Jeremiya 51
51
Kumwani kukonwa ka Bhabhilona
1 Mkoma a womba tiya:
Wonani ti to ni na wusa moya wu wu no khundumusela Bhabhilona, ni vaaki va kona, avale va ni lwisako. 2Kambe ni na rumela ka Bhabhilona vamatiko va txi ta mu hehera, ve siya ditiko dakwe i ti diphanga; nguko va na mu wukela ngu ka otshe madhawa, ngu ditshiku da phango. 3Nyatingove a domba wulaho wakwe ka wule a dombako wulaho nene, ni ka wule a ti thembiselako txikatawu txa txikete; kambe mi nga divaleleni mazambi akwe; fuvisani yotshe yimbi yakwe. 4Ni vathu va na va va di fite ditikoni ka Vakaldheya, na va di hingamete mu ka tiruwa. 5Nguko Isreyeli ni Judha kha va lekwa ngu Txizimu txawe, ngu Mkoma wa Mabutho a Tiyimbi, hambi i ti ku ngako ditiko dawe di di tate ngu sionho masoni ka wo Sawuleka wa Israyeli. 6Khukhani hagari ka Bhabhilona, mmweyo ni mmweyo a na txhatxhise dihika dakwe; mi nga ti loviseni anu ngu wubihi wakwe; nguko ayiya ngu yona mbimo ya kupharela ka Mkoma; ene a na mninga hakhelo yakwe. 7Bhabhilona i ti ti kopo ya nzalama manzani ka Mkoma, ayi yi nga ti ti levisa dotshe ditiko; Matiko ma sete vhinya yakwe; ngu mhaka yeto matiko ma xangile. 8Ngu mbimo ya yidotho, Bhabhilona a wite, a fuvisilwe; m'dileleni, thelani mrende wo malata kupanda kwakwe, mwendo ku na hola.
9Hi duketile ku mu hanyisa Bhabhilona, aniko kha kalamuka. Mlekeni, mmweyo ni mmweyo a na tsule ditikoni kwakwe: Nguko kulamulwa kwakwe kuhokile nzumani, ka marefu a txitimwi ngutu.
10 Mkoma a wonekisile ha kubasani wululami wathu kwathu,
ngonani hi ta xawutela ka Siyoni, mthumo wa Mkoma, Txizimu txathu.
11Guvani tingove tanu, longiselani ngu ditshuri sitxhangu sanu; Mkoma a wusile moya wa vamidhiyani; nguko a lwela kuhasamula Bhabhilona; ina, nguko akuwa ngu kona kupharela ka Mkoma, ngu pharela ka mbimo ya kona. 12Gwimbani m'jeke txitimwi ka diguma da Bhabhilona, tsanisani wuwoneleli, vekani vaemeli, ti longiseleni wotshe wurena;
nguko Mkoma a xuvile kambe a mahile tile a nga nga ti womba xungetano ngu vaaki va Bhabhilona. 13#Wona ni ka: Mtu. 17:1. O awe u zumbako ka matiko amangi, wa kufuma ngu tithomba! Ma hokile magwito ako, mpimo wa likungo lako. 14Mkoma wa Mabutho a Tiyimbi a xambanyile ngu ngene apune, a txi khene: Nguditshuri ni na ku tatela vavamna, ku nga tindata, vona va na embelela ngu kutsaka xungetano ni nawe.
Ndando ya kudhumisa Txizimu
15Ene a mahile ditiko ni mafu ngu mtamo wakwe,
e folisela ditiko ngu wuzivi wakwe,
se e nawuluta nzuma ngu mapimo akwe.
16A txi pfalisa dipswi ngu kudhinda ka hombe
ka mati nzumani, ni tihunguva,
kukhukhela magwito ka mafu:
Wa maha kukeluka ma txi wa mati,
ni kuhumisa moya ngu mu wu zumbako kona.
17Va mahile vo mbi ziva votshe,
ku timeletwe sotshe sifananiso so mahwa ngu nzalama;
nguko sifananiso sawe so nyivilikiswa nza makuhu,
ni txa tximwetxo kha txi nga ni moya.
18Kha yi vhuni txilo mithumo ya wukanganyisi wawe:
Mbimo yi ani ni no va tsayisa, va na lova.
19 Mkoma wa Jakobe kha fani ni vawe;
nguko ene M'vangi wa sotshe;
kambe Israyeli lihunzu la thomba yakwe.
Bhabhilona mtamo wa kukhundumusa, wa manzani ka Txizimu
20Awe ngawe hamela yangu ni matxhari angu a yimbi,
kumweko ni nawe ni na tshatulela matiko,
kambe kumweko ni nawe ni na khundumusela vafumeli;
21kambe kumweko ni nawe ni phatulela dihantxhi ni m'gadhi wa dona;
kambe kumweko ni nawe ni na phatulela txikotxikani
ni wule a ku ka txona;
22kambe kumweko ni nawe ni na phatulela wamwamna ni wamsikati;
kambe kumweko ni nawe ni na phatulela wo kumba ni wamphya;
kambe kumweko ni nawe ni na phatulela dijaha ni dihorana;
23kambe kumweko ni nawe ni na phatulela m'dyisi ni mtxhambi wakwe;
kambe kumweko ni nawe ni phatulela m'dimi ni tihomu takwe tatimbidi;
kambe kumweko ni nawe ni na phatulela vathangeli va tiyimbi, ni vafumeli va kona.
