Jeremiya 14
14
Txihala txa hombe
1Dipswi da Mkoma di tile Jerusalema xungetano ni nzala ngu mhaka ya txihala.
2Judha wa dila, miti yakwe yi gumile mtamo,
va khalahatsha na va di ambate mizila;
Huwa ya pfala ngu Jerusalema.
3Vahombe vawe va rumile vavadotho kuya lava mati.
Va txita sisimani kha va mani mati,
va tshumela ni tifuko tawe ta maphanga.
Vapfa tingana va txi goo!
Na va txi fenengeta misungo yawe.
4Vadimi va wiswa tingana,
ve fenengeta misungo yawe.
Nguko mafu ma bhandekile,
ngu mhaka ya kupwateka ka mati ha mafuni.
5Mhoti ni yona amu txitingani,
yi leka tximhotyana txo ngadi kuvelekwa,
ngu kupwateka ka mwasi.
6Timangwa ti emile mimangoni,
to bhibhikelana kufana ni vanyapwe;
maso a tona ma pfhupete,
ngu kupwateka ka mwasi wa wuphya.
7Hambi ngako sionho sathu si txi hi xowokisa,
awe Mkoma hi vhune ngu mhaka ya ditina dako.
Nguko hi tiwukile kakungi, hi txi kuonhela.
8Awe u kuthemba ya Israyeli,
Muhanyisi wathu ka mbimo ya sikarato,
ngu kutxani u txi nga u wa matiko ditikoni,
nga muendi wu a hambukako
kasi e fungala wusiku wumwewo kani?
9Ngu kutxani u txi nga u m'thu wo dhukiswa,
nga ndena yile yi si sikotiko kuhanyisa kani?
Kuve awe waho hagari kwathu, awe Mkoma,
hi dhanwa ngu ditina dako;
u nga hi leke!
10 Mkoma a womba ngu ditiko diya, a txi khene:
Va dhunda kupeperukela nga tiya, kha va ti ñola kutsimbilani kwawe; ngukonaho, Mkoma kha tsakiswi ngu vona; se a na alakanya wubihi wawe, e tsayisa sionho sawe.
11Sekoko Mkoma a ti khene kwangu:
U nga vakombelele wunene vathu vava. 12Ngako va txi titona, kha ni na mbi pfa kudila kwawe; ngako va txi ningela mphaxo wo hiswa ni wa sakudya, kha ni na mbi wu tsakela, aniko ni na va lovisa ngu ditxhari, ni nzala ni mtungu.
13Se ani ni ti khani:
Ha, Mkoma, Txizimu, vaprofeti va womba kwawe, va txi kha vona: Kha mi na mbi wona ditxhari, hambi kuve ni nzala; aniko a na mi ninga kuthutha ko tsana ka wuwa wukhalo.
14 Mkoma a to ni xamula, a txi khene:
Vaprofeti va profeta makuhu ngu ditina dangu; kha na va ruka, kha na va laya; kha na womba txilo kwawe. Va profeta kwangu siwoniso sa makuhu ni kuhuta, ta walo to divalisa timbilu tawe. 15Ngu konaho, Mkoma a womba eto madingano ni vaprofeti vale va profetako ngu ditina dangu, na ni sa va ruma, ava va ku kha vona: Ditxhari ni nzala kha si na mbi va ho ditikoni muwa, a txi khene: Vaprofeti va na loviswa ngu ditxhari ni nzala. 16Vathuvo ku nga profetwa kwawe va na tshotshwa magondoni ka Jerusalema ngu mhaka ya nzala ni ditxhari, kha ku na mbi va ho wo va tshotsha: Vona ni vasikati vawe, ni vanana vawe va txiwamna ni va txisikati; nguko ani ni na tshakunuta wubihi wawe txitimwi kwawe.
17U na va gela, u txi khawe:
Maso angu ma dila mirongo wusiku ni mitshikari, kha yi emi;
nguko wotuma, mwanana wa vathu vangu
a dayisilwe ka hombe,
ni txilonda txa hombe txi thisako.
18Nguko ni txi ya wona thembweni
vaho va va nga dayiswa ngu ditxhari.
Ni ku ngako ni txi wulela m'tini ni wona va va fako ngu nzala:
Ina ngu wumbidi wawe mprofeti ni mphaxeli
va zungulukela na va si kuzivi aha vayako kona.
Vathu va ti sola sionho sawe
19Ina u mlekete magwito Judha kani?
Mwendo u ngava u di swirekile mbiluni ngu Siyoni kani?
Ngu kutxani u nga hi pekisa ti to hi si sikoti ni kuthumwa kani?
Hi ti verete kuthutha, aniko wunene kha wa woneka;
Hi verete mbimo yo thumwa, na kuve kuthava kuho!
20Athu ha ziva kubiha kwathu, awe Mkoma,
ni sionho sa vatate vathu,
nguko athu hi kuonhete.
21Ngu mhaka ya ditina dako,
u nga swireke ngu ngathu,
u nga wise tingana txikhalo txako txa wukoma:
Alakanya txitumelelano txako ni nathu, u nga txi funye;
22ina txiho txifananiso hagari ka vamatiko
txi sikotako kunisa mati kani?
Mwendo nzuma yi nga sikota kunisa mati yipune kani?
Ina hi ngawe kani Mkoma, Txizimu txathu kani?
Ngu konaho, hi na kuverela, nguko ngawe u nga maha sotshe siya.
Currently Selected:
Jeremiya 14: BEC2016
Highlight
Share
Compare
Copy
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
