Hagayi 1
1
Txizimu txi ruma kuaketwa ka Dithepele
1Ka dilembe da wumbidi da mfumeli Dhariyo, ka mtxima wa wutxhanu ni wumwewo, ka ditshiku do khata da mtxima, kutile dipswi da Mkoma ngu ka mprofeti Hagayi, ka Zorobhabheli, mwana Salatiyeli, mthangeli wa Judha, ni ka Joxuwa, mwana Jozadhake, mphaxeli wa hombe, di txi kha dona: 2A wombisa tiya Mkoma wa Mabutho a Tiyimbi, a khene: Vathu vava va kha vona: Kha yi se hoka mbimo, mbimo yi Nyumba ya Mkoma yi dinganako kuakwa ngu yona.
3Sekoko dipswi da Mkoma, di tile ngu ka mprofeti Hagayi, di txi ta kha dona:
4Ina ngu yona mbimo yo anu mi zumba ka tinyumba tanu to thsuriselwa, se ayiya nyumba yi maha ditshatsha kani? 5Se konkuwa, Mkoma wa Mabutho a Tiyimbi a khene: Vekani timbilu tanu amu ka tinzila tanu. 6Mi phayile ngutu, kambe mi funyela ka kudotho; ma dya, aniko kha mi khuri; ma sela, aniko kha mi kolwi; ma ambala, aniko kha mi futumeli; ni wule a holako, a hola ka txikwamana txo doleka.
7 Mkoma wa Mabutho a Tiyimbi a khene: Vekani timbilu tanu amu ka tinzila tanu. 8Kwelani mmangoni mi txi ya teka mapulango, mi ta aka nyumba; se ni na tsaka ngu yona, kambe ni na dhumiswa, kuwomba Mkoma.
9Mi rinzete sasingi, aniko mi mani sa sidotho, ni soneso sa sidotho, mbimo yi mi nga si wuyisa m'tini, ani ni si futetile. Ngu kutxani kani? Kuwombile Mkoma wa Mabutho a Tiyimbi. Ngu mhaka ya nyumba yangu i ku ditshatsha, se mmweyo ni mmweyo wanu a tutumela nyumbani kakwe. 10Ngu konaho, nzuma yi zumbile ni mwando wa yona, se ni mafu ma zumbile ni mihando ya ona. 11Se ni tisile kuoma txitimwi ka mafu, ni txitimwi ka mimango, ni txitimwi ka fulaho, ni txitimwi ka mivhinya, ni txitimwi ka mafura, ni txitimwi ka sotshe asi mafu ma si humisako, kumweko ni txitimwi ka vathu, ni txitimwi ka sihari, ni txitimwi ka yotshe mithumo ya manza.
Vathu va londeta kuruma ka Txizimu
12Sekoko Zorobhabheli, mwana Salatiyeli, a to engisa, kumweko ni Joxuwa, mwana Jozadhake, mphaxeli wa hombe, ni votshe vathu vale va nga huluka, dipswi da Mkoma Txizimu txawe, ni mapswi a mprofeti Hagayi, nga tile Mkoma Txizimu txawe, a nga ti mrumisile tona; se vathu va to thava masoni ka Mkoma. 13Sekoko Hagayi txirumwa txa Mkoma, a to womba-womba ka vathu, mandingano ni mhaka ya Mkoma, a txi khene: Ani ni na ni nanu, kuwomba Mkoma.
14Se Mkoma a to wusa moya wa Zorobhabheli, mwana Salatiyeli, mthangeli wa Judha, ni moya wa Joxuwa, mwana Jozadhake, mphaxeli wa hombe, ni moya wa votshe vathu vale va nga huluka, se va to ta thuma Nyumbani ka Mkoma wa Mabutho a Tiyimbi, Txizimu txawe, 15ka ditshiku da magumi mambidi ni mune, ka mtxima wa wutxhanu ni wumwewo, ka dilembe da wumbidi da mfumeli Dhariyo.
Currently Selected:
Hagayi 1: BEC2016
Highlight
Share
Copy
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