Kutsayiswa ka Bhabhilona
24Ni na tshumetela Bhabhilona ni votshe vazumbi va Kaldheya, wotshe wubihi wawe wule va nga wu maha ka Siyoni, khoheni kwanu, kuwomba Mkoma.
25Ti wone, na kuwukela, awe mmango, mkhunduluseli, kuwomba Mkoma, u khundumusako dotshe ditiko, kambe ni na nawuluta dianza dangu, ni txi kurindilita amu marigwini, se ni na kuhisa ngu mndilo wa hombe. 26Kha ku na mbi tekwa kwako dirigwi do di thumisa, hambi dirigwi do khatisa, nguko u na va u di phwarasetwe do gwita, kuwomba Mkoma.
27Gwimbani m'jeke amu ditikoni, vetani mpundu hagari ka matiko, sawulekisani matiko o wukela ene, kujetelani ti to yi txi mlwisa mifumo ya Ararati, Mini ni Asikenazi; rumani mthangeli wa yimbi a txi ya mu wukela, kwelisani mahantxhi nga tindata. 28Sawulekisani matiko kupinda ene, vafumeli va Medhiya, vathangeli va tiyimbi ni votshe vafumeli vawe, ni dotshe ditiko di va di fumako. 29Ngu toneto, ma na zinginika mafu, ma na pfa kupanda, nguko kuwomba kumweko ka Mkoma kutsanisa kuwukela Bhabhilona, kasi kumaha ti to ditiko da Bhabhilona di txi fuviswa, di si mani vazumbi. 30Avale va ku ni mitamo amu Bhabhilona va lekile kulwa, va mule ko wonelela, yi gumile mitamo yawe, va txi nga mbavasikati: Ti hisilwe tinyumba mitini kwawe, kufunyilwe sikhweketo. 31Mtumi wu na tutumelana ni wumwani, ni muwombi wa dipswi a na manana ni mmwani, kasi kuya zivisa ka mfumeli wa Bhabhilona ti to didhoropa dakwe di tekilwe dotshe. 32Mabeloni ka minambo ku tekilwe, ni titshava ti hisilwe ngu mndilo; vavamna va yimbi va randetwe ngu kuthava. 33Nguko a khene kha Mkoma wa Mabutho a Tiyimbi, Txizimu txa Israyeli: Mwanana wa dihorana wa Bhabhilona a fana ni wukhalo wo hula ka wona ngu mbimo yo funyela: Ngu mbimo yayidotho ku na hoka kuelula.
34Nebhukodhonosori, mfumeli wa Bhabhilona,
a ni vhandamulete, e ni ganyatela,
a ni mahile txiya txa diphanga,
a ni mitile nga mwamilambo,
a tatile mrumbu wakwe ngu silo sangu sa sinene;
a ni tshotshile hahanze.
35Mihumbo yo nga yi yi nga mahwa kwangu ni ka vathu vangu,
yi nata txitimwi ka Bhabhilona,
a na womba wule a zumbako Siyoni,
kambe mnoha wangu wu na thekele txitimwi ka vazumbi va Kaldheya,
womba awe Jerusalema.
Txizimu txi na vhuna Israyeli
36Se a nje khene kha Mkoma:
Wona ti to ni na emela mhaka yako, ni na pharela ngu kupharela ko dinganawe; ni na omisa linene lako, ni na maha ti to me guma mati a kona. 37Se Bhabhilona a na maha mmumbu, m'ti wa vamwamilambo, txixamaliso txo vetisa miloti, ku si nga ni muaki ni wammweyo. 38Va na bhonga votshe nga vanana va ngonyamo; va na ngurangura nga singonyamwana. 39Aha va no vhutuka ni na va ninga wusuke wawe, ni na va levisa, va na ndaka-ndaka, aniko va na otela wukohe wa kwa mbi gwita, kha va na mbi wuka, kuwomba Mkoma. 40Ni na va releta nga sinvutana wudayeloni, nga tihamba ni vamabhongwe.
Kuwa ka Bhabhilona
41Eto a nga tekiswa tona Sesake, ni ti wu nga khakhetisiswa tona wudhumo wa mafu! Nga tile a nga mahisa tona Bhabhilona kuxamalisa matiko! 42Linene li gulekile kupinda Bhabhilona, li txi mfenengeta ngu mavimbi amangi. 43Madhoropa akwe ma mahile marumbi, ditiko da txigwangwa da txiwula, ditiko da kwa mbi na vo zumba, hambi kupinda ngu kona mwanana wa m'thu. 44Ni na tsayisa Bheli kona Bhabhilona, ni na mkosisa asile a nga si mita, kha na mbi ngadi e dhundwa kambe ngu matiko.
Ni diguma da Bhabhilona di wite. 45Anu vathu vangu humani hagari kwawe, mmweyo ni mmweyo a na hulukisa dihika dakwe, ngu mhaka ya kutura ka kuhenya ka Mkoma. 46Aniko yi nga karale mbilu yanu, kambe mi nga thaveni wudhumo wo pfala ditikoni, nguko ku nata ka dilembe dimwedo wudhumo, se ngu ka dimwani dilembe wu txi ta wumwani wudhumo; kambe ku na vaho kulwa ditikoni, mkhozisi a txi wukela mmwani mkhozisi. 47Ngu toneto, ma nata masiku ale ni nota tsayisa sifananiso sa Bhabhilona, ni dotshe ditiko dakwe di na thelwa tingana, ni votshe vathu va no dawa va na wela hagari kwakwe. 48Se nzuma ni mafu ni sotshe si si kuho, si na tsakela Bhabhilona; nguko ngu Wuphemba va nata vahasamuli, kuwomba Mkoma. 49#Wona ni ka: Mtu. 18:24. Nga kule Bhabhilona a nga wisa vafi va Israyeli, nga toneto Bhabhilona ku na wiswa votshe vafi va ditiko.
Dipswi ka Vajudha va di Bhabhilona
50Anu mi nga huluka ditxhari, tsulani, mi nga emeni;
na mi di kule alakanyani Mkoma, a na guletwe Jerusalema timbiluni kwanu. 51Mi na khanu: Hi thetwe tingana, nguko hi pfite txiruko; tingana ti fenengetile tikhohe tathu, nguko vamatiko va wulete makhaloni ko sawuleka a Nyumbani ka Mkoma. 52Sekoko ma nata masiku, kuwomba Mkoma, ale ni no tsayisa sifananiso sawe; va na keta amu ditikoni votshe vale va nga tholetelwa. 53Hambi i di kova ku Bhabhilona a nga kwela nzumani, mwendo kutsanisa kuguleka ka diguma dakwe, ni ndi na m'rumela vaxaseli, kuwomba Mkoma.
Kukhundumuswa ka Bhabhilona
54Ku pfate huwa ya kudila yitako ngu Bhabhilona,
ni kukhundumuselwa ka hombe
ka ditiko da Vakaldheya.
55Nguko Mkoma wa khundumusa Bhabhilona,
a na fuvisa ni dipswi da kona: Kubhibhika kwakwe
ku na fana ni mavimbi a mati amangi,
ku na pfala ni diguwa da ona.
56Nguko mxaseli wata txitimwi ka dona,
txitimwi ka Bhabhilona, tindena takwe ti na ñolwa,
ma funyetetwe malaho a tona:
Nguko Mkoma Njizimu txo tshumetela, a na pharela.
57Ni na levisa tinduna takwe ni titxhari takwe,
ni vathangeli va tiyimbi, ni vafumeli vakwe,
ni tindena takwe; va na mana wukohe wo mbi guma,
kha va na mbi wuka, kuwomba Mkoma,
awu ditina dakwe i ku Mkoma wa Mabutho a Tiyimbi.
58 Mkoma wa Mabutho a Tiyimbi a khene:
Maguma o anama a Bhabhilona,
kha ditshuri ma na wiswa, ni matimba akwe o tshura
ma na hiswa ngu mndilo, ma txi karala.
Dipswi da Jeremiya di rumelwa Bhabhilona
59Dipswi di a nga rumela Jeremiya mprofeti, ka Serayasi, i nga ti ti mthangeli hahatshi ka mlayo wa Zedhekiya, mfumeli wa Judha, kona Bhabhilona, ka dilembe da wumune da kufuma kwakwe; kambe Serayasi i ti ti mthangeli wo thutha. 60Jeremiya a to bhala amu ka dibhuku, kotshe kubiha kule ku nota txitimwi ka Bhabhilona; otshe mapswi ale ma nga ti bhatwe o wukela Bhabhilona. 61Se Jeremiya a ti khene ka Serayasi:
Aha u no hoka Bhabhilona, u na ma wona ni kugonda otshe mapswi awa. 62Kambe u na khawe: Mkoma! Awe u wombawombile ngu wukhalo wuwa, ti taku u na wu fuvisa, ku na za ku si sali ni wammweyo wo zumba, hambi m'thu mwendo txihari, aniko ku na maha marumbi o gwita. 63Se aha u no gwita kugonda dibhuku diya, u na di sunga ha ka dirigwi u txi di vinza hagari ka Ewufrate. 64Se u na khawe: A na bhwabhwamelisa tona tiya Bhabhilona, kha na mbi deluka, ngu mhaka ya wubihi wule ni no wu tisa txitimwi kwakwe, se vona va na karala. Mapswi a Jeremiya ma ema hawa.
Currently Selected:
Jeremiya 51: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
