Ezra 3
3
Txiluvelo ni miphaxo
1Mbimo yile ku nga hoka mtxima wa wutxhanu ni yimbidi, na vanana va ka Israyeli va di wulete madhoropani, votshe vathu va to patana veva m'thu mmweyo, kona Jerusalema. 2#Wona ni ka: Eks. 27:1. Se Jesuwa mwana Jezadhake, ni vanawe, ni vaphaxeli, ni Zorobhabheli, mwana Sealtiyeli, ni vanawe, va to aka txiluvelo txa Txizimu txa Israyeli, txo ningelela kona miphaxo, nga tile ti nga bhalwa Mlayoni ka Mosi, m'thu wa Txizimu. 3Se va to tsanisa txiluvelo aha ka sitsikareto sa kona, nguko kuthava ku ti ti txitimwi kwawe, ngu mhaka ya vathu va matiko; kambe va to ningela kona miphaxo yo hiswa ka Mkoma, miphaxo yo hiswa mixo ni minova. 4#Wona ni ka: Mit. 29:12-38. Va to maha Mbuso wa Midhuti, nga tile ti nga bhalwa, ve ningela miphaxo yo hiswa ditshiku ni ditshiku, ngu kulondetelana, madingano ni txihena, tximwetxo ni tximwetxo ka ditshiku da txona; 5#Wona ni ka: Mit. 28:1--29:11. se msana keto, kusimama mphaxo wo hiswa, ni yile ya kumeka ka mtxima, ni ya yotshe mipipi yo sawuleka ka Mkoma, hambi ya ni wuhi a nga ningela ka Mkoma, ngu kuranda kwakwe. 6Kukhukhela ka ditshiku do khata ka mtxima wa wutxhanu ni yimbi, va to khata kuningela miphaxo yo hiswa ka Mkoma; kambe kusanzi kuvekwa sitsaniso sa dithepele da Mkoma.
Kukhata ka kuaketwa ka Dithepele
7Va to ningela male koko ka vale#3:7 Mwendo: vo aka ngu marigwi. vo aka ngu marigwi, vo wilela, va yimwani mithumo, ve va ninga sakudya, so sela, ni mtona ka Vasidhoni ni ka Vatiro, kasiku va na ya wuya ngu Jope ni mapulango, ngu mnamboni ka Kedhari, ngako va nga ti ningilwe ngu Siro, mfumeli wa Persiya.
8Se ka dilembe da wumbidi da kuta kwakwe Jerusalema Nyumbani ka Txizimu, ka mtxima wa wumbidi, Zorobhabheli, mwana Seyaltiyeli, ni Jesuwa mwana Jezadhake, ni vamwani vanawe, vaphaxeli ni Valevhi, ni votshe vale va nga wuya Jerusalema ngu wukhumbini, va to emisa Valevhi va tanga ya magumi mambidi a malembe ni kuya masoni, kasiku ve rwala mthumo wa kuakwa ka Nyumba ya Mkoma. 9Sekoko a to khukha Jesuwa ni vanana vakwe, ni vanawe, Kadhimiyeli ni vanana vakwe, ni vanana va Judha, nga m'thu mmweyo, kuva ve wonelela vale va nga ti aka Nyumba ya Txizimu, i ku vanana va Henadhadhe, ni vanana vawe, ni vanawe, i ku Valevhi.
10 # Wona ni ka: 1 Mak. 25:1. Mbimo yile vaaki va nga maha makhato a kuaka Dithepele da Mkoma, va to ti henjeleta vaphaxeli ni siya sawe ni mipundu, Valevhi i ku vanana va Asafe, ni sitende kasi kudhumisa Mkoma, madingano ni txileleto txa Dhavhidha, mfumeli wa ka Israyeli. 11Se va txi wuyelela kuembelela, va txi kulisa ni kudhumisa Mkoma,
nguko mnene;
“nguko wumbilu wakwe mbwa yotshe mbimo ka Israyeli!”
Se votshe vathu va to kwangula ngu kutsaka ka hombe, mbimo yile va nga dhumisa Mkoma, ngu kukhatwa ka Nyumba ya Mkoma. 12Sekoko wungi wa vaphaxeli ni Valevhi, ni vathangeli va vatate, sikosana, va nga wona nyumba yo khata kuakwa ka yona, ve yi wona masoni kwawe nyumba yiya, va to dila ngu mapswi o guleka; aniko votala va to guleta mapswi awe ngu kutsaka ni kunengela. 13Aha kaku ku si zivaneki kuhambana ka mapswi a kutsaka ni a kudila ka vathu; nguko vathu va to tsaka ngu kutsaka ka hombe ngutu, kuza mapswi me pfala kule ngutu.
Currently Selected:
Ezra 3: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
