Jeremiya 1
1
1Dipswi da Jeremiya, mwana Hilikiya, mmweyo wa vaphaxeli va nga ti ti Anatote, ditikoni ka Bhenjamini. 2Awu dipswi da Mkoma di nga ta kwakwe, ka masiku a Josiya,#Wona ni ka: 2 Vafu. 22:3--23:27; 2 Mak. 34:8-35. mwana Amoni, mfumeli wa ka Judha, ngu dilembe da digumi ni mararu da kufuma kwakwe. 3Di tile kambe, ngu masiku a Jehoyakimu,#Wona ni ka: 2 Vafu. 23:36--24:7; 2 Mak. 36:11-21. mwana Josiya, mfumeli wa ka Judha, kala magwito ka dilembe da digumi ni dimwedo da kufa ka Zedhekiya, mwana Josiya, mfumeli wa ka Judha, kala mbimo yile Jerusalema a nga yiswa wukarawani ngu mtxima wa wutxhanu.
Txizimu txi dhana Jeremiya
4Ngu kumaha keto, dipswi da Mkoma di tile kwangu, di txi ta kha dona:
5“Ni ku zivile ni si se kuwumba mndani ka mwamwako; kambe na u si se velekwa ni kusawute, kuva mprofeti wa matiko.”
6Sekoko ani ni ti khani:
“Oho! Mkoma Txizimu! Wona taku kha ni sikoti kuwombawomba; nguko ni mwanana!”
7Aniko Mkoma a to khene kwangu:
“U nga wombe ku khawe: Ni ngadi mwanana; nguko ni hayi ni no kuruma, u na tsula; se ni totshe ti ni no kugela u na ya womba. 8U nga thave masoni kwawe; nguko ni ni nawe, kasi ku ku hulukisa, kuwomba Mkoma!”
9Se Mkoma a to nawuluta dianza, e gwesa txisofu txangu, a txi khene kwangu Mkoma:
“Wona taku na veka mapswi angu txisofuni kwako. 10Wona, ka diya ditshiku, ni kuveka txitimwi ka matiko ni mifumo, kuva u dula ni kukhundumusa, kuhasamula ni kuwisa, kuaka ni kuphaya.”
11Di tile kwangu kambe dipswi da Mkoma di txi ta kha dona:
“Jeremiya, u wona txani kani?” Se ni nje khani:
“Ni wona didhavi da almonde.”
12 Mkoma a nje khene kwangu:
“U wonisisile, nguko ani ni verela ti to dipswi dangu di txi tatiseka.”
13Di to ta kwangu ka wumbidi dipswi da Mkoma, di txi ta kha dona:
“Njitxani u txi wonako kani?”
Ni to xamula ni txi khani:
“Ni wona khadi yi halako, txisofu txa yona txi ka didhawa da Wuphemba.”
14 Mkoma a nje khene kwangu:
“Dikhombo di nata ngu didhawa da Wuphemba, txitimwi ka votshe va ha mafuni. 15Nguko ni na dhana tixaka totshe ta matiko a Wuphemba, kuwomba Mkoma; ngu lixaka limwelo ni limwelo ni nata veka txikhalo txa lona txa wukoma, ha txikeni ka Jerusalema, ni kuwukela maguma a ma ranganyetako didhoropa, ni kuwukela otshe madhoropa a Judha. 16Se ani ni na womba malamulelo angu txitimwi kwawe, ngu mhaka ya wubihi wawe wotshe, nguko va ni lekile, veya hisela dibaselo simwani sizimu, ni kukhizama masoni ka mithumo ya manza awe. 17Awe koko, tisunge txiwunu txako, u ema, u va gela totshe ti ni no kuruma tona. Masoni kwawe u nga dhuke u thava, nguko ni nga kumaha u dhudhumela masoni kwawe. 18Nguko nyamsi ni kuvekile kufana ni dikhokhola da mtamo, phande ya txikete, ni diguma da msuku masoni ka ditiko dotshe, masoni ka vafumeli va ka Judha, ni vathangeli vawe, vaphaxeli vawe, ni vathu va ditiko. 19Va na lwa ni nawe, aniko kha va na mbi kuxula; nguko ani ni kumweko ni nawe, kasi ku kuhulukisa, kuwomba Mkoma.”
Currently Selected:
Jeremiya 1: BEC2016
Highlight
Share
Copy
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
