Eksodha 26

Ditenda Masoni ka Txizimu

(Eksodha 36:8-38)

1Se ditenda u na di maha ngu digumi da mijiyo ya linyu yo hehuka yo lukwa, ni nguwo ya mkuxe, ni ya txiwunguwungu ni yo bhilivila; u na yi maha yi di ni sifananiso sa makerubhima, o tshuriselwa.#26:1 Mwendo: so tshulwa. 2Kulapha ka m'jiyo wumwewo ku nava ka magumi mambidi ni mtxhanu wa mikono ni yiraru, se kuanama ka m'jiyo wumwewo ku nava ka mune wa mikono; yotshe mijiyo yiya, yi na va ya lipimo limwelo. 3Mtxhanu wa mijiyo yi na patwa yi txi rungwa; ni yimwani ya mtxhanu yi na patwa yi rungwa ni yona. 4U na maha sifundo ka nguwo yo hehuka ya mkungu amu titshokani ka nguwo yo khata ayi yi ku ngu magwito ka totshe; se ni totshe timwani ta mtxhanu u na va u txi maha nga toneto. 5U na maha mtxhanu wa magumi a sifundo ka nguwo yo khata, ni mtxhanu wa magumi a sifundo, ngu magwito ka nguwo yi ku ka wukhalo wumbidi ka wa tinguwo totshe. Sifundo sotshe si na manana. 6U na maha kambe mtxhanu wa magumi wa sihariketo sa nzalama u txi patanisa tinguwo, yimwani ni yimwani ngu sihariketo, ati to nyumba yo sawuleka yi va i di yimweyo.

7U na maha mijiyo ngu matoya a tiphongo, kasi kumaha txifenengeto txitimwi ka ditenda; digumi da mijiyo ni wumwewo u na va u txi maha. 8Kulapha ka m'jiyo ku nava ka magumi mararu a mikono, se kuanana ka kona ku nava ka mune wa mikono; mijiyo yiya ya digumi ni wumwewo, yi na va ya lipimo limwelo. 9U na pata mtxhanu wa mijiyo yi maha m'jiyo wumwewo, ni mtxhanu wa mijiyo ni wumwewo yi txi maha wumwani m'jiyo; se u na pata mkonye wa m'jiyo wa wutxhanu ni wumwewo, masoni ka ditenda. 10U na maha sifundo sa mtxhanu wa magumi amu titshokani ka m'jiyo wo khata ka yile yi nga patwa yi rungwa, ni simwani sifundo sa mtxhanu wa magumi titshokani ka m'jiyo wumwani wa didhawa da wumbidi da mijiyo. 11U na maha mtxhanu wa magumi a sihariketo sa koporo, u txi wuletisa sihariketo amu ka sifundo, kasi kupata ditenda di maha dimwedo. 12Didhawa di di no sala ka mijiyo ya ditenda, i ku hafu ya m'jiyo awu wu salako, wu na ndiwikela ngu msana ka ditenda. 13Se mkono wumwewo ka didhawa dimwedo ni wumwani ka dimwani didhawa, wule wu no sala ka kulapha ka mijiyo ya ditenda, wu na ndiwikela madhawani ka ditenda kasi ku di fenengeta.

14U na maha txifenengeto txa ditenda ngu madhowo a tinvuta o pendwa ngu penda yo bhilivila ni tximwani txifenengeto txa didhowo do hehuka ngu txitimwi.

