dibutho: “Mi tela ku ta ni ñola mi di xomile matxhari ni migomba, nga no va dikhokhokho kani? Ditshiku ni ditshiku ni ti zumba hagari kwanu, ni gondisa Dithepeleni, aniko kha ma ni ñola. 56Sekoko totshe tiya, ti mahekile kasi kutatiseka Mibhalo ya vaprofeti.” Ngu konaho votshe vagondiswa, va to mleka, ve thava.
Jesu a txi yiswa kulamulwani
(Marku 14:53-65; Luka 22:54-55,63-71; Johani 18:13-14,19-24)
57Ava va nga ta ñola Jesu, va to mu yisa m'tini ka Kayifasi, i nga ti mphaxeli wa hombe, ahawa vabhali ni madhota a ditiko va nga ti sengelatanile kona. 58Pedro a ti mu londisela a di kule kala kuhoka digumani ka mphaxeli wa hombe. Se a di hokile hafuhi, a to wulela e khalahatsha kumweko ni sithumi, kasi kuwona magwito a totshe timhaka. 59Vaphaxeli va hombe ni dotshe dibanza va to lava wufakazi wa makuhu ha mmidi ka Jesu, kasiku e mana kudawa. 60Aniko kha va wu mana, hambiko ti nga humelela tifakazi ta tingi ta makuhu. Va gwitile ngu vambidi, 61#Wona ni ka: Joh. 2:19. ava va nga kha vona: “Awuwa m'thu a ti khene: ‘Ni nga sikota kukhundumusa Dithepele da Txizimu ni tshumela ni di aketa ngu masiku mararu.’ ” 62Konaho a to khukha mphaxeli wa hombe a txi khene kwakwe: “Khu xamuli txilo ka mhaka yi va ku mangalelako ngu yona kani?” 63Aniko Jesu a to simama e malala. Se mphaxeli wa hombe a to mu gela a txi khene: “Na ku xambanyisa ngu Txizimu txi txi hanyako ti to u hi gela mwendo ngawe Mesiya, Mwanana wa Txizimu kani?” 64Jesu a to xamula a txi khene: “U wombile tona. Se nanani na mi gela tito, kukhukhela konkuwa, mi na wona Mwanana wa M'thu, a di khalahatshile txineneni ka Txizimu, Nyamne wa Mtamo wotshe, a txi ta ngu txitimwi ka marefu a nzumani.” 65Sekoko mphaxeli wa hombe a to vharula syambalo sakwe, a txi khene:
“A rukile Txizimu! Hi ngadi hi txi lava wufakazi wa txani kani? Mi mu engisile konkuwa, a txi ruka Txizimu.” 66Mi wona to txani kani?
Vona va to xamula va txi kha vona:
“A fenetwe ngu kufa!” 67Sekoko va to khata ku mu thurela khoheni, ve mpeka ngu sibhakela. Vamwani va txi mu haphata ngu mipama, va txi kha vona: 68“Mesiya, hinga huta: I mani a nga kupeka kani?”
Pedro e kaneta Jesu
(Marku 14:66-72; Luka 22:56-62; Johani 18:15-18,25-27)
69Ka yoneyo mbimo, Pedro a ti khalahatshile hahanze, digumani. Se mmweyo wa txithumi txa wamsikati a to tshuketa hafuhi kwakwe, a txi khene: “Anawe u ti kumweko ni Jesu wa Galileya.” 70Aniko ene a kanetile masoni ka votshe, a txi khene: “Kha ni tizivi eto u wombako.” 71Se a di khukhile ha txikeni, a to wonwa ngu tximwani txithumi txa wamsikati, awu a nga gela ava va nga ti ti ho konaho, a txi khene: “Awuwa nene a ti kumweko ni Jesu wa Nazareta.” 72Ene a to kaneta kambe, na a txi xambanya, a txi khene: “Ani kha ni mu zivi eyo m'thu!” 73Se ngu msana ka mbimo yokari, va to tshuketela hafuhi ava va nga ti konaho, va txi kha vona ka Pedro: “Kha ditshuri, na nawe u mmweyo wawe, nguko mawombawombelo ako ma kumangala.” 74Sekoko a to khata kuruketela, e xambanya a txi khene: “Kha ni mu zivi eyo m'thu!” Se ka yoneyo mbimo mkuku wu nje kuemba. 75Sekoko, Pedro a to alakanya mapswi a Jesu, a nga khene: “Wu sinzi kuemba mkuku, u na ni lamba kararu.” Msana keto, a to huma hahanze e dila ngu kupandiseka.
Currently Selected:
Matewu 26: BEC2016
Highlight
Share
Copy
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.