Jeremiya 37
37
Txikombelo txa Zedhekiya
1 # Wona ni ka: 2 Vafu. 24:17; 2 Mak. 36:10. Zedhekiya, mwana Josiya, a to vekwa ngu Nabhukodhonozori, mfumeli wa Bhabhilona, kumaha mfumeli wa ditiko da ka Judha, ka wukhalo wa Koniya, mwana Jehoyakimu. 2Aniko ene ni sithumi sakwe ni vathu va ditiko, kha va engisa timhaka ta Mkoma ati a nga womba ngu txisofu txa mprofeti Jeremiya.
3Mfumeli Zedhekiya a to ruma Jehukali, mwana Selemiya, ni Zefaniya, mwana Mahaseya, mphaxeli, ka Jeremiya, a txi ya khene:
Hi kombelele kona kuwa masoni ka Mkoma, Txizimu txathu.
4Se ka yoneyo mbimo Jeremiya a ti ti wulela ni kuhuma hagari ka vathu, nguko asi se wuletwa ku khotelwani. 5Yimbi ya Faro yi to huma ngu Egipta, sekoko Vakaldheya ava va nga ranganyeta Jerusalema, ngako va ti ti pfite va to khukha Jerusalema.
6Sekoko mhaka ya Mkoma yi to ta ka mprofeti Jeremiya: 7Mkoma, Txizimu txa Israyeli, a khene: Gelani mfumeli wa ka Judha awu a nga mi ruma kwangu ku ta ni wotisa, mi txi khanu:
Wona taku dibutho da Faro adi di nga tela ku ta mi vhuna, di na tshumelela Egipta ditikoni ka dona. 8Vakaldheya va na wuya, ve ta wukela didhoropa diya, va txi di khozisa ni kudihisa ngu mndilo. 9Mkoma a khene: Mi nga ti kanganyiseni, mi txi khanu: Vakaldheya va na khukha hagari kwathu, nguko kha va na mbi khukha. 10Nguko hambi i ti ku mi ti ko tshinda yotshe yimbi ya Vakaldheya va va mi wukelako, na ku ti sate dwe vo dayiswa, mmweyo ni mmweyo wawe a ndi na huma ngu ditendani kwawe, a txi ta hisa didhoropa diya.
Jeremiya a txi ñolwa
11Ku ti ngako yimbi ya Vakaldheya yi ti khukhile masoni ka Jerusalema ngu kuthava yimbi ya Faro. 12Jeremiya a to huma ngu Jerusalema a txi ya ditikoni ka Bhenjamini, kuva a txi ya henjeleta txipeto hagari ka vathu. 13Ku ti ngako a txi nge hoka txikenini ka Bhenjamini, mthangeli wa vawoneleli a ti ti kona kheyo, ditina dakwe i Irija, mwana Xelemiya, mwana Hananiya, awu a nga ñola mprofeti Jeremiya, a txi khene:
Awe, u lava ku ti ningela ka Vakaldheya!
14Jeremiya e xamula a txi khene: Eto makuhu, kha ni tutumeli ka Vakaldheya.
Aniko Jeriya kha mu engisa, a to ñola Jeremiya, a txi mu yisa ka vathangeli. 15Vanana va mfumeli va to henya ngutu ngu Jeremiya, va txi mpeka, va txi mkhotela nyumbani ka Jonatani mabhalani, nguko va nga ti yi mahile mkora. 16Jeremiya a to wuletwa mkorani, a to zumba maphalani ka kona masiku o tala,
17mfumeli Zedhekiya a to rumela kuya m'humisa, se mfumeli a to m'dhana ngu txihunja nyumbani kwakwe, a txi khene:
Ina di nga vaho dipswi ngu ka Mkoma kani? Jeremiya a to xamula, a txi khene:
Diho. E engeta a txi khene: Awe u na ningelwa manzani ka mfumeli wa Bhabhilona.
18Sekoko Jeremiya a to wotisa ka mfumeli Zedhekiya, a txi khene:
Kasi ni to kuonhela txani, ni sithumi sako, ni vathu vava, miza mi txi ni khotela kani? 19Va hani koko vaprofeti vanu avale va nga txi profeta kwanu, va txi khene: Mfumeli wa Bhabhilona kha na mbi mi wukela hambi kuwukela ditiko diya kani? 20Sekoko mfumeli, nyamne wangu, pfana txikombelo txangu, u nga ni tshumetele nyumbani ka Jonatani mabhalani, ni nga fela kona.
21Sekoko mfumeli Zedhekiya, a to va ruma ti to Jeremiya a txi vekwa dizumboni ka vawoneleli; e ningwa dipawu dimwedo ditshiku ni ditshiku ka digondo da vabhiki va mapawu, ma txi za otshe mapawu me guma didhoropani. Na Jeremiya a ti dizumboni ka vawoneleli.
Currently Selected:
Jeremiya 37: BEC2016
Highlight
Share
Compare
Copy
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