15U na maha kambe mapulango ka ditenda do sawuleka ngu mndonga wa sitime, aale ma no khweketwa ma txi emiswa. 16Kulapha ka dipulango dimwedo i nava ka digumi da mikono, se kuanama ka dipulango dimwedo ni dimwani i nava ka mkono wumwewo ni hafu. 17Dipulango ni dipulango di na va ni sikhweketo simbidi, so paraka dimwani ni dimwani, u na maha toneto ka otshe mapulango a ditenda do sawuleka. 18U na maha mapulango o lumba ditendani nga tiya: Magumi mambidi a mapulango ngu didhawa ka wuphemba. 19U na maha siparako sa mtengo wa mune wa magumi sa silivhela, ngu hahatshi ka mapulango a magumi mambidi: Siparako simbidi u na si veka ngu hahatshi ka dipulango dimwani ni dimwani, ka sikhweketo sa kona sa simbidi. 20Kambe ku nava ni magumi mambidi a mapulango ka dimwani didhawa da ditenda, ngu didhawa da wuphemba, 21ku nava ni mune wa magumi wa siparako sa silivhela, siparako simbidi si na vekwa ka dipulango ni dipulango. 22Ngu hahatshi ka ditenda do sawuleka, ka didhawa da mswa-ditambo, u na maha mtxhanu wa mapulango ni dimwedo. 23Kambe u na maha mamwani mapulango a mambidi, aha ka makhona a hahatshi ka ditenda. 24Ma nava ma di patanisilwe ngu didhawa da hahatshi, ni kambe ma na zumba ma di patanisilwe kala ka didhawa da txitimwi ngu disinda dimwedo dwe: Ngu toneto, ti no mahwa ngu mapulango a mambidi, ngu didhawa ni didhawa da makhona mambidi. 25Ti di ngeto, ma nava mtxhanu ni mararu mapulango, kumweko ni siparako sa kona sa silivhela sa mtengo wa digumi ni mtxhanu ni tximwetxo, si txi maneka siparako simbidi ngu hahatshi ka dipulango ni dipulango.

26Sekoko u na maha mtxhanu wa mirwalo ngu mapulango a mndonga wa setime, ma txi komba ka didhawa dokari da ditenda, 27se mtxhanu wa mirwalo yi na komba ka dimwani didhawa kambe da ditenda; ni mtxhanu wa mirwalo yo komba ka dimwani didhawa kambe da ditenda, yo komba mabambe mambidi, ngu mswa-ditambo. 28Se mrwalo wa hagari wu na va ngu hagari ka mapulango, kukhukhela magwito kala ka mamwani magwito. 29U na bhama ngu nzalama ona masinda ale u no mananisa ngu ona mihingalakanyo, yile ni yona yi no bhamwa ngu nzalama. 30Sekoko u na gwimbisa toneto ditenda, nga ti ni nga ku kombisisa tona ka wona mmango wuwa.

31Ngu msana u na maha m'jiyo wa mxowo wa mkuxe ni wa txiwunguwungu ni wo bhilivila, ngu linyu yo hehuka yo lukelwa, yi mahwa ngu wutxhari ni kurungelwa ngu kutshuriselwa, na wu di ni sifananiso sa makerubhima. 32U na wu hayeka aha ka mune wa tiphande ta mndonga wa setime, tile ti no bhamwa ngu nzalama, ti ku ni mune wa sihariketo sa nzalama ngu txitimwi ka mune wa sipande sa silivhela. 33U na hayeka m'jiyo ngu hahatshi ka siparako, kambe ngu hagari ka kona, mndani ka m'jiyo u na veka dibhokiso da wufakazi. M'jiyo wu na komba m'hingano ka wukhalo wo sawuleka ni wukhalo wo sawuleka ngutu. 34U na veka txikhalo txa wumbilu txitimwi ka dibhokiso da wufakazi ka Wukhalo wo Sawuleka ngutu. 35U na veka meza ngu hahatshi ka m'jiyo, ni msanje wa malambu ngu masoni ka meza, ngu didhawa da wulambwe ka ditenda do sawuleka; kasi ngu meza yi na zumbela didhawa ka wuphemba.

36Ha txikeni ka ditenda, u na maha m'jiyo ngu nguwo ya mxowo wa mkuxe, mxowo wa txiwunguwungu, ni wo bhilivila, ngu nguwo ya linyu, yo hehuka, yo lukwa, yo rungiswa kutshuriselwa. 37Ka wuwa m'jiyo u na maha mtxhanu wa tiphande ngu mndonga wa setime, to bhamwa ngu nzalama, sihariketo sa kona si na va sa nzalama, ni kambe u na nyivilikisa u txi khandela mtxhanu wa sipande sa koporo.

Currently Selected:

Eksodha 26: BEC2016

Highlight

Copy