Ezekhiyele 4
4
Dipswi madingano ni Jerusalema
1Txizimu txi ti kha txona:
Awe mwanana wa m'thu, teka txitini, u txi txi veka masoni kwako, u bhala ka txona didhoropa da Jerusalema. 2Bhala txikombiso txa kurandelwa ka dona ngu valala, u bhiya ngu diguma do tsana, veka so tshinga ngu sona, u veketela magovelo, ni so khundumusa ngu sona. 3Aniko, awe lava dipani da simbi, u txi di maha diguma hahanze, hagari kwako ni didhoropa, se u txi di rendekela; di na randeliswa eto, u na di randela; eto ti na maha txikombiso ka nyumba ya ka a Israyeli.
4Nanawe otela ngu didhawa da txibhabha, se u txi kombisa txionho txa nyumba ya ka Israyeli; madingano ni mtengo wa masiku ale u no otela, u na rwala wubihi wawe. 5Nguko ni vekile malembe a kuonha kwawe, o dingana ni 390 wa masiku; se u na rwala txionho txa nyumba ya ka Israyeli. 6Se u di mahile tiya, u na otela kambe ngu didhawa dako da txinene, u rwala txionho txa ka Judha, amu ka mune wa magumi a masiku; ni ku ningile ditshiku dimwedo ka dilembe ni dilembe.
7U na rendekelisa khohe yako koko ka diguma da Jerusalema, na u di nawulutile diwoko dako, se u na profeta u txi di kawuka. 8Kambe wona taku ni na kusunga ngu tingoti; kasi ku u si tshembereki u rendekela kheno ni kheno, kala kuza u txi heta masiku a kurandela kwako.
9Se awe teka fulaho, ni sevhadha, ni mahesa a wulombe, ni tinyemba, ni mahuva, ni mahila, u si thela mu ka txiya, u maha ngu sona dipawu; madingano ni mtengo wa masiku ale u no otela ngu didhawa, i ku 390 wa masiku, ngu soneso u no dya. 10Se sakudya si u no dya nzo dingana magumi mambidi a maxekele ngu ditshiku; u na dya ngu mbimo ni mbimo. 11Kambe u na sela mati ngu kupimela, mabhikiri mambidi ngu ditshiku; u na sela ngu mbimo ni mbimo. 12Se asi u no dya, si na nga txibhubhutela txa sevhadha, kambe u na si bhika ngu mitximba yi yi humako ngu ka m'thu, na va txi ti wona.
13Se Mkoma a to khene:
Ngu toneto, vanana va ka Israyeli va na dya dipawu dawe da nzambwa, ka ni dihi ditiko di va no tshotshwa ka dona.
14Sekoko ani ni to khani:
O! Mkoma Txizimu! Moya wangu kha wa bihiswa, nguko kha ni zivi ku nga dya txokari txa kufa, mwendo txo phatulelwa, kukhukhela wujahani kwangu kala kuwa, hambi nyama yo nyenyeza kha ya wulela mkanani kwangu.
15Se a to ni gela ku khene:
Ngono, ni ku ningile mitximba ya tihomu ta vamakati, wukhaloni ka mitximba ya vathu; se u na maha dipawu dako ngu yona.
16Sekoko a to ni gela ku khene:
Awe mwanana wa m'thu, wona taku ni na pwatekisa dipawu Jerusalema, se va na dya dipawu da didotho ni manyenyo; ni mati va na sela ngu kupimela ni kukalala; 17kasi kuve pwatekelwa ngu dipawu ni mati, va txi xamalana mmwani ni mmwani, va txi hetwa ngu sionho sawe.
Currently Selected:
Ezekhiyele 4: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
