Jeremiya 27
27
Dikange da dipulango
1Kukhata ka kufuma ka Jehoyakimu, mwana Josiya, mfumeli wa ka Judha, yi tile mhaka yiya ngu ka Mkoma, yi txi kha yona: 2Mkoma a ti khene kwangu: Ti mahele majoke ni makange u txi si hayeka thamoni kwako. 3Msana keto, u na si rumela ka mfumeli wa Edhomi, ni ka mfumeli wa Mowabhi, ni ka mfumeli wa vanana va ka Amoni, ni ka mfumeli wa Tiro, ni ka mfumeli wa Sidhoni, ngu mitumi yi yi nga ta Jerusalema ka Zedhekiya, mfumeli wa ka Judha. 4U na va ruma ka vafumeli vawe, u txi khawe: Mkoma wa Mabutho a Tiyimbi, Txizimu txa Israyeli, a khene: Gelani vafumeli vanu, mi txi khanu:
5Ngani ni nga va nga ditiko, ni vathu, ni sihari si si kuho ha mafuni, ngu mtamo wangu wa hombe ni diwoko dangu di nga nawuluka, na si ninga ka wu ni randako ku mninga. 6Sekoko ni ningete otshe matiko awa, manzani ka txithumi txangu Nebhukodhonosori, mfumeli wa Bhabhilona; na mninga ni sihari sa txitinga kuva si txi mthumela. 7Otshe matiko ma na mthumela, ene ni mwanana wakwe ni mtukulu wakwe, kala ku txi hoka mbimo ya ditiko dakwe, ngu msana keto nene a na khoziswa, ngu matiko amangi ni vafumeli va hombe.
8Ni dihi ditiko mwendo mfumo wuwa wu no lamba kukhoza ka Nebhukodhonosori, mfumeli wa Bhabhilona, va no lamba ku namisa tithamo tawe hahatshi ka dikange da mfumeli wa Bhabhilona, ni na peka ditiko edo ngu ditxhari, ni nzala, ni mtungu, kuwomba Mkoma, kala ni txi di bhi, ngu diwoko dakwe. 9Ngu konaho, mi nga dhuke mi txi engisa vaprofeti vanu, ni vale vo hutetela, ni miloro yanu, ni mitimu yanu, hambi matiloti anu, ngako va txi womba kwanu, va txi kha vona: Mi nga thumeleni mfumeli wa Bhabhilona! 10Nguko makuhu va profetako kwanu, kasi ku mi txi huma ditikoni kwanu mi txi yiswa kule; kuva ni txi na mi tutumisa, mi txi ya lova. 11Aniko ditiko di di no tumela ku sanzekwa dikange da mfumeli wa Bhabhilona, di txi mthumela, ni na di leka wukhaloni ka dona, kuwomba Mkoma, va na dima ni ku ti akela kona emo.
12Se tona timhaketo, ni ti wombile ka Zedhekiya, mfumeli wa ka Judha, ni txi khani:
Wuletani tithamo tanu amu ka dikange da mfumeli wa Bhabhilona; mi na hanya ngako mi txi mthumela ni vathu vakwe. 13Awe ni vathu vako, mi fela txani ngu ditxhari ni nzala ni mtungu, nga ku Mkoma a nga womba ngu ditiko di di no lamba kukhoza ka mfumeli wa Bhabhilona kani? 14Mi nga dhuke mi txi engisa mapswi a vaprofeti va va ku kha vona kwanu: Mi nga thumeleni mfumeli wa Bhabhilona; nguko vo mi profetela makuhu. 15Nguko kha na va ruma, kuwomba Mkoma, vo profeta makuhu ngu ditina dangu, ku va ani ni txi na mi hangalasa, mi txi lova, anu ni vo va va mi profetelako makuhu.
16Kambe ni gete vaphaxeli ni votshe vathu, ni txi khani:
Mkoma a khene mi nga engiseni mapswi a vaprofeti vanu, ava va profetako kwanu, va txi kha vona: Sekoko siya sa Nyumba ya Mkoma si na wuya kona kuwa ngu Bhabhilona, nguko vo ni profetela makuhu. 17Mi nga va engiseni, thumelani mfumeli wa Bhabhilona, mi na hanya; ngu kutxani mi dayako didhoropa diya di txi maha dirumbi kani? 18Ngu konaho, ngako i di vaprofeti, ni kungako mhaka ya Mkoma yi di kumweko navo, khongelani konakuwa, ka Mkoma wa Mabutho a Tiyimbi, ti taku, siya si si nga sala Nyumbani ka Mkoma, ni nyumbani ka mfumeli wa ka Judha, ni Jerusalema, si nga tekwe si txi yiswa Bhabhilona.
19Nguko Mkoma wa Mabutho a Tiyimbi, a khene xungetano ngu tiphande, ni linene, ni sikazelo ni simwani siya, asi si nga sala didhoropani, 20asile Nebhukodhonosori, mfumeli wa Bhabhuilona, a nga mbi si teka, ngako a di ñote Jokoniya, mwana Jehoyakimu, mfumeli wa ka Judha, ngu Jerusalema a txi mu yisa Bhabhilona, ni sotshe sitetema sa ka Judha, ni Jerusalema.
21Ngu toneto, koko, Mkoma wa Mabutho a Tiyimbi, Txizimu txa Israyeli, a khene xungetano ngu siya si si nga sala Nyumbani ka Mkoma, ni mu nyumbani ka mfumeli wa ka Judha, ni Jerusalema: 22Si na yiswa Bhabhilona si txi ya zumba kona, kala ka ditshiku di ni no si lava ngu dona, kuwomba Mkoma, ni txi si wuyisa ka wuwa wukhalo.
Currently Selected:
Jeremiya 27: BEC2016
Highlight
Share
Compare
Copy
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
